ຫາລື ກົນໄກການຄຸ້ມຄອງ ແລະ ກຳນົດລາຄາກາງສິນຄ້າກະສິກຳ-ເຄື່ອງປ່າຂອງດົງຢູ່ແຂວງພາກກາງ ແລະ ແຂວງພາກໃຕ້

ວັນທີ 7 ທັນວາ 2023, ທີ່ສຳນັກງານຫ້ອງວ່າການແຂວງຈຳປາສັກ, ໄດ້ຈັດກອງປະຊຸມປຶກສາຫາລື ກົນໄກການຄຸ້ມຄອງສິນຄ້າກະສິກຳ-ເຄື່ອງປ່າຂອງດົງຢູ່ແຂວງພາກກາງ ແລະ ແຂວງພາກໃຕ້ ຄື: ແຂວງສະຫວັນນະເຂດ, ສາລະວັນ, ເຊກອງ, ອັດຕະປື ແລະ ແຂວງຈໍາປາສັກ, ເປັນປະທານຮ່ວມຂອງທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ ແລະ ທ່ານ ສຸກກະເສີມ ສີຫານຸວົງ ຫົວໜ້າພະແນກການເງິນແຂວງຈຳປາສັກ.

ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ໄດ້ມີຄໍາເຫັນວ່າ: ເພື່ອຈັດຕັ້ງປະຕິບັດກົດໝາຍວ່າດ້ວຍການຄຸ້ມຄອງສ່ວຍສາອາກອນ ສະບັບເລກທີ 66/ສພຊ, ວາລະແຫ່ງຊາດ ແລະ ຄໍາສັ່ງເລກທີ 18/ນຍ ໃຫ້ປະສົບຜົນສຳເລັດຕາມລະດັບຄາດໝາຍນັ້ນ, ເຫັນໄດ້ວ່າວຽກງານຄຸ້ມຄອງເກັບລາຍຮັບຈາກສິນຄ້າກະສິກຳ-ເຄື່ອງປ່າຂອງດົງກໍເປັນວຽກງານສໍາຄັນໜຶ່ງ, ເຊິ່ງຈະຕ້ອງໄດ້ເອົາໃຈໃສ່ຄຸ້ມຄອງເກັບໃຫ້ໄດ້ຢ່າງຄົບຖ້ວນ ແລະ ຖືກຕ້ອງຕາມລະບຽບກົດໝາຍເພາະສິນຄ້າກະສິກຳ-ເຄື່ອງປ່າຂອງດົງກໍ່ແມ່ນທ່າແຮງໜຶ່ງທີ່ສຳຄັນທີ່ປະກອບສ່ວນເຂົ້າໃນການພັດທະນາເສດຖະກິດສັງຄົມໃນ 4 ແຂວງພາກໃຕ້ ແລະ ປະກອບສ່ວນສຳຄັນໃຫ້ແກ່ແຂວງສະຫວັນນະເຂດ. ໂດຍສະເພາະຢູ່ແຂວງຈຳປາສັກມີມູນຄ່າການສົ່ງອອກສິນຄ້າກະສິກຳ 263 ລ້ານໂດລາສະຫະລັດ (ຂໍ້ມູນຂອງຂະແໜງການຄ້າ), ແຕ່ມູນຄ່າຜ່ານຂະແໜງສ່ວຍສາອາກອນມີພຽງ 2,738 ຕື້ກີບ ຫລື ເທົ່າກັບ 119 ລ້ານໂດລາສະຫະລັດ, ເມື່ອສັງເກດຕົວເລກລະຫວ່າງສອງຂະແໜງການເຫັນໄດ້ວ່າການເກັບພັນທະອາກອນຈາກສິນຄ້າກະສິກຳ-ເຄື່ອງປ່າຂອງດົງຍັງມີການຮົ່ວໄຫລຫລາຍ ແລະ ແຕ່ລະປີແມ່ນພວກເຮົາສູນເສຍລາຍຮັບງົບປະມານຢ່າງຫລວງຫລາຍຈາກການຮົ່ວໄຫລດັ່ງກ່າວ.

