ປະຊາຊົນສ່ອງແສງ! ສ້ອມແປງນໍ້າປະປາແລ້ວ ແຕ່ບໍ່ມີການເກັບກວາດເສດດິນອອກຈາກທາງ

ວັນທີ 13 ທັນວາ 2023 ນີ້, ປະຊາຊົນສ່ອງແສງວ່າ: ມີໜ່ວຍງານສ້ອມແປງທໍ່ນ້ຳປະປາ ໄດ້ມາສ້ອມແປງທໍ່ນ້ຳປະປາແຕກ ຢູ່ແຄມທາງຮ່ອມ 5 ບ້ານໂພນເຄັງ ເມືອງໄຊເສດຖາ ນະຄອນຫລວງວຽງຈັນ ເຊິ່ງໄດ້ສ້ອມແປງແຕ່ວັນທີ 20-21 ພະຈິກ ຜ່ານມາ, ແຕ່ພາຍຫລັງສ້ອມແປງສຳເລັດແລ້ວກໍຖິ້ມປະກອງຂີ້ດິນໃນຈຸດທີ່ຂຸດສ້ອມແປງນັ້ນໄວ້ ຈົນເຖິງປັດຈຸບັນກອງຂີ້ດິນກອງນັ້ນກໍຍັງຢູ່ໃນສະພາບເດີມ ໂດຍບໍ່ມີພາກສ່ວນກ່ຽວຂ້ອງໄປຂົນອອກ ຫລື ເຮັດໃຫ້ມັນຮາບພຽງ, ເຊິ່ງຈຸດດັ່ງກ່າວເປັນທາງໂຄ້ງ ແລະ ຍາມກາງຄືນທາງມືດ ອາດສ່ຽງໃຫ້ເກີດອຸບັດເຫດໄດ້ງ່າຍ.

ດັ່ງນັ້ນ, ໃຫ້ພາກສ່ວນກ່ຽວຂ້ອງກວດກາ ແລະ ແກ້ໄຂ ຕາມທາງຄວນດ້ວຍ ເພື່ອຄວາມປອດໄພ ຂອງຜູ້ໃຊ້ລົດໃຊ້ຖະໜົນ ແລະ ປ້ອງກັນການເກີດອຸບັດເຫດ ທີ່ອາດເຮັດໃຫ້ເສຍຊີວິດ ແລະ ຊັບສິນ.