ປກສ ແຂວງຈຳປາສັກ ມ້າງກຸ່ມແກ້ງ ຄະດີຄ້າ-ຂາຍຢາເສບຕິດ ຢູ່ເຂດເມືອງຊະນະສົມບູນ

ວັນທີ 13 ທັນວາ 2023, ເຈົ້າໜ້າທີ່ ພະແນກຕຳຫຼວດສະກັດກັ້ນ ແລະຕ້ານ ຢາເສບຕິດ ປກສ ແຂວງຈຳປາສັກ ໄດ້ລົງມ້າງຄະດີຄ້າຂາຍຢາເສບຕິດ (ຢາບ້າ) ຢູ່ເຂດບ້ານປົ່ງສ້ານ ເມືອງຊະນະສົມບູນ ແຂວງຈຳປາສັກ ສາມາດກັກຕົວໄດ້ 2 ຄົນຄື: ທ້າວ ແສງອຸໄທ ອາຍຸ 24 ປີ ແລະ ທ້າວຄີມຫັນ ອາຍຸ 18 ປີ ທັງສອງ ຢູ່ ບ້ານປາກຊອນ ເມືອງຊະນະສົມບູນ ແຂວງຈຳປາສັກພ້ອມຂອງກາງຢາເສບຕິດ (ຢາບ້າ) 2.000 ເມັດ, ລົດຈັກ 1 ຄັນ ,ໂທລະສັບ 2 ໜ່ວຍ ແລະ ເງິນສົດ 1.900.000 ກີບ ຈາກນັ້ນ, ເຈົ້າໜ້າທີ່ໄດ້ສອບສວນຂະຫຍາຍຜົນສາມາດກັກຕົວຜູ້ຖືກຫາໄດ້ເພີ່ມອິກ 3 ຄົນຄື: ທ້າວ ສຸກວົງສັກ ບ້ານ ໂນນສະຫັວນ ເມືອງໂພນທອງ ໃນຂໍ້ຫາຄ້າຂາຍຢາເສບຕິດ ແລະ ເສບຢາເສບຕິດ, ພ້ອມລົດຈັກ 1 ຄັນ, ໂທລະສັບ 1 ໜ່ວຍ; ທ້າວ ສຸພະຂັນ ຢູ່ບ້ານໂຊກອຳນວຍ ນະຄອນປາກເຊ ພ້ອມຂອງກາງຢາບ້າ 600 ເມັດ, ໃບກະທ່ອມ 27 ຖົງ ແລະ ນໍ້າຢາ 388 ແກ້ວ, ເງິນກີບ 3.467.000 ກີບ, ເງິນບາດ 4.450 ບາດ, ໂທລະສັບ 1 ໜ່ວຍ; ທ້າວ ຄາຖາ ຢູ່ ບ້ານໂພນສະອາດ ນະຄອນປາກເຊ ພ້ອມຢຶດ ຂອງກາງໂຄເຄນ 1 ຖົງນ້ອຍ, ໂທລະສັບ 1 ໜ່ວຍ ມາດຳເນີນຄະດີ.