ໂຮງຮຽນ ມ ສ ນາຄາວ ເມືອງວຽງໄຊໄດ້ຮັບເງີນຊ່ວຍເຫຼືອກໍ່ສ້າງຫໍສະມຸດມູນຄ່າ 356 ລ້ານກີບ
ວັນທີ 14 ທັນວາ 2023ນີ້, ທ່ານ ສິນລະວົງ ຄຸດໄພທຸນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ມອບເງິນຊ່ວຍເຫຼືອ ຈຳນວນ 356 ລ້ານກີບ ທີ່ໄດ້ຈາກການປຸກລະດົມທືນຮອນນຳພາກສ່ວນຕ່າງໆຢູ່ຂັ້ນສູນກາງ ໃຫ້ໂຮງຮຽນ ມັດທະຍົມສົມບູນ ນາຄາວ ເມືອງວຽງໄຊ ແຂວງຫົວພັນ ເພື່ອນຳໄປກໍ່ສ້າງຫໍສະໝຸດຂອງໂຮງຮຽນ, ທ່ານ ສອນມາ ອຸດົມໄຊ ອໍານວຍການໂຮງຮຽນ ມ ສ ນາຄາວ ເປັນຜູ້ຮັບ.
ໂຮງຮຽນ ມ ສ ນາຄາວ ຕັ້ງຢູ່ບ້ານນາຄາວ, ມີອາຄານທັງໝົດ 6 ຫຼັງ, ມີຊັ້ນຮຽນ ແຕ່ຊັ້ນມ1-ມ, ມີຄູອາຈານສອນ 26 ຄົນ, ມີນັກຮຽນທັງໝົດ 319 ຄົນ, ໃນໄລຍະຜ່ານມາ ຄູອາຈານໄດ້ເອົາໃຈ ໃສ່ໃນການສິດສອນສົ່ງຄວາມຮູ້ໃຫ້ນັກຮຽນແຕ່ລະຊັ້ນຮຽນ, ນໍາພານັກຮຽນເຄື່ອນໄຫວວຽກງານຕ່າງໆຢູ່ພາຍໃນໂຮງຮຽນເປັນປົກກະຕິ, ແຕ່ທາງໂຮງຮຽນກໍ່ຍັງພົບຄວາມຫຍຸ້ງຍາກຂາດເຂີນ ດ້ານອຸປະກອນຮັບໃຊ້ຫຼາຍຢ່າງຢູ່ພາຍໃນໂຮງຮຽນໂດຍສະເພາະແມ່ນຫໍສະມຸດຂອງໂຮງຮຽນ.
ໂອກາດນີ້ທ່ານສິນລະວົງ ຄຸດໄພທຸນ ພ້ອມດ້ວຍຄະນະຍັງໄດ້ເຂົ້າຢ້ຽມຊົມຫໍມູນເຊື່ອຫ້ອງການແນວລາວສ້າງຊາດເມືອງວຽງໄຊ, ທ່ຽວຊົມເບີ່ງບັນດາຖໍ້າທ່ານຜູ້ນໍາ ແລະ ສວນຊາກຸຣະມິດຕະພາບລາວ-ຍີ່ປຸ່ນຕື່ມອີກ.
