ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແນະນຳແຂວງຜົ້ງສາລີເອົາໃຈໃສ່ຊຸກຍູ້ການຜະລິດພາຍໃນໃຫ້ຫລາຍຂຶ້ນ

ວັນທີ 18 ທັນວາ 2023, ທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຫົວໜ້າກອງເລຂາຄະນະສະເພາະກິດ 19/ກມສພ ໄດ້ພົບປະໂອ້ລົມຕໍ່ພະນັກງານ-ລັດຖະກອນ ທີ່ເຮັດວຽກເສນາທິການຮັບໃຊ້ການນຳແຂວງ ຢູ່ຫ້ອງວ່າການແຂວງຜົ້ງສາລີ.

ທ່ານ ລັດຖະມົນຕີ, ຫົວໜ້າ ຫສນຍ ກໍໄດ້ມີຄຳແລກປ່ຽນຄຳຄິດເຫັນ ໃນການປັບປຸງແກ້ໄຂວຽກງານຄົງຄ້າງຕ່າງໆໃນໄລຍະຜ່ານມາຕາມທິດຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ໂດຍສະເພາະໄດ້ຜັນຂະຫຍາຍ ເປັນ 3 ຫັນ ຂອງ ຫສນຍ. ພ້ອມທັງສະເໜີພາກສ່ວນກ່ຽວຂ້ອງຂອງແຂວງ ພິຈາລະນາຕື່ມບາງດ້ານ ເປັນຕົ້ນ ສືບຕໍ່ຮັກສາ  ແລະ ເສີມມູນເຊື້ອອັນດີງາມຂອງແຂວງໃນໄລຍະຜ່ານມາໃຫ້ກາຍເປັນທ່າແຮງໃນການພັດທະນາແຂວງທີ່ພົ້ນເດັ່ນຫລາຍຂຶ້ນ; ຕັ້ງໜ້າປັບປຸງການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ ຕິດພັນກັບການກະກຽມດຳເນີນໃຫຍ່ 3 ຂັ້ນຂອງພັກ; ພ້ອມກັນຄົ້ນຄວ້າຜັນຂະຫຍາຍທິດການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອແກ້ໄຂຂໍ້ຄົງຄ້າງໃນຂົງເຂດວຽກງານທີ່ຢູ່ໃນຄວາມຮັບຜິດຊອບ ຂອງພາກສ່ວນຕົນ; ສືບຕໍ່ເອົາໃຈໃສ່ລົງຊຸກຍູ້ການຜະລິດ, ການປູກ-ການລ້ຽງ ເພື່ອໃຫ້ສາມາດສະໜອງພາຍໃນໃຫ້ຫລາຍຂຶ້ນ, ຫລຸດຜ່ອນການນຳເຂົ້າ ແລະ ສາມາດສົ່ງອອກໃຫ້ໄດ້ຫລາຍ ໂດຍສົ່ງວິຊາການລົງໄປຊ່ວຍເປັນປະຈຳຕື່ມ, ອັນໃດສາມາດຫຸ້ມຫໍ່ສ້າງມູນຄ່າເພີ່ມໄດ້, ການປຸງແຕ່ງເປັນສິນຄ້າ ກໍໃຫ້ນຳພາເຮັດ ລວມທັງ ການຊອກຕະຫລາດ, ການອຳນວຍຄວາມສະດວກສົ່ງອອກ, ເພາະພືດກະສິກຳແມ່ນຮັກສາດົນບໍ່ໄດ້; ພ້ອມກັນແຂ່ງຂັນ ສ້າງຂະບວນການແຂ່ງຂັນຮັກຊາດ ແລະ ພັດທະນາ; ສືບຕໍ່ແກ້ໄຂແນວຄິດທີ່ຍັງມີລັກສະນະກົດໜ່ວງຖ່ວງດຶງການພັດທະນາ; ປັບປຸງກົນໄກການປະສານງານ, ແບບແຜນໃນການນຳພາ, ແບບແຜນໃນການເຮັດວຽກ, ແບບແຜນການດຳລົງຊີວິດ ຂອງພະນັກງານ-ລັດຖະກອນ ແລະ ປະຊາຊົນ ເພື່ອພ້ອມກັນກ້າວໜ້າໃນວຽກງານ ກໍຄື ການແກ້ໄຂຊີວິດການເປັນຢູ່ ໃຫ້ຫລຸດພົ້ນອອກຈາກຄວາມທຸກຍາກ ແລະ ຈະເລີນຮັ່ງມີຂຶ້ນເປັນກ້າວໆ.