ທູດລາວ ປະຈຳ ສສ ຫວຽດນາມ ຢ້ຽມຢາມ ແລະ ເຮັດວຽກຢູ່ນະຄອນ ແລະ ບັນດາແຂວງ ຂອງ ສສ ຫວຽດນາມ

ໂອກາດນີ້, ທ່ານ ນາງ ຄໍາເພົາ ເອີນທະວັນ ໄດ້ເຂົ້າຢ້ຽມຂໍ່ານັບຕໍ່ ທ່ານ ໂຮ່ ກີ່ ມິງ ຮອງເລຂາຜູ້ປະຈໍາການພັກນະຄອນ, ຮອງປະທານຄະນະກໍາມະການປະຊາຊົນນະຄອນດານັງ; ທ່ານ ເລ ຈີ ແທັງ ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງກວາງນາມ; ທ່ານ ອາ ປືດຮອງເລຂາຜູ້ປະຈໍາການພັກແຂວງກອນຕູມ; ທ່ານ ເຈືອງ ຫ້າຍ ລັອງ ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງຢາລາຍ ແລະ ທ່ານ ນາງ ເຮີ ຢິມ ເຄິ ດໍ ຮອງປະທານຄະນະກໍາມະການປະຊາຊົນແຂວງດັກລັກ ສສ ຫວຽດນາມ ໃນໂອກາດມາດຳລົງຕໍາແໜ່ງເປັນ ເອກະອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.

ໃນການເຂົ້າຢ້ຽມຂໍ່ານັບ ແລະ ພົບປະບັນດາແຂວງຄັ້ງນີ້, ການນຳແຕ່ລະແຂວງ, ນະຄອນ ໄດ້ສະແດງຄວາມຍິນດີ ຕ້ອນຮັບ ແລະ ຕີລາຄາສູງທີ່ ທ່ານ  ນາງ ຄໍາເພົາ ເອີນທະວັນ ໄດ້ຮັບການແຕ່ງຕັ້ງມາດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ເຊິ່ງເປັນການສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຂອງພັກ, ລັດ ແລະ ປະ ຊາຊົນລາວ ທີ່ມີຕໍ່ທ່ານເອກອັກຄະລັດຖະທູດ, ພ້ອມທັງໄດ້ລາຍງານສະພາບການພັດທະນາເສດຖະ ກິດ-ສັງຄົມຂອງແຂວງ, ນະຄອນ ໂດຍຫຍໍ້ ກໍຄື ການຮ່ວມມືບັນດາແຂວງແຮກສ່ຽວຂອງ ສປປ ລາວ ໃຫ້ຊາບ. ພ້ອມນີ້, ການນໍາແຕ່ລະແຂວງ, ນະຄອນ ກໍໄດ້ຕີລາຄາສູງ ທີ່ທ່ານເອກອັກຄະລັດຖະທູດ ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກໃນຄັ້ງນີ້ ເຊິ່ງຈະເປັນການສືບຕໍ່ກະຕຸກຊຸກຍູ້ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານ ລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດ ລາວ-ຫວຽດນາມ ໂດຍສະເພາະ ການພົວພັນຮ່ວມມືຊ່ວຍເຫລືອ ເຊິ່ງກັນ ແລະ ກັນ ລະຫວ່າງ ບັນດາແຂວງທ້ອງຖິ່ນຂອງລາວ ແລະ ຫວຽດນາມ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.

ນອກຈາກນີ້, ທ່ານ ເອກອັກຄະລັດຖະທູດ ພ້ອມຄະນະ ຍັງໄດ້ເດີນທາງໄປໄຕ້ທູບ ແລະ ວາງພວງມາລາ ຢູ່ອະນຸສາວະລີແມ່ວິລະຊົນ ແລະ ຢ້ຽມຢາມສະຖານທີ່ພື້ນຖານການປະຕິວັດ ລາວ-ຫວຽດນາມ ຕໍ່ສູ້ກັບຝຣັ່ງໃນຊຸມປີ 1945-1949 ຢູ່ບ້ານຟູ້ນິງ ແຂວງກວາງນາມ; ຢ້ຽມຢາມສ່ວນວັດທະນະທໍາຊົນເຜົ່າ ແລະ ຫໍພິພິຕະພັນປະຫວັດສາດ ແຂວງຢາລາຍ ແລະ ຢ້ຽມຢາມ ໂຮງຮຽນວັດທະນະທໍາຊົນເຜົ່າ ເຕີຍຫງວຽນ ເຊິ່ງມີນັກຮຽນລາວທີ່ກໍາລັງຮໍ່າຮຽນຢູ່ 179 ຄົນ ຢູ່ແຂວງດັກລັກ.

ໂອກາດນີ້, ທ່ານ ເອກອັກຄະລັດຖະທູດ ກໍໄດ້ກ່າວສະແດງຄວາມຂອບໃຈ ມາຍັງການນຳ, ອຳນາດການປົກຄອງນະຄອນດານັງ, ແຂວງກວາງນາມ, ແຂວງກອນຕູມ, ແຂວງຢາລາຍ ແລະ ແຂວງດັກລັກ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ເຊິ່ງທ່ານເອກອັກຄະລັດຖະທູດ ພ້ອມດ້ວຍກົງສູນໃຫຍ່ຢູ່ນະຄອນດານັງ ກໍພ້ອມທີ່ຈະສືບຕໍ່ເປັນຂົວຕໍ່ທີ່ດີ ແລະ ເປັນຜູ້ປະສານງານທີ່ສຳຄັນ ໃຫ້ແກ່ບັນດາແຂວງ, ນະຄອນ ຂອງ ສສ ຫວຽດນາມ ເພື່ອສືບຕໍ່ພົວພັນຮ່ວມມືກັບບັນດາແຂວງທ້ອງຖິ່ນ ຂອງ ສປປ ລາວ ເພື່ອສົ່ງເສີມການພົວພັນຮ່ວມມືສອງປະເທດ ໃຫ້ນັບມື້ນັບມີການພັດທະນາເຂົ້າສູ່ລວງເລິກ ແລະ ກວ້າງຂວາງ, ຈະທຸ້ມເທເຫື່ອແຮງ ແລະ ສະຕິປັນຍາຂອງຕົນ ເຂົ້າໃນການເສີມຂະຫຍາຍສາຍພົວພັນພິເສດສອງຊາດລາວ-ຫວຽດນາມ ໃຫ້ຈະເລີນແຕກດອກອອກຜົນຍິ່ງໆຂຶ້ນ, ພ້ອມທັງສະແດງຄວາມຂອບໃຈພັກ, ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫລືອພັກ, ລັດ ແລະ ປະຊາຊົນລາວ ຕະຫລອດມາ ໂດຍສະເພາະແມ່ນນະຄອນດານັງ, ແຂວງກວາງນາມ, ແຂວງກອນຕູມ, ແຂວງຢາລາຍ ແລະ ແຂວງດັກລັກ ທີ່ໄດ້ໃຫ້ການຊ່ວຍເຫລືອ ບັນດາແຂວງແຮກສ່ຽວຂອງລາວຕະຫລອດມາ, ພິເສດແມ່ນການຊ່ວຍກໍ່ສ້າງຊັບພະຍາກອນມະນຸດ.