ປກສ ເມືອງບາຈຽງຈະເລີນສຸກ ທຳລາຍຕົ້ນກະທ່ອມທີ່ປະຊາຊົນປູກໄວ້ 35 ຕົ້ນ ແລະ ເບ້ຍຕົ້ນກະທ່ອມ 6 ເບ້ຍ

ວັນທີ 14 ທັນວາ 2023, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງ ບາຈຽງເລີນສຸກ ແຂວງຈຳປາສັກ ນຳໂດຍທ່ານ ພັທ ສີພູມ ທອງສະໝຸດ ຫົວໜ້າກອງບັນຊາການ ປກສ ເມືອງພ້ອມຄະນະ ໄດ້ທຳລາຍຕົ້ນກະທ່ອມ ຈຳນວນ 35 ຕົ້ນ ແລະ ເບ້ຍຕົ້ນກະທ່ອມ 6 ເບ້ຍ ຢູ່ເຂດບ້ານທີ 10 ເມືອງ ບາຈຽງຈະເລີນສຸກ, ເຊິ່ງເປັນຂອງ ທ້າວ ອົ້ນ ແພງຖິ່ນ ອາຍຸ 28 ປີ ຊາວສວນ ບ້ານ ໂນນຫີນ ເມືອງ ໂພນທອງ ແຂວງ ຈຳປາສັກ ປັດຈຸບັນພັກເຊົາຢູ່ບ້ານທີ 10 ເມືອງ ບາຈຽງຈະເລີນສຸກ ແຂວງ ຈຳປາສັກ. ພ້ອມທັງເຮັດບົດບັນທຶກສຶກສາອົບຮົມກ່າວເຕືອນ ທ້າວອົ້ນ ແພງຖິ່ນ ບໍ່ໃຫ້ຜູ້ກ່ຽວເຄື່ອນໄຫວກະທຳຄືເກົ່າອີກຖ້າຫາກຜູ້ກ່ຽວບໍ່ປ່ຽນແປງເຈົ້າໜ້າທີ່ຈະໄດ້ດຳເນີນການຕາມລະບຽບກົດໝາຍ.