ປກສ ແຂວງຈຳປາສັກ ກວດກັກລົດ ແລະ ຄົ້ນພົບຢາບ້າ 40.000 ເມັດ ພ້ອມກັກຕົວຜູ້ຖືກຫາໄດ້ 3 ຄົນ
ເຈົ້າໜ້າພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ລາຍງານວ່າ: ເວລາປະມານ 11:00 ໂມງ ຂອງວັນທີ 14 ທັນວາ 2023 ໄດ້ຮັບແຈ້ງຈາກເຈົ້າໜ້າທີ່ພະແນກຕຳຫລວດຈາລະຈອນ ປກສ ແຂວງຈໍາປາສັກ ປະຈຳຈຸດກວດກາຄວາມໄວ ບ້ານ ໂພນສີໄຄ ນະຄອນປາກເຊ ວ່າໄດ້ກັກລົດເກັງສີຂາວ ປ້າຍທະບຽນ ກກ 5924 ບໍລິຄຳໄຊ ເພື່ອກວດກາ ຜ່ານການກວດຄົ້ນພາຍໃນລົດ ພົບເຫັນຢາເສບຕິດປະເພດຢາບ້າ 40.000 ເມັດ ຢູ່ພາຍໃນລົດເກັ່ງຄັນດັ່ງກ່າວ, ດັ່ງນັ້ນເຈົ້າໜ້າທີ່ຈິ່ງໄດ້ກັກຕົວຜູ້ຖືກຫາໄດ້ 2 ຄົນຄື:1. ທ້າວ ສຸລິສັກ ພາວິລິເດດ ອາຍຸ 32 ປີ ສັນຊາດລາວ ອາຊີບ ເຮັດສວນ ແລະ ທ້າວ ແຫລ້ ລັດທະວົງ ອາຍຸ 24 ປີ ສັນຊາດລາວ ອາຊີບ ເຮັດນາ. ພວກກ່ຽວທັງສອງຢູ່ບ້ານຫ້ວຍເພັດ ເມືອງປາກກະດິງ ແຂວງ ບໍລິຄຳໄຊ, ພ້ອມຂອງກາງຢາບ້າ 40.000 ເມັດ, ລົດເກັງ 1 ຄັນ, ໂທລະສັບ 2 ໜ່ວຍ, ຫລຽນພະ 3 ອົງ, ເງິນກີບ 1.200.000 ກີບ ແລະ ເຄື່ອງຂອງກາງອື່ນໆອີກຈຳນວນໜຶ່ງ.
ຈາກນັ້ນ, ເຈົ້າໜ້າທີ່ພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ຈຶ່ງໄດ້ຂະຫຍາຍຜົນຫາຜູ້ຮ່ວມການນຳກັນ ຈົນສາມມາດກັກຕົວໄດ້ເພີ່ມອີກ 1 ຄົນຄື: ທ້າວ ໂໝດ ພັນໃຍ ອາຍຸ 24 ປີ ສັນຊາດລາວ ອາຊີບເຮັດນາ ຢູ່ບ້ານ ຫຽງ ເມືອງ ສຸຂຸມາ ແຂວງ ຈຳປາສັກ ໃນຂໍ້ຫາຂົນສົ່ງຢາເສບຕິດ ພ້ອມເຄື່ອງຂອງກາງ ແລະ ເຄື່ອງຂອງຕິດຕົວ ເງິນກີບ 9.000.000 ກີບ ພ້ອມລົດຮຸ່ນໄດ 6 ລໍ້ 1 ຄັນ, ໂທລະສັບ 1 ໜ່ວຍ, ປຶ້ມບັນຊີເງິນຝາກ 1 ຫົວ, ປຶ້ມຜ່ານແດນ 1 ຫົວ, ບັດປະຊາຊົນ 1 ບັດ ມາດຳເນີນຄະດີ.
ປັດຈຸບັນຄະດີດັ່ງກ່າວຍັງຢູ່ໃນຂັ້ນຕອນສືບສວນສອບສວນຂອງເຈົ້າໜ້າທີ່ ເພື່ອຊອກຫາຜູ້ຮ່ວມຂະບວນການມາດຳເນີນຄະດີຕາມຂັ້ນຕອນຂອງກົດໝາຍ.
