ຄະນະບໍລິຫານງານ ມວຍລາວ ຊຸດໃໝ່ ພ້ອມສ້າງຄົນລາວ ກາຍເປັນນັກຊົກລະດັບອາຊີບ

ຄະນະບໍລິຫານງານສະຫະພັນມວຍແຫ່ງຊາດລາວ ຊຸດໃໝ່ ໂດຍມີທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາລາວ ເປັນປະທານສະຫະພັນມວຍແຫ່ງຊາດລາວ ໄດ້ປະກາດແຜນຍຸດທະສາດຈະສ້າງຄວາມນິຍົມສົ່ງເສີມ ແລະ ພັດທະນາມວຍລາວ ໃນແນວທາງມວຍລາວສ້າງຄົນ ສ້າງອາຊີບ ແລະ ສ້າງເສດຖະກິດຂອງຊາດ ແນໃສ່ສົ່ງເສີມ ແລະ ຂະຫຍາຍຄວາມນິຍົມກິລາມວຍລາວເຂົ້າສູ່ເຍົາວະຊົນ ແລະ ຊາວໜຸ່ມທີ່ສົນໃຈໃນທົ່ວປະເທດ ພ້ອມທັງວາງເປົ້າໝາຍຈະສ້າງຄົນລາວ ກາຍເປັນນັກຊົກລະດັບອາຊີບ ເທົ່າທັນກັບປະເທດເພື່ອນບ້ານ ໂດຍສະເພາະແມ່ນໄທ ທີ່ສາມາດອອກໄປຊົກກັບນັກກິລາລະດັບສາກົນ ເພື່ອສ້າງກຽດຊື່ສຽງມາສູ່ປະເທດຊາດ.

ກະຊວງສຶກສາທິການ ແລະ ກິລາ ຫຼື ສສກ ຈັດພິທີປະກາດການແຕ່ງຕັ້ງ ຄະນະບໍລິຫານງານສະຫະພັນມວຍແຫ່ງຊາດລາວ ຊຸດໃໝ່ ຢ່າງເປັນທາງການ ໂດຍແຕ່ງຕັ້ງ ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ ເປັນປະທານສະຫະພັນມວຍແຫ່ງຊາດລາວ ເມື່ອວັນທີ 9 ທັນວາ 2023 ທີ່ສະໂມສອນໃນຮົ່ມ ລ້ານຊ້າງ ອິນດໍສະເຕດ້ຽມ ບ້ານດອນກອຍ ເມືອງສີສັດຕະນາກ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຄະນະບໍລິຫານງານຊຸດເກົ່າ ແລະ ຊຸດໃໝ່ ຕະຫຼອດຮອດສື່ມວນຊົນຢ່າງພ້ອມພຽງ.

ໃນພິທີ, ທ່ານ ເອກະພັນ ພະພິທັກ ໄດ້ເປີດເຜີຍແຜນຍຸດທະສາດຂອງການພັດທະນາວົງການກິລາມວຍລາວ ເພື່ອກ້າວສູ່ສັງວຽນມວຍລະດັບນານາຊາດ ກໍຄື ວົງການມວຍອາຊີບໃຫ້ຮູ້ວ່າ: ຄະນະບໍລິຫານງານສະຫະພັນມວຍແຫ່ງຊາດລາວ ຊຸດໃໝ່ນີ້ ໄດ້ປຶກສາຫາລື ແລະ ວາງວິໃສທັດຈະສ້າງຄວາມນິຍົມສົ່ງເສີມ ແລະ ພັດທະນາມວຍລາວ ໃນແນວທາງມວຍລາວສ້າງຄົນ ສ້າງອາຊີບ ແລະ ສ້າງເສດຖະກິດຂອງຊາດ ແນໃສ່ສົ່ງເສີມ ແລະ ຂະຫຍາຍຄວາມນິຍົມກິລາມວຍລາວເຂົ້າສູ່ເຍົາວະຊົນ ແລະ ຊາວໜຸ່ມທີ່ສົນໃຈໃນທົ່ວປະເທດ, ສ້າງ ແລະ ພັດທະນາບຸກຄະລາກອນໃນລະບົບບໍລິຫານຈັດການຂອງສະຫະພັນມວຍແຫ່ງຊາດລາວທຸກລະດັບ, ສ້າງໃຫ້ມີການບໍລິຫານງົບປະມານກອງທຶນຂອງສະຫະພັນຈາກການສະໜັບສະໜູນຈາກພາກລັດ ແລະ ເອກະຊົນ ພ້ອມທັງຈັດນະໂຍບາຍສະຫວັດດີການ, ອຸປະກອນ ເພື່ອສ້າງແຮງຈູງໃຈບຸຄະລາກອນ ແລະ ປະຍຸກວິທະຍາສາດການກິລາມາພັດທະນາກິລາມວຍລາວ ແລະ ສ້າງລະບົບພັດທະນານັກກິລາຈາກພື້ນຖານສູ່ຄວາມເປັນເລີດໃນການສົ່ງເສີມການຈັດແຂ່ງຂັນ ແລະ ເຂົ້າຮ່ວມແຂ່ງຂັນຢ່າງຕໍ່ເນື່ອງ.

ນອກຈາກນັ້ນ, ຄະນະບໍລິຫານງານ ມວຍລາວ ຊຸດໃໝ່ ຍັງປະກາດຈະນຳໃຊ້ງົບປະມານທີ່ວາງເປົ້າໝາຍຈະລະດົມໃຫ້ໄດ້ໃນ 5 ປີ ລະຫວ່າງ 2024-2028 ປະມານ 6 ຕື້ກວ່າກີບ ແມ່ນຈະນຳໃຊ້ບໍລິຫານຢ່າງມີໝາກຜົນ ໂດຍສະເພາະຈະສ້າງຄົນລາວໃຫ້ກາຍເປັນນັກຊົກລະດັບອາຊີບ ເທົ່າທັນກັບປະເທດເພື່ອນບ້ານ ໂດຍສະເພາະແມ່ນໄທ ທີ່ສາມາດອອກໄປຊົກກັບນັກກິລາຕ່າງຊາດ ກໍຄື ສາກົນ ເພື່ອສ້າງກຽດຊື່ສຽງມາສູ່ປະເທດຊາດ ຫາກວ່ານັກກິລາຄົນໃດໜຶ່ງສາມາດສ້າງຜົນງານໃນງານລະດັບຕ່າງໆ ກໍຈະມີນະໂຍບາຍມອບໃຫ້ຢ່າງເຕັມທີ່.

ສຳລັບຄະນະບໍລິຫານງານສະຫະພັນມວຍແຫ່ງຊາດລາວ ຊຸດນີ້ ປະກອບມີທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາລາວ ເປັນປະທານສະຫະພັນມວຍແຫ່ງຊາດລາວ, ທ່ານ ພຶກສະພາ ພູມມະສັກ ປະທານບໍລິສັດ ເອເຊຍ ລົງທຶນພັດທະນາ ແລະ ກໍ່ສ້າງຈຳກັດຜູ້ດຽວ, ທ່ານ ສຸກດາລາ ນໍລະແສງ ປະທານບໍລິສັດ ທະວີຊັບກໍ່ສ້າງ ຈຳກັດຜູ້ດຽວ ແລະ ທ່ານ ຂັນທະລີ ໂພທິສານ ຊຶ່ງທັງ 3 ທ່ານ ແມ່ນເປັນຮອງປະທານສະຫະພັນມວຍແຫ່ງຊາດລາວ. ສ່ວນທ່ານ ພູໄຊຊະນະ ໄຊສົມບັດ ຜູ້ອໍານວຍການບໍລິສັດຮູບເງົາລາວສາກົນ ເປັນຮອງປະທານສະຫະພັນມວຍແຫ່ງຊາດລາວ ແລະ ນາຍຄັງ ແລະ ທ່ານ ປອ ຕຸດາວັນ ໜໍ່ເມືອງເສດ ຮອງຫົວໜ້າກົມຈັດຕັ້ງ ແລະ ພະນັກງານ, ເລຂາຄະນະບໍລິຫານງານຊາວໜຸ່ມ ກະຊວງສຶກສາທິການ ແລະ ກິລາ ເປັນຮອງປະທານ-ເລຂາທິການສະຫະພັນມວຍແຫ່ງຊາດລາວ. ນອກຈາກນັ້ນ, ຍັງມີຮອງເລຂາທິການ 3 ທ່ານ, ຄະນະກຳມະການ 17 ທ່ານ ແລະ ທີ່ປຶກສາ ຊຶ່ງເປັນຊາວ ສ.ເກົາຫຼີ ອີກ 1 ທ່ານ.

ພາຍຫຼັງພິທີປະກາດຄະນະບໍລິຫານງານສະຫະພັນມວຍແຫ່ງຊາດລາວ ຊຸດໃໝ່ ສຳເລັດລົງ ໃນຕອນແລງຂອງມື້ດັ່ງກ່າວ ຍັງໄດ້ມີພິທີເປີດສັງວຽນມວຍລາວ ຊຶ່ງເປັນເວທີທີ່ຍິ່ງໃຫຍ່ ແລະ ອະລັງການ ທາງດ້ານແສງສີສຽງ ພ້ອມທັງຈັດແຂ່ງຂັນມວຍ 8 ຄູ່, ຍິງ 1 ຄູ່ ໂດຍໄດ້ເຊີນເອົານັກຊົກສີມືລະດັບປະເທດຂຶ້ນຊົກກັນຢ່າງດຸເດືອດສຸດມ່ວນອີກດ້ວຍ.

ຂ່າວໂດຍ: ໜັງສືພິມສຶກສາ-ກິລາລາຍວັນ