ລັດຖະມົນຕີກະຊວງການເງິນ ຊຸກຍູ້ວຽກງານເສດຖະກິດ-ການເງິນ ຢູ່ແຂວງໄຊສົມບູນ

ໂດຍການມອບໝາຍຂອງທ່ານນາຍົກລັດຖະມົນຕີ ຫົວໜ້າຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງ ເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ (ຫົວໜ້າຄະນະສະເພາະກິດ 19/ກມສພ), ໃນວັນທີ 7-8 ທັນວາ 2023 ທ່ານ ສັນຕິພາບ ພົມວິຫານ, ລັດຖະມົນຕີກະຊວງການເງິນ, ຄະນະສະເພາະກິດ 19/ກມສພ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ຊຸກຍູ້ການຜັນຂະຫຍາຍ ແລະ ຈັດຕັ້ງປະຕິບັດບັນດານິຕິກຳ ກ່ຽວກັບການແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ ຢູ່ທ້ອງຖິ່ນ ພາຍໃນແຂວງໄຊສົມບູນ; ມີທ່ານ ຮອງເຈົ້າແຂວງໄຊສົມບູນ, ຫົວໜ້າພະແນກການການເງິນແຂວງ, ຜູ້ຕາງໜ້າບັນດາຂະແໜງການ ແລະ ພາກສ່ວນກ່ຽວຂ້ອງພາຍໃນແຂວງ ໃຫ້ການຕ້ອນຮັບ ແລະ ຮ່ວມເຮັດວຽກ.

ໃນໂອກາດດັ່ງກ່າວ, ທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງໄຊສົມບູນ ໄດ້ລາຍງານໃຫ້ຊາບ ກ່ຽວກັບການປະຕິບັດແຜນພັດທະນາເສດຖະກິດ-ສັງຄົມ ທີ່ພົ້ນເດັ່ນ ຂອງແຂວງ ໄລຍະ 11 ເດືອນທີ່ຜ່ານມາ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ທ່ານ ທອງປະເສີດ ໄຊຍະລາດ, ຫົວໜ້າພະແນກການເງິນ ໄດ້ລາຍງານໃຫ້ຊາບ ກ່ຽວກັບການຈັດຕັ້ງປະຕິບັດວຽກງານການເງິນຂອງແຂວງ ເຊິ່ງເນື້ອໃນການລາຍງານທີ່ພົ້ນເດັ່ນຂອງສອງທ່ານດັ່ງກ່າວ ເຫັນວ່າ: ເສດຖະກິດຂອງແຂວງ ສືບຕໍ່ຂະຫຍາຍຕົວຕໍ່ເນື່ອງ, ໄລຍະ 11 ເດືອນ ສາມາດເກັບລາຍຮັບໄດ້ 979,8 ຕື້ກີບ, ເທົ່າກັບ 144,38% ຂອງແຜນການ, ແຜນລາຍຈ່າຍປະຕິບັດໄດ້ 451,62 ຕື້ກີບ ເທົ່າກັບ 72,1% ຂອງແຜນການ. ການແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ: ໄດ້ຕິດຕາມ, ຄຸ້ມຄອງ, ເລັ່ງທວງບັນດາບໍລິສັດທີ່ຂຶ້ນທະບຽນຢູ່ແຂວງ ໃຫ້ແຈ້ງມອບອາກອນ ເປັນປົກກະຕິ ແລະ ທັນກໍານົດເວລາ, ຕໍ່ໃບຢັ້ງຢືນການຊໍາລະອາກອນ ປະຈໍາປີ 2022 ສໍາເລັດຈໍານວນ 70 ກວ່າຫົວໜ່ວຍ; ໄດ້ເຜີຍແຜ່ ແລະ ແນະນໍາ ການນໍາໃຊ້ລະບົບການແຈ້ງມອບອາກອນດ້ວຍຕົວເອງ ໃຫ້ບັນດາຫົວໜ່ວຍທີ່ຂຶ້ນກັບການຄຸ້ມຄອງຂອງສ່ວຍສາອາກອນ ສຳເລັດ 77 ຫົວໜ່ວຍ; ສຳເລັດການລົງຕິດຕາມ, ຊຸກຍູ້ ການຈັດຕັ້ງປະຕິບັດວຽກງານສ່ວຍສາອາກອນ, ການນຳໃຊ້ລະບົບ TaxRis ແລະ ຝຶກອົບຮົມການນຳໃຊ້ລະບົບລາຍງານ ລາຍຮັບສ່ວຍສາອາກອນ ແລະ ການປ້ອນຂໍ້ມູນທີ່ດິນເຂົ້າລະບົບ ໃນ 05 ເມືອງ; ໄດ້ແຈ້ງການ ຫາບັນບໍລິສັດ ທີ່ບໍ່ແຈ້ງມອບອາກອນ ໃຫ້ປະຕິບັດການແຈ້ງເສຍອາກອນດ້ວຍຕົນເອງ ຜ່ານລະບົບ Taxservice; ໄດ້ສົມທົບກັບພາກສ່ວນທີ່ກ່ຽວຂ້ອງຂອງແຂວງ ລົງຕິດຕາມ, ຊຸກຍູ້, ປະເມີນການຈັດຕັ້ງປະຕິບັດບັນດາໂຄງການສຳຫຼວດ, ຊອກຄົ້ນແຮ່ທາດ; ໄດ້ສົມທົບກັບ ກັບພາກສ່ວນກ່ຽວຂ້ອງ ປະເມີນ-ຕີລາຄາ ພາຫະນະລົດບໍລິຫານລັດ ທີ່ເປ່ເພນໍາໃຊ້ບໍ່ໄດ້, ມີອາຍຸການນໍາໃຊ້ເກີນ ຕາມທີ່ໄດ້ກໍານົດໄວ້ໃນດໍາລັດ 599/ລບ ເພື່ອສະສາງອອກຈາກບັນຊີຊັບສິນຂອງລັດ ຕາມລະບຽບການ; ສຳເລັດການປະຕິບັດແຜນລາຍຈ່າຍເງິນອຸດໜູນຄ່າຄອງຊີບໃຫ້ແກ່ພະນັກງານ-ລັດຖະກອນ 150.000/ຄົນ/ເດືອນ ໃນປີ 2023 ຕາມນະໂຍບາຍຂອງລັດຖະບານ.