ໃນກອງປະຊຸມໄດ້ຍົກຫລາຍບັນຫາເພື່ອຄົ້ນຄວ້າເປັນເອກະພາບເປັນຕົ້ນ: ການກຳນົດລາຄາກາງສຳລັບສິນຄ້າກະສິກຳ-ເຄື່ອງປ່າຂອງດົງເພື່ອເປັນພື້ນຖານຄິດໄລ່ເກັບລາຍຮັບອາກອນ ໃຫ້ມີຄວາມເປັນເອກະພາບກັນຢູ່ໃນ 5 ແຂວງ; ເພາະໄລຍະຜ່ານມາແມ່ນຍັງບໍ່ມີຄວາມເປັນເອກະພາບສ້າງຊ່ອງຫວ່າງໃຫ້ຫົວໜ່ວຍທຸລະກິດຫລົບຫລີກການແຈ້ງມອບພັນທະອາກອນ; ການກຳນົດເງື່ອນໄຂເອກະສານການສົ່ງອອກສິນຄ້າຂອງຂະແໜງພາສີ ແລະ ພ້ອມກັນເອກະພາບກັນຄົ້ນຄວ້າກຳນົດເງື່ອນໄຂບໍລິສັດເລືອກເຟັ້ນເອົາບໍລິສັດທີ່ມີເງື່ອນໄຂຄົບຖ້ວນເປັນບໍລິສັດສົ່ງອອກໃນແຕ່ລະປີໂດຍໃຫ້ບໍໍລິສັດຈົດທະບຽນແຜນການສົ່ງອອກ ຢູ່ພະແນກອຸດສາ ຫະກໍາ ແລະ ການຄ້າ ແລະ ພ້ອມທັງຈ່າຍອາກອນລ່ວງໜ້າຢ່າງໜ້ອຍ 1 ຕື້ກີບຂຶ້ນໄປແລ້ວ 3 ເດືອນໃດໃຫ້ມາໄລ່ລຽງຊຳລະອາກອນ, ຕາມລະບຽບກົດໝາຍແນໃສ່ສະດວກໃນການຄຸ້ມຄອງເກັບອາກອນຈາກສິນຄ້າກະສິກຳ-ເຄື່ອງປ່າຂອງດົງໃຫ້ໄດ້ຢ່າງຖືກຕ້ອງ ແລະ ຄົບຖ້ວນ; ມີການປະສານສົມທົບລະຫວ່າງຂະແໜງການທີ່ກ່ຽວຂ້ອງເອກະພາບວິທີການຄຸ້ມຄອງລານມັນຕົ້ນ, ຈຸດເກັບຊື້ຢາງພາລາ, ກາເຟ ແລະ ອື່ນໆພ້ອມທັງວິທີການເກັບຂໍ້ມູນປະລິມານສິນຄ້າແຕ່ຕົ້ນທາງຫາປາຍທາງ, ເພື່ອເປັນຂໍ້ມູນໃນການແບ່ງລາຍຮັບ, ອັດຕາການແບ່ງລາຍຮັບອາກອນ ແລະ ລາຍຮັບອື່ນທີ່ຕິດພັນຂອງແຂວງຕົ້ນທາງ ແລະ ແຂວງປາຍທາງ, ວິທີການຄິດໄລ່ ແລະ ບອ່ນອີງໃນການຄິດໄລ່ອາກອນ ຈາກການຂົນສົ່ງສິນຄ້າໃຫ້ເປັນເອກະພາບກັນໃນ, ເພື່ອສະກັດກັ້ນການລັກລອບຂົນສິນຄ້າລະຫວ່າງ 5 ແຂວງແບບບໍ່ຖືກຕ້ອງ, ສ້າງກຸ່ມປະສານງານ ແລະ ແລກປ່ຽນຂໍ້ມູນເຊິ່ງກັນແລະກັນລະຫວ່າງແຂວງ,ລະຫວ່າງຂະແໜງການທີ່ກ່ຽວຂ້ອງພາຍໃນແຂວງເພື່ອເປັນເອກະພາບທາງດ້ານຂໍ້ມູນ.

ນອກນີ້, ກໍພ້ອມກັນເຫັນດີເປັນເອກະພາບບັນຫາທີ່ໄດ້ຍົກຂຶ້ນມາ ບັນດາເນື້ອໃນທີ່ໄດ້ເຫັນດີເປັນເອກະພາບ, ເພື່ອເປັນການເຮັດທົດລອງ  ແລະ ປະເມີນຄືນເພື່ອມີວິທີການແກ້ໄຂໃນຕໍ່ໜ້າ.