ນະຄອນຫລວງວຽງຈັນ ເຜີຍແຜ່ການຈັດຕັ້ງປະຕິບັດນິຕິກຳຄຸ້ມຄອງເງິນຕາຕ່າງປະເທດໃຫ້ມີປະສິດທິພາບຍິ່ງຂຶ້ນ

ວັນທີ 20 ທັນວາ 2023, ອົງການປົກຄອງນະຄອນຫລວງວຽງຈັນ (ນວ) ໄດ້ຈັດກອງປະຊຸມເຜີຍແຜ່ກ່ຽວກັບການຈັດຕັ້ງປະຕິບັດນິຕິກຳຄຸ້ມຄອງເງິນຕາຕ່າງປະເທດຂັ້ນ ນວ ຢູ່ຫ້ອງວ່າການນະຄອນຫລວງວຽງຈັນ, ເຜີຍແຜ່ເນື້ອໃນຈິດໃຈຄຳສັ່ງ ສະບັບເລກທີ 10/ນຍ ເຮັດໃຫ້ການຈັດຕັ້ງປະຕິບັດກົດໝາຍມີປະສິດທິພາບຍິ່ງຂຶ້ນ ແລະ ໃຫ້ມີຄວາມເປັນເອກະພາບເພື່ອຮັບປະກັນໃຫ້ການເຄື່ອນໄຫວເງິນຕາຕ່າງປະເທດສອດຄ່ອງຕາມກົດໝາຍ ແລະ ລະບຽບການກ່ຽວຂ້ອງ.

ທ່ານ ພູວົງ ວົງຄຳຊາວ ຮອງເຈົ້າຄອງ ນວ, ກ່າວວ່າ: ວຽກງານໃນຂົງເຂດຄຸ້ມຄອງເງິນຕາຕ່າງປະເທດຖືວ່າມີຫລາຍບັນຫາທີ່ທ້າທາຍຫລາຍສົມຄວນເປັນຕົ້ນ: ການນຳໃຊ້ເງິນຕາຕ່າງປະເທດຢູ່ພາຍໃນການຄຸ້ມຄອງເງິນຕາຕ່າງປະເທດດ້ານການຄ້າ, ການລົງທຶນ, ໜີ້ສິນຕ່າງປະເທດ ແລະ ການບໍລິການເງິນຕາຕ່າງປະເທດທີ່ບໍ່ໄດ້ຮັບອະນຸຍາດ, ຜ່ານມາທະນາຄານແຫ່ງ ສປປ ລາວ (ທຫລ) ໄດ້ຄົ້ນຄວ້າປັບປຸງກົນໄກໃນການຄຸ້ມຄອງເງິນຕາຕ່າງປະເທດ ດ້ວຍການປັບປຸງກົດໝາຍວ່າດ້ວຍ ການຄຸ້ມຄອງເງິນຕາຕ່າງປະເທດສຳເລັດໃນປີ 2022 ຫລັງຈາກນັ້ນ ທຫລ ກໍສຸມໃສ່ຄົ້ນຄວ້າເພື່ອຜັນຂະຫຍາຍເປັນນີຕິກໍາລຸ່ມກົດໝາຍດັ່ງກ່າວ.

ສຳລັບຢູ່ນະຄອນຫລວງວຽງຈັນ ປັດຈຸບັນກຳລັງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ກາງສະໄໝ ພ້ອມທັງຂຸ້ນຂ້ຽວຈັດຕັ້ງປະຕິບັດການເກັບລາຍຮັບທ້າຍປີງົບປະມານ ປີ 2023 ໃຫ້ບັນລຸ 7.431 ຕື້ກີບ ກວມ 127,78% ຂອງແຜນການປີ, ໃນນັ້ນ ລາຍຮັບພູດສູນກາງ (ພາສີ) ຄາດຄະເນສູ້ຊົນປະຕິບັດໝົດປີ 2023 ໃຫ້ໄດ້ 5.295 ຕື້ກວ່າກີບ, ລາຍຮັບທ້ອງຖິ່ນ ນວ ຄາດຄະເນສູ້ຊົນປະຕິບັດໝົດປີ 2023 ໃຫ້ໄດ້ 2.136 ຕື້ກວ່າກີບ.