ຜັນຂະຫຍາຍ ວຽກງານຕ້ານ ແລະ ສະກັດກັ້ນ ອາຊະຍາກຳສັດປ່າ

ອົງການໄອຍະການປະຊາຊົນສູງສຸດ ຮ່ວມກັບ ອົງການອະນຸລັກສັດປ່າ ປະຈໍາ ສປປ ລາວ ຈັດກອງປະຊຸມວຽກງານຕ້ານ ແລະ ສະກັດກັ້ນ ອາຊະຍາກຳສັດປ່າ ໃນລະຫວ່າງ ວັນທີ 5-7 ທັນວາ 2023 ຢູ່ແຂວງສາລະວັນ ໂດຍການເປັນປະທານຂອງ ທ່ານ ນາງ ພອນເພັດ ອຸ່ນແກ້ວ ຮອງຫົວໜ້າອົງການໄອຍະການປະຊາຊົນສູງສຸດ, ທ່ານ ນາງ ມະໂນລີ ສີສະຫວັນ ຮອງຫົວໜ້າອົງການອະນຸລັກສັດປ່າປະຈຳ ສປປ ລາວ (WCS),

ທ່ານ ນາງ ມະໂນລີ ສີສະຫວັນ ໃຫ້ຮູ້ວ່າ: ກອງປະຊຸມຄັ້ງນີ້, ເປັນການຈັດຕັ້ງຜັນຂະຫຍາຍກົດໝາຍ ແລະ ບັນດານິຕິກໍາລຸ່ມກົດໝາຍ ເຂົ້າໃນການເຄື່ອນໄຫວດໍາເນີນຄະດີອາຊະຍາກໍາສັດປ່າໃນ ສປປ ລາວ ໃຫ້ໄດ້ຮັບການຈັດຕັ້ງປະຕິບັດຕົວຈິງ ຢ່າງມີປະສິດທິພາບສູງ ເຮັດຜູ້ເຂົ້າຮ່ວມກອງປະຊຸມ ມີຄວາມຮັບຮູ້, ມີຄວາມເຂົ້າໃຈຢ່າງເລິກເຊິ່ງ ກ່ຽວກັບອາຊະຍາກໍາສັດປ່າທີ່ເກີດຂຶ້ນໃນລະດັບພາກພື້ນ ແລະ ສາກົນ, ທັງເປັນການຍົກລະດັບຂີດຄວາມສາມາດ ຂອງພະນັກງານວິຊາການ ເພື່ອເປັນບ່ອນອີງໃຫ້ແກ່ເຈົ້າໜ້າທີ່ກ່ຽວຂ້ອງໃນການຈັດຕັ້ງປະຕິບັດວຽກງານການດໍາເນີນຄະດີອາຊະຍາກໍາສັດປ່າ ໃນ ສປປ ລາວ ໃຫ້ມີຄວາມເປັນເອກະພາບ, ມີປະສິດທິພາບ ແລະ ມີປະສິດທິຜົນ. ພ້ອມນີ້, ກອງປະຊຸມໄດ້ຮັບຟັງການບັນຍາຍກ່ຽວກັບ ຄວາມຮູ້ພື້ນຖານກ່ຽວກັບອາຊະຍາກຳສັດປ່າໃນລະດັບສາກົນ, ບັນດາສົນທິສັນຍາພາກພື້ນ ແລະ ສາກົນ, ບັນດາກົດໝາຍ ແລະ ນິຕິກຳທີ່ກ່ຽວຂ້ອງທັງພາຍໃນ ແລະ ຕ່າງປະເທດ; ການດໍາເນີນຄະດີອາຊະຍາກຳສັດປ່າຂອງເຈົ້າໜ້າທີ່ຕຳຫລວດ, ເຈົ້າໜ້າທີ່ພາສີ ແລະ ເຈົ້າໜ້າທີ່ປ່າໄມ້ ກ່ຽວກັບການດຳເນີນຄະດີອາຊະຍາກຳສັດປ່າໃນໄລຍະຜ່ານມາ; ການຕິດຕາມກວດກາການດໍາເນີນຄະດີອາຊະຍາກຳສັດປ່າ ຂອງອົງການໄອຍະການປະຊາຊົນ; ພິເສດ ອົງການໄອຍະການປະຊາຊົນສູງສຸດ ແລະ ອົງການອະນຸລັກສັດປ່າ ປະຈໍາ ສປປ ລາວ ເຫັນໄດ້ຄວາມສໍາຄັນ ຂອງການສ້າງເອກະສານທາງການ ແລະ ວຽກງານພິທີການ ເປັນຕົ້ນ ການຮ່າງເອກະສານພາຍໃນຫ້ອງການຕົນເອງ ຫລື ສົ່ງໄປຫາຂະແໜງການອື່ນທີ່ກ່ຽວຂ້ອງ ລວມທັງການຕ້ອນຮັບແຂກ, ການກະກຽມກອງປະຊຸມ ແລະ ອື່ນໆ.

ໂອກາດນີ້, ປະທານກອງປະຊຸມໄດ້ສະແດງຄວາມຍ້ອງຍໍຊົມເຊີຍຕໍ່ ອົງການອະນຸລັກສັດປ່າ ປະຈໍາ ສປປ ລາວ ທີ່ໄດ້ໃຫ້ການສະໜັບສະໜູນຈັດກອງປະຊຸມໃນຄັ້ງນີ້ ແລະ ເນັ້ນໃຫ້ຜູ້ຮ່ວມກອງປະຊຸມພ້ອມກັນຄົ້ນຄວ້າ, ປຶກສາຫາລື, ສົນທະນາແລກປ່ຽນບົດຮຽນ ເຊິ່ງກັນ ແລະ ກັນ ເພື່ອຍາດແຍ່ງໃຫ້ໄດ້ຄວາມຮູ້ ແລະ ບົດຮຽນໃຫ້ໄດ້ຫລາຍທີ່ສຸດ ໂດຍເຊື່ອໝັ້ນວ່າ ຜົນສໍາເລັດກອງປະຊຸມນີ້, ຈະປະກອບສ່ວນອັນສໍາຄັນໃນການຕ້ານ ແລະ ສະກັດກັ້ນອາຊະຍາກໍາ ໂດຍສະເພາະວຽກງານຕ້ານ ແລະ ສະກັດກັ້ນ ອາຊະຍາກຳສັດປ່າ ເພື່ອນໍາເອົາຄວາມຮູ້ ແລະ ປະສົບປະການດັ່ງກ່າວ ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງ ກໍຄື ໜ້າທີ່ວິຊາສະເພາະເຂົ້າສູ່ລວງເລິກເປັນກ້າວໆ.