ສະຫະປະຊາຊາດຜ່ານມະຕິເຫັນພ້ອມ ຮຽກຮ້ອງໃຫ້ອິດສະລາແອນ-ຮາມັດຢຸດຍິງທັນທີ
ອົງການສະຫະປະຊາຊາດມີມະຕິຮຽກຮ້ອງໃຫ້ອິດສະລາແອນ-ຮາມັດຢຸດຍິງທັນທີ ຫລັງຈາກສະມາຊິກໃນກອງປະຊຸມສະມັດຊາໃຫຍ່ແຫ່ງສະຫະປະຊາຊາດ (UNGA) ຫລາຍກວ່າ 3 ໃນ 4 ຈາກທັງໝົດ 193 ປະເທດເຫັນພ້ອມ ແລະ ສະໜັບສະໜູນຈຸດຢືນດັ່ງກ່າວ ຫລັງຈາກຜູ້ແທນອາເມລິກາເຄີຍຄັດຄ້ານໃນກອງປະຊຸມສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໃນອາທິດຜ່ານມາ.
ມີ 153 ປະເທດເຫັນພ້ອມ ເຊິ່ງລວມທັງ 10 ປະເທດສະມາຊິກອາຊຽນ, ສ່ວນປະເທດທີ່ບໍ່ເຫັນພ້ອມມະຕິດັ່ງກ່າວມີ 10 ປະເທດ ໄດ້ແກ່: ອິດສະລາແອນ, ໂອຕຣິດ, ສ.ເຊັກ, ກົວເຕມາລາ, ໄລບີເຣຍ, ໄມໂຄຣນີເຊຍ, ນາອູຣູ, ປາປົວນິວກິນີ, ປາຣາໄກວ ແລະ ອາເມລິກາ ແລະ ມີອີກ 23 ປະເທດທີ່ງົດອອກສຽງເຊັ່ນ: ອາເຈນຕິນາ, ເຢຍລະມັນ, ຮົງກາລີ, ອິຕາລີ, ເນເທີແລນ, ໂຣມາເນຍ, ຢູເຄຣນ ແລະ ອັງກິດ.
ທ່ານ ຣິຢາດ ແມນເຊີ ຜູ້ແທນປາແລັສຕິນປະຈໍາສະຫະປະຊາຊາດ ລະບຸວ່າ: ປັດຈຸບັນມີຜູ້ຊຸມນຸມປະທ້ວງທີ່ສະໜັບສະໜູນປາແລັສຕິນເກີດຂຶ້ນຫລາຍພື້ນທີ່ທົ່ວໂລກ. ອາເມລິກາບໍ່ສາມາດຈະເມີນເສີຍຕໍ່ພະລັງຂອງມວນຊົນເຫລົ່ານີ້ໄດ້ອີກຕໍ່ໄປ. ພ້ອມເນັ້ນວ່າ: ສິ່ງນີ້ເປັນໜ້າທີ່ຂອງພວກເຮົາທີ່ຈະຕ້ອງຊ່ວຍກັນຢຸດສົງຄາມ ແລະ ການຮຸກຮານຕໍ່ຊາວປາແລັສຕິນ, ເປັນໜ້າທີ່ຂອງພວກເຮົາທີ່ຈະຕ້ອງຊ່ວຍຊີວິດປະຊາຊົນ.
ທ່ານ ນາງ ລິນດາ ໂທມັສ ກຣີນຟິລ ເອກອັກຄະລັດຖະທູດອາເມລິກາປະຈໍາສະຫະປະຊາຊາດ ກ່າວເຖິງຈຸດຢືນຂອງອາເມລິກາກ່ອນຈະມີການລົງມະຕິດັ່ງກ່າວວ່າ: ອາເມລິກາສະໜັບສະໜູນການສົ່ງມອບການຊ່ວຍເຫລືອດ້ານມະນຸດສະທໍາຢ່າງຮີບດ່ວນຢູ່ເຂດກາຊາ ລວມທັງການປົກປ້ອງພົນລະເຮືອນ ແລະ ປ່ອຍຕົວປະກັນໃຫ້ເປັນອິດສະຫລະ. ບັນຫາດ້ານການຢຸດຍິງໃນເວລານີ້ ການຢຸດຍິງພຽງຊົ່ວຄາວອາດເປັນຕົວເລືອກດີທີ່ສຸດ, ແຕ່ອາດເປັນອັນຕະລາຍຕໍ່ຊາວອິດສະລາແອນທີ່ຈະຕົກເປັນເຫຍື່ອຂອງການໂຈມຕີ ແລະ ອາດເປັນອັນຕະລາຍຕໍ່ຊາວປາແລັສຕິນທີ່ສົມຄວນໄດ້ຮັບໂອກາດໃນການດໍາລົງຊີວິດ, ມີອະນາຄົດທີ່ດີ ແລະ ເປັນອິດສະຫລະຈາກກຸ່ມຮາມັດ.