ໃນໂອກາດດຽວກັນ, ທ່ານ ລັດຖະມົນຕີກະຊວງການເງິນ ໄດ້ມີຄຳເຫັນເຈາະຈີ້ມ ແລະ ເປີດໂອກາດ ໃຫ້ຜູ້ເຂົ້າຮ່ວມ ປະກອບຄຳຄິດເຫັນ ເພື່ອແລກປ່ຽນຂໍ້ມູນ ໃຫ້ມີຄວາມຊັດເຈນ ແລະ ແທດກັບຕົວຈິງຫຼາຍຂຶ້ນ ເພື່ອເຮັດໃຫ້ການແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ ກໍຄື ການພັດທະນາເສດຖະກິດ-ສັງຄົມ ຂອງທ້ອງຖິ່ນ ມີຄວາມໜັກ ແໜ້ນ, ເຂັ້ມແຂງ ແລະ ຂະຫຍາຍຕົວຢ່າງຕໍ່ເນື່ອງ. ຫຼັງຈາກນັ້ນ, ທ່ານ ລັດຖະມົນຕີກະຊວງການເງິນ ກໍໄດ້ສະຫຼຸບສັງລວມ ແລະ ແລກປ່ຽນຄຳຄິດເຫັນຕື່ມບາງດ້ານ ເພື່ອໃຫ້ພາກສ່ວນກ່ຽວຂ້ອງນຳໄປຄົ້ນຄວ້າ ແລະ ຈັດຕັ້ງປະຕິບັດ ໃຫ້ມີການຫັນປ່ຽນ ແລະ ເກີດດອກອອກຜົນເປັນຮູບປະທຳຕົວຈິງ ເປັນຕົ້ນ ສະເໜີໃຫ້ອົງການປົກຄອງທ້ອງຖິ່ນ ແຕ່ລະຂັ້ນ ສືບຕໍ່ໂຄສະນາເຜີຍແຜ່ ແລະ ເຊື່ອມຊຶມ ບັນດານິຕິກຳ ທີ່ລັດຖະບານ ກໍຄື ຄະນະສະເພາະກິດ 19/ກມສພ ວາງອອກ ຕິດພັນກັບການສຶກສາອົບຮົມວຽກງານການເມືອງແນວຄິດ ໃຫ້ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ຕໍ່ການແກ້ໄຂຄວາມຫຍຸ້ງຍາກຂອງເສດຖະກິດ-ການເງິນ, ຄວາມພະຍາຍາມຂອງພາກສ່ວນຕ່າງໆ ແລະ ມາດຕະການຕ່າງໆ ທີ່ວາງອອກ ເພື່ອໃຫ້ເຂົາເຈົ້າໄດ້ຮັບຮູ້, ເຂົ້າໃຈ, ເຊື່ອໝັ້ນ, ໃຫ້ການຮ່ວມມື, ສະໜັບສະໜູນ ແລະ ເຂົ້າຮ່ວມປະຕິບັດວຽກງານດັ່ງກ່າວ ດ້ວຍຄວາມເປັນເຈົ້າການ ແລະ ຮັບຜິດຊອບສູງ ຕໍ່ສ່ວນລວມ ກໍຄືປະເທດຊາດ; ສຸມໃສ່ຄຸ້ມຄອງ ແລະ ຊຸກຍູ້ ການຈັດເກັບລາຍຮັບເຂົ້າງົບປະມານ ຢູ່ຫົວໜ່ວຍຕ່າງໆ, ຈຳກັດຊ່ອງຫວ່າງການຮົ່ວໄຫຼ ແລະ ນຳໃຊ້ເຄື່ອງມືທັນສະໄໝເປັນກ້າວໆ; ໃຫ້ຄົ້ນຄວ້າ, ວິເຄາະ-ວິໄຈ, ຖອດຖອນບົດຮຽນ ທີ່ພາໃຫ້ແຂວງສາມາດເກັບລາຍຮັບໄດ້ເກີນແຜນ ເພື່ອສືບຕໍ່ໃຫ້ໄດ້ຮັບຜົນຫຼາຍຂຶ້ນກວ່າເກົ່າ; ເພີ່ມການນຳໃຊ້ທ່າແຮງ ຈາກບັນດາໂຄງການລົງທຶນ ຢູ່ພາຍໃນແຂວງ ໃຫ້ມີສ່ວນຮ່ວມໃນການພັດທະນາທ້ອງຖິ່ນ ໂດຍສະເພາະ ດ້ານໂຄງລ່າງພື້ນຖານ, ການສ້າງວຽກເຮັດງານທຳ ໃຫ້ຫຼາຍຂຶ້ນ ແນໃສ່ປັບປຸງຊີວິດການເປັນຢູ່ ຂອງປະຊາຊົນ ໃຫ້ດີຂຶ້ນກວ່າເກົ່າ; ສືບຕໍ່ຊຸກຍູ້ສົ່ງເສີມປະຊາຊົນ ທຳການຜະລິດ ເພື່ອຮັບໃຊ້ພາຍໃນ ແລະ ເປັນສິນຄ້າ ໃຫ້ເປັນຂະບວນກວ້າງຂວາງ ທັງໄດ້ປະລິມານ ແລະ ຄຸນນະພາບ ໂດຍສະເພາະ ສິນຄ້າທີ່ທ້ອງຖິ່ນມີທ່າແຮງ; ຊຸກຍູ້ສົ່ງເສີມປະຊາຊົນ ນຳໃຊ້ຜະລິດຕະພັນພາຍໃນໃຫ້ຫຼາຍຂຶ້ນ ເພື່ອຫຼຸດຜ່ອນການນຳເຂົ້າ ໄປຄຽງຄູ່ກັບການປະຕິບັດບັນດາມາດຕະການປະຢັດມັດທະຍັດ ເພື່ອພ້ອມກັນຜ່ານຜ່າຄວາມຫຍຸ້ງຍາກຕ່າງໆ.

ການເຮັດວຽກຢູ່ແຂວງໄຊສົມບູນ ຄັ້ງນີ້, ຄະນະຂອງທ່ານ ລັດຖະມົນຕີກະຊວງການເງິນ ຍັງໄດ້ໄປຢ້ຽມຢາມໂຄງການຂຸດຄົ້ນແຮ່ເຫຼັກ ຂອງບໍລິສັດ ເອທີໂອໂຕ ມາຍນິງ ຈຳກັດ ແລະ ໂຄງການຂຸດຄົ້ນແຮ່ເຫຼັກຂອງບໍລິສັດ ແຮ່ເຫຼັກ ໂກເອໂກ ຈຳກັດຜູ້ດຽວ ຢູ່ເມືອງລ້ອງແຈ້ງ ເພື່ອຕິດຕາມ, ຊຸກຍູ້, ຄຸ້ມຄອງການຈັດຕັ້ງປະຕິບັດໂຄງການ ໃຫ້ມີປະສິດທິພາບ ແລະ ປະສິດທິຜົນ ໂດຍສະເພາະ ການປະຕິບັດພັນທະຕ່າງໆ ແລະ ການເຄື່ອນໄຫວກິດຈະການຂອງໂຄງການ ໃຫ້ສອດຄ່ອງຕາມກົດໝາຍ, ລະບຽບການ ແລະ ສັນຍາທີ່ກຳນົດໄວ້. ນອກນັ້ນ ຍັງໄດ້ໄປຢ້ຽມຢາມສະຖານທີ່ທ່ອງທ່ຽວ ຖໍ້າເຈົ້າອະນຸວົງ ແລະ ຫໍຫຼັກເມືອງ ຕື່ມອີກ.

ຂ່າວ ແລະ ພາບ: ກົມປະຊາສຳພັນ ຫສນຍ