ເທສະການບຸນກອງເຂົ້າໃຫຍ່ເມືອງພຽງ ຈະຈັດຂຶ້ນແຕ່ວັນທີ 6-12 ມັງກອນ 2024 ແລະ ມີ 15 ກິດຈະກໍາ
ວັນທີ 18 ທັນວາ 2023, ທ່ານ ນາງ ແສງອາພອນ ແກ້ວບົວໂຮມ ຮອງເລຂາພັກເມືອງ ປະທານຄະນະກໍາມະການຈັດງານເທດສະການບຸນກອງເຂົ້າໃຫຍ່ປະຈໍາປີ 2024 ລາຍງານວ່າ: ການຈັດເທສະການບຸນກອງເຂົ້າໃຫຍ່ປະຈໍາປີ 2024 ເມືອງພຽງ ແຂວງໄຊຍະບູລີ ຈະເລີ່ມແຕ່ວັນທີ 6-12 ມັງກອນ 2024 ແລະ ຈະມີ 15 ກິດຈະກຳຄື: ກິດຈະກຳປະເພນີເຕົ້າໂຮມເຂົ້າເປືອກ-ເຂົ້າສານຂອງປະຊາຊົນທົ່ວເມືອງ, ແຂ່ງຂັນກອງຫາງ ແລະ ກອງງາມ, ກິດຈະກຳແຫ່ເຂົ້າສານເຂົ້າເປືອກ, ປະກວດທິດາກອງເຂົ້າໃຫຍ່ປະຈຳປີ 2024, ເປີດງານເທດສະການຢ່າງເປັນທາງການ, ທ່ຽວຊົມກອງເຂົ້າໃຫຍ່, ການຟາດເຂົ້າ, ວິຖີການດຳລົງຊີວິດຂອງເຜົ່າຕອງເຫລືອງ ແລະ ອື່ນໆ.
ທັງນີ້ກໍເພື່ອສືບຕໍ່ເສີມຂະຫຍາຍມູນເຊື້ອຮີດຄອງປະເພນີທີ່ເປັນເອກະລັກວັດທະນະທໍາຂອງທ້ອງຖິ່ນທີ່ເຄີຍປະຕິບັດຜ່ານມາໃຫ້ມີຄວາມຍືນຍົງຄົງຕົວຢູ່ກັບປະຊາຊົນບັນດາເຜົ່າ ກໍຄືຊາວເມືອງພຽງ ແຂວງໄຊຍະບູລີ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມເມືອງພຽງ ເມືອງອູ່ເຂົ້າອູ່ປາ ທົ່ງນາກວ້າງ ຮວງເຂົ້າໃຫຍ່ ປ່າໄມ້ດົກໜາ ໄມ້ແຕ້ຄ່າພັນປີ ວັດທະນະທຳຫລາຍສີສັນປະຊາຊົນດຸໝັ່ນ.