ຜູ້ແທນອາເມລິກາ ແລະ ອິດສະລາແອນຕ່າງບໍ່ເຫັນພ້ອມມະຕິດັ່ງກ່າວ ເພາະພວກເຂົາເຊື່ອວ່າມະຕິຢຸດຍິງຈະອໍານວຍຜົນປະໂຫຍດຕໍ່ກຸ່ມຮາມັດເທົ່ານັ້ນ ໂດຍທ່ານ ກິລາດ ເອີດັນ ເອກອັກຄະລັດຖະທູດອິດສະລາແອນປະຈໍາສະຫະປະຊາຊາດ ກ່າວວ່າ: ການຢຸດຍິງມີຄວາມໝາຍຢ່າງດຽວເທົ່ານັ້ນຄືການຮັບປະກັນຄວາມຢູ່ລອດຂອງກຸ່ມຮາມັດ, ກຸ່ມກໍ່ການຮ້າຍທີ່ຕັ້ງເປົ້າຈະທໍາລາຍອິດສະລາແອນ ແລະ ຊາວຢິວ, ການຢຸດຍິງຈຶ່ງປຽບເໝືອນເປັນໂທດປະຫານສໍາລັບຊາວອິດສະລາແອນ ແລະ ຊາວປາແລັສຕິນ.
ມະຕິຂອງສະມັດຊາໃຫຍ່ແຫ່ງສະຫະປະຊາຊາດບໍ່ມີຜົນຜູກພັນທາງກົດໝາຍ, ແຕ່ມີນໍ້າໜັກໃນທາງການເມືອງລະຫວ່າງປະເທດ ເຊິ່ງສະທ້ອນພາບໃຫຍ່ຂອງມຸມມອງທົ່ວໂລກກ່ຽວກັບສົງຄາມອິດສະລາແອນ-ຮາມັດໃນຄັ້ງນີ້ທີ່ດໍາເນີນມາກວ່າ 2 ເດືອນແລ້ວ.
ຂະນະທີ່ທ່ານ ໂຈ ໄບເດນ ປະທານາທິບໍດີອາເມລິກາ ເຕືອນພັນທະມິດທີ່ໃກ້ຊິດ ຄືທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນວ່າ: ປັດຈຸບັນອິດສະລາແອນກໍາລັງສູນເສຍແຮງສະໜັບສະໜູນຈາກປະຊາຄົມໂລກ ຖ້າຍັງເດີນໜ້າໂຈມຕີເຂດກາຊາ. ພ້ອມແນະນໍາໃຫ້ທ່ານ ເນທັນຢາຮູ ປ່ຽນຈຸດຢືນ ແລະ ແນວທາງໃໝ່.
ໂດຍຄະແນນສຽງເຫັນພ້ອມມະຕິດັ່ງກ່າວເພີ່ມສູງຂຶ້ນຈາກການລົງມະຕິຮຽກຮ້ອງໃຫ້ມີການຢຸດຍິງເພື່ອມະນຸດສະທໍາທັນທີໃນເດືອນຕຸລາຜ່ານມາ ເຊິ່ງຄັ້ງນີ້ມີຜູ້ເຫັນພ້ອມ 121 ປະເທດ, ບໍ່ເຫັນພ້ອມ 14 ປະເທດ ແລະ ງົດອອກສຽງ 44 ປະເທດ. ສະທ້ອນວ່າແຮງສະໜັບສະໜູນອິດສະລາແອນໃນປະຊາຄົມໂລກເລີ່ມຫລຸດລົງ.
ອ້າງອີງ:
- https://www.reuters.com/world/middle-east/un-general-assembly-set-demand-gaza-ceasefire-2023-12-12/
- https://edition.cnn.com/2023/12/12/middleeast/ceasefire-vote-gaza-israel-un-intl/index.html
- https://apnews.com/article/israel-palestinians-un-resolution-ceasefire-humanitarian-6d3bfd31d6c25168e828274d96b85cf8
