ສືບຕໍ່ຮ່ວມມືຊ່ວຍເຫລືອພັດທະນາ ດ່ານຊາຍແດນລາວ-ຈີນ “ຫັນຈາກປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ”

ຄະນະກໍາມະການຮ່ວມມືລາວ-ຈີນ ແຫ່ງ ສປປ ລາວ ແລະ ອົງການຮ່ວມມືສາກົນເພື່ອການພັດທະນາແຫ່ງຊາດຈີນ ໄດ້ຈັດກອງປະຊຸມກົນໄກຮ່ວມມືສອງຝ່າຍປະຈຳປີ 2023 ໃນວັນທີ 6 ທັນວາ 2023 ທີ່ສູນວາງສະແດງແຜນຜັງຂອງເສດຖະກິດພິເສດບໍ່ເຕ່ນແດນງາມ ແຂວງຫລວງນໍ້າທາ, ເປັນປະທານຮ່ວມຂອງ ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະ ການລົງທຶນ ທັງເປັນປະທານ ຄະນະກຳມະການຮ່ວມມື ລາວ-ຈີນ, ມີທ່ານ ຫລົວ ຈ້າວຮຸຍ ຫົວໜ້າອົງການຮ່ວມມືສາກົນເພື່ອການພັດທະນາ ແຫ່ງຊາດຈີນ ພ້ອມດ້ວຍຂະແໜງການທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ໃນກອງປະຊຸມຄັ້ງນີ້, ທັງສອງຝ່າຍໄດ້ປຶກສາຫາລືດ້ວຍໄມຕີຈິດມິດຕະພາບ, ເປັນເອກະພາບກັນໃນການຊຸກຍູ້ກໍ່ສ້າງດ່ານຊາຍແດນລາວ-ຈີນ ໃຫ້ມີຜົນດີຕໍ່ການຊຸກຍູ້ ສປປ ລາວ “ຫັນຈາກປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ”, ເຊິ່ງມີຄວາມໝາຍຄວາມສໍາຄັນຕໍ່ການສົ່ງເສີມການພັດທະນາເສດຖະກິດ-ສັງຄົມຂອງສອງປະເທດລາວ-ຈີນ, ການເປີດປະຕູສູ່ພາຍນອກໃນລະດັບສູງ ກໍຄືການຮ່ວມມືກັນສ້າງ “ໜຶ່ງແລວ ໜຶ່ງເສັ້ນທາງ” ແລະ ການສ້າງຄູ່ຮ່ວມສະຕາກໍາລາວ-ຈີນ, ພ້ອມນີ້ ສອງຝ່າຍຍັງໄດ້ລາຍງານການຮ່ວມມື ແລະ ສະພາບການຈັດຕັ້ງປະຕິບັດວຽກງານໃນໄລຍະຜ່ານມາຂອງໂຄງການເປັນຕົ້ນ ທາງດ້ານເສດຖະກິດການຄ້າ, ການຄຸ້ມຄອງຄົນເຂົ້າ-ອອກປະເທດ, ໃນໄລຍະຜ່ານມາ ທັງຝ່າຍຈີນ ໄດ້ສົ່ງຄະນະຊ່ຽວຊານມາສຶກສາຄົ້ນຄວ້າເພື່ອກະກຽມດ້ານເຕັກນິກໃຫ້ແກ່ໂຄງການກໍ່ສ້າງຮົ້ວອ້ອມເຂດຮ່ວມມືເສດຖະກິດບໍ່ເຕ່ນ (ລາວ)-ບໍ່ຫານ (ຈີນ) ຢູ່ເບື້ອງຝ່າຍລາວ, ໂຄງການໄດ້ມີການປັບປຸງຍົກລະດັບທາງຫລວງແຫ່ງຊາດເລກທີ 13 ໄລຍະບໍ່ເຕ່ນ, ໂຄງການປັບປຸງຍົກລະດັບທາງລົດໂອໂຕຢູ່ດ່ານຊາຍແດນລາວ-ຈີນ ແລະ ໂຄງການກໍ່ສ້າງອາຄານກວດກາຮ່ວມກັນ ຢູ່ດ່ານກວດກາຊາຍແດນຂອງສະຖານີລົດໄຟບໍ່ເຕ່ນ.

ນອກນີ້, ສອງຝ່າຍໄດ້ເຫັນດີສືບຕໍ່ປືກສາຫາລືຄວາມເປັນໄປໄດ້ຂອງບັນດາໂຄງການດັ່ງກ່າວ ແລະ ໃນຕໍ່ໜ້າຈະໄດ້ສືບຕໍ່ຍົກລະດັບການຜ່ານດ່ານ ໃຫ້ມີປະສິດທິພາບສູງ, ທັງຊຸກຍູ້ການພັດທະນາທາງລົດໄຟລາວ-ຈີນໃຫ້ດີຂຶ້ນໂດຍການສ້າງດ່ານ “ກວດກາຈຸດດຽວປ່ອງດຽວ” ຢູ່ດ່ານສະຖານີລົດໄຟບໍ່ເຕ່ນ, ໃຫ້ການຊ່ວຍເຫລືອລ້າກໍ່ສ້າງອາຄານກວດກາ ລາວ-ຈີນ ຮ່ວມກັນ ແລະ ຈະໄດ້ສືບຕໍ່ປະສານສົມທົບກັນ ໃນການຮ່ວມມືວຽກງານພື້ນຖານໂຄງລ່າງດ່ານຊາຍແດນອື່ນໆຕື່ມອີກ. ພ້ອມທັງໄດ້ຕີລາຄາສູງຕໍ່ໝາກຜົນການຮ່ວມມືຂອງສອງຝ່າຍໃນໄລຍະຜ່ານມາ ແລະ ໃນການຊຸກຍູ້ການຮ່ວມມືທີ່ເປັນຮູບປະທໍາຂອງສອງຝ່າຍ ເພື່ອເປັນການປະກອບສ່ວນອັນສຳຄັນເຂົ້າໃນການຜັນຂະຫຍາຍ ການຕົກລົງເປັນເອກະພາບຂອງການນຳຂັ້ນສູງຂອງສອງປະເທດ ກໍຄືການຈັດຕັ້ງປະຕິບັດບັນດາເອກະສານຮ່ວມມືຕ່າງໆຂອງສອງຝ່າຍລາວ-ຈີນ.