ປະກາດການແຕ່ງຕັ້ງປະທານ, ຮອງປະທານ, ຜູ້ປະຈໍາການ ແລະ ກໍາມະການ ຄະນະກໍາມະການ ປກຊ-ປກສ ແຂວງຫົວພັນ

ທ່ານ ພັນເອກ ຄໍາເມືອງ ໂຄດວົງຄຸນ ກໍາມະການພັກແຂວງ ຫົວໜ້າການທະຫານ ກອງບັນຊາການທະຫານແຂວງຫົວພັນ ໄດ້ຂຶ້ນລາຍງານໂດຍຫຍໍຂອງຄະນະກໍາມະການ ປກຊ-ປກສ ແຂວງຫົວພັນ ໃນໄລຍະ 6 ເດືອນທ້າຍປີ 2023 ຜ່ານມາ, ຄະນະກຳມະການ ປກຊ-ປກສ ແຂວງ ໄດ້ເອົາໃຈໃສ່ຊີ້ນຳກຳລັງ ປກຊ-ປກສ ຫັນລົງກໍ່ສ້າງຮາກຖານການ ເມືອງ ສົມທົບກັບການພັດທະນາຊົນນະບົດຢ່າງແຂງແຮງ ໂດຍຖື ເອົາການສຶກ ສາອົບຮົມການເມືອງ-ນໍາພາແນວຄິດເປັນກົກ, ເອົາການພັດທະນາເສດຖະກິດ, ວັດທະນະທຳ-ສັງຄົມເປັນໃຈກາງ, ເອົາການເຄື່ອນໄຫວ ແລະ ມາດຕະການດ້ານກົດໝາຍເປັນການສົມທົບຄຸ້ມຄອງ, ສະກັດກັ້ນແກ້ໄຂບັນດາປະກົດການຫຍໍ້ທໍ້ຕ່າງໆ.

ໃນ 6 ເດືອນຜ່ານມາ, ພວກເຮົາໄດ້ປະກາດຮັບຮອງບ້ານປ້ອງກັນຄວາມສະຫງົບໄດ້ 46 ບ້ານ, ບ້ານປອດຢາເສບຕິດ 18 ບ້ານ ແລະ ສ້າງບ້ານປ້ອງກັນຊາດເຂັ້ມແຂງ 32 ບ້ານ, ອົບຮົມເປົ້າໝາຍ 3 ໄດ້ 1 ຊຸດ. ພ້ອມນັ້ນ, ໄດ້ເອົາໃຈໃສ່ສະກັດກັ້ນບັນດາປາ ກົດການຫຍໍ້ທໍ້ຕ່າງໃນສັງຄົມ ແຕ່ຍັງມີປະກົດການເກີດຂຶ້ນເຊິ່ງສະແດງອອກຄື: ມີຄະດີອາຍາເກີດຂຶ້ນ 21 ລາຍ, ຜູ້ຖືກຫາ 24 ຄົນ, ຄະດີຢາເສບຕິດເກີດຂຶ້ນ 70 ເລື່ອງ, ຜູ້ຖືກຫາ 89 ຄົນ, ຢຶດຂອງກາງຢາເສບຕິດປະເພດຕ່າງໆ ໄດ້ຄື: ຢາບ້າ 31.191 ເມັດ, ຢາຝິ່ນ 5,92 ກຼາມ, ເຮໂຣອິນ 326,96 ກຼາມ ແລະ ຢຶດເຄື່ອງຂອງອື່ນໆ ອີກຈໍານວນໜຶ່ງ ແລະ ມີອຸບັດຕິເຫດເກີດຂຶ້ນຕາມທ້ອງຖະໜົນ ທັງໝົດ 4 ຄັ້ງ, ພາຫະນະເປ່ເພ 4 ຄັນ, ມີຜູ້ໄດ້ຮັບບາດເຈັບ 3 ຄົນ ລວມມູນຄ່າເສຍຫາຍ 190 ລ້ານກີບ. ນອກນັ້ນ, ແຂວງຫົວພັນ ຍັງຖືກຜົນກະທົບໄພພີບັດມີ 4 ເມືອງ, ສະເລ່ຍຜົນເສຍຫາຍປະມານ 40 ຕື້ກວ່າກີບ ພ້ອມທັງນໍາໃຊ້ກໍາລັງເຈົ້າໜ້າທີ່ ເຂົ້າຊ່ວຍກອບກູ້ຈໍານວນ 205 ສະຫາຍ.

ນອກນັ້ນ, ຄະນະກຳມະການ ປກຊ-ປກສ ແຂວງ ໄດ