ທະນາຄານພັດທະນາອາຊີ ອະນຸມັດເງິນ 32 ລ້ານໂດລາ ເພື່ອສະໜັບສະໜູນ ສປປ ລາວ ໃນການຮັບມືກັບການປ່ຽນແປງດິນຟ້າອາກາດ
ໜັງສືພິມປະຊາຊົນ ລາຍງານວັນທີ 13 ທັນວາ 2023 ວ່າ: ທະນາຄານພັດທະນາອາຊີ (ADB) ໄດ້ອະນຸມັດວົງເງິນ 32 ລ້ານໂດລາສະຫະລັດ,ໃນນັ້ນ ເງິນກູ້ຈາກ ADB ມູນຄ່າ 30 ລ້ານໂດລາ, ທຶນ ມູນຄ່າ 1,5 ລ້ານໂດລາ ຈາກ ກອງທຶນພັດທະນາອາຊີ ແລະ ທຶນຊ່ວຍເຫຼືອມູນຄ່າ 500.000 ໂດລາ ຈາກກອງທຶນເຕັກໂນໂລຊີລະດັບສູງ, ເພື່ອສະໜັບສະໜູນ ສປປ ລາວ ໃນການຮັບມືກັບການປ່ຽນແປງຂອງດິນຟ້າອາກາດ ແລະ ປັບປຸງຊີວິດການ ເປັນຢູ່ ຂອງຊຸມຊົນຊາວກະສິກອນ ຢູ່ນະຄອນຫລວງວຽງຈັນ, ແຂວງບໍລິຄຳໄຊ ແລະ ແຂວງຄຳມ່ວນ.
ໂຄງການຄຸ້ມຄອງ ແລະ ຫລຸດຜ່ອນໄພນໍ້າຖ້ວມ ແລະ ແຫ້ງແລ້ງ ຈະຊ່ວຍລັດຖະບານລາວ ໃນຄວາມພະຍາຍາມ ເພື່ອຫລຸດຜ່ອນການສູນເສຍທາງດ້ານຊັບສິນ ແລະ ເສດຖະກິດຈາກໄພນໍ້າຖ້ວມ-ແຫ້ງແລ້ງ ແລະ ເພີ່ມທະວີຄວາມຫຼາກຫຼາຍທາງດ້ານສະບຽງອາຫານ. ຈຸດປະສົງ ເພື່ອຊຸກຍູ້ເຮັດໃຫ້ເສດຖະກິດມີຄວາມຫຼາກຫຼາຍ ໂດຍຜ່ານການຂະຫຍາຍການປູກພືດທີ່ມີລາຄາສູງ, ການສ້າງວຽກເຮັດງານທຳ ເພື່ອຮອງຮັບກຳລັງແຮງງານເຂົ້າສູ່ການຜະລິດກະສິກຳທີ່ເກີນດຸນ, ການປັບປຸງສະພາບແວດລ້ອມ ທີ່ເອື້ອອຳນວຍແກ່ການດຳເນີນທຸລະກິດ, ພ້ອມທັງການເພີ່ມປະລິມານເງິນຕາ ຕ່າງປະເທດ ແລະ ລາຍຮັບຈາກການເກັບພາສີພາຍໃນປະເທດ ໂດຍການຂະຫຍາຍການສົ່ງອອກ ສິນຄ້າກະສິກຳໃຫ້ຫຼາຍຂຶ້ນ.
ທ່ານ ນາງ ໂຊໂນມິ ທະນາກະ ຫົວໜ້າສຳນັກງານ ADB ປະຈໍາ ສປປ ລາວ ກ່າວວ່າ: “ອັດຕາເງິນເຟີ້ ລາຄາອາຫານທີ່ສູງຂຶ້ນ ແລະ ການສູນເສຍຜົນຜະລິດກະສິກໍາຈາກໄພນໍ້າຖ້ວມ ແລະ ແຫ້ງແລ້ງ ໄດ້ສົ່ງຜົນກະທົບຕໍ່ການບໍລິໂພກອາຫານ, ລາຍໄດ້ ແລະ ສະຫວັດດີການຂອງຄົວເຮືອນ, ການສະໜັບສະໜູນຂອງພວກເຮົາໃສ່ໂຄງການນີ້ ແມ່ນແນໃສ່ ສົ່ງເສີມຄວາມທົນທານ ຕໍ່ກັບສະພາບດິນຟ້າອາກາດ ແລະ ການປັບປຸງຊີວິດ ການເປັນຢູ່ ຂອງຊຸມຊົນຊາວກະສິກອນ. ໂຄງການຈະນຳສະເໜີນະວັດຕະກຳໃໝ່ທີ່ມີຕົ້ນທຶນຕ່ຳ ເພື່ອຄຸ້ມຄອງຈັດການນໍ້າ ໃນເວລານໍ້າຖ້ວມ ແລະ ເພີ່ມຄວາມຮັບປະກັນໃຫ້ມີນໍ້າເພື່ອຮັບໃຊ້ທຳການຜະລິດທີ່ແທດເໝາະໃນຍາມແລ້ງ, ຊຶ່ງຈະສາມາດສະໜອງໃຫ້ແກ່ການປູກພືດໄດ້ຢ່າງຫຼາກຫຼາຍຊະນິດຕະຫຼອດປີ, ລວມທັງການປູກພືດທີ່ເປັນທີ່ຕ້ອງການຂອງຕະຫຼາດ ແລະ ຂາຍໄດ້ໃນລາຄາສູງ.”
ສປປ ລາວ ມີຄວາມສ່ຽງສູງຕໍ່ສະພາບອາກາດອັນຮຸນແຮງ ລວມທັງໄພນໍ້າຖ້ວມ ແລະ ໄພແຫ້ງແລ້ງ ຊຶ່ງຄາດວ່າຈະເຮັດໃຫ້ລວມຍອດຜະລິດຕະພັນພາຍໃນຂອງປະເທດຫລຸດລົງເຖິງ 2% ຕໍ່ປີ. ສະພາບອາກາດຮ້ອນ ທີ່ຮ້າຍແຮງນີ້ ຈະສົ່ງຜົນເຮັດໃຫ້ຜົນຜະລິດເຂົ້າ ໃນລະດູແລ້ງຫລຸດລົງ ຍ້ອນ ປະລິມານນ້ຳທີ່ຫລຸດລົງ ແຕ່ຄວາມຕ້ອງການນໍ້າສຳລັບພືດພັດຫຼາຍຂຶ້ນ ແລະ ສະພາບຂອງດິນບໍ່ດີ. ໃນການຮັບມື, ໂຄງການດັ່ງກ່າວ ຈະລວມເອົາບັນດາວິທີການປະສົມປະສານ ທີ່ລວມເຖິງ ການສະໜອງທຶນໃນການສ້າງລະບົບຊົນລະປະທານ ທີ່ສະໜອງປະລິມານນ້ໍາທີ່ເໝາະສົມ ກັບພື້ນທີ່ ທີ່ເໝາະສົມ ແລະ ໃນເວລາທີ່ເໝາະສົມ.
