ແຂວງຄໍາມ່ວນ ກຽມເປີດແຫລ່ງທ່ອງທ່ຽວໃໝ່ 2 ແຫ່ງ ເພື່ອດຶງດູດນັກທ່ອງທ່ຽວ ແລະ ສ້າງລາຍຮັບໃຫ້ປະຊາຊົນໃນປີທ່ອງທ່ຽວລາວ 2024
ແຂວງຄໍາມ່ວນ ເລັ່ງສຸມໃສ່ພັດທະນາ ແລະ ປັບປຸງສະຖານທີ່ທ່ອງທ່ຽວທັງລະດັບຊາດ ແລະ ລະດັບແຂວງ ເພື່ອຮອງຮັບການເປີດປີທ່ອງທ່ຽວປີ 2024, ຂະນະດຽວກັນກຽມເປີດແຫລ່ງທ່ອງທ່ຽວໃໝ່ 2 ແຫ່ງຄື: ຂຸນກອງແລງ ເມືອງຫີນບູນ ແລະ ຕາດຊຽງລື ເມືອງບົວລະພາ.
ທ່ານ ສົມສັກດາ ແກ້ວມະນີ ຮອງຫົວໜ້າພະແນກຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ ແຂວງຄໍາມ່ວນ ໃຫ້ຮູ້ວ່າ: ປັດຈຸບັນທົ່ວແຂວງມີແຫລ່ງທ່ອງທ່ຽວທັງໝົດ 209 ແຫ່ງ, ໃນນັ້ນເປັນແຫລ່ງທ່ອງທ່ຽວທາງດ້ານທໍາມະຊາດ 145 ແຫ່ງ; ແຫລ່ງທ່ອງທ່ຽວທາງດ້ານວັດທະນາທໍາ 33 ແຫ່ງ ແລະ ແຫລ່ງທ່ອງທ່ຽວທາງດ້ານປະຫວັດສາດ 31 ແຫ່ງ; ເປີດໃຊ້ບໍລິການແລ້ວ 87 ແຫ່ງ; ທົ່ວແຂວງມີໂຮງແຮມ 26 ແຫ່ງ; ລີສອດ 9 ແຫ່ງ, ເຮືອນພັກ 93 ແຫ່ງ; ຮ້ານອາຫານ 103 ແຫ່ງ; ຮ້ານກິນດື່ມບັນເທິງ 63 ແຫ່ງ ແລະ ສະຖານທີ່ທ່ອງທ່ຽວທີ່ໄດ້ຮັບການພັດທະນາແລ້ວ 23 ແຫ່ງ.
ສໍາລັບແຫລ່ງທ່ອງທ່ຽວທີ່ໂດດເດັ່ນຂອງແຂວງປະກອບມີ: ພະທາດສີໂຄດຕະບອງ; ຖໍ້າກອງລໍ, ຖໍ້ານໍ້າລອດເຊບັ້ງໄຟ, ຂຸນກອງແລງ, ຈຸດປິນຜາ, ກໍາແພງຫີນ, ທ່າຝຣັ່ງ, ເສັ້ນທາງໂຮ່ຈີ່ມິນ ແລະ ອື່ນໆ. 2 ປີຜ່ານມາມີນັກທ່ອງທ່ຽວເຂົ້າມາແຂວງຄໍາມ່ວນທັງໝົດ 5 ແສນນກວ່າຄົນ; ນັກທ່ອງທ່ຽວພາຍໃນ 4 ແສນກວ່າຄົນ, ນັກທ່ອງທ່ຽວຕ່າງປະເທດ 1 ແສນກວ່າຄົນ; ສາມາດສ້າງລາວຮັບໄດ້ 300 ກວ່າຕື້ກີບ.
ຂ່າວ: ແຂວງຄຳມ່ວນ
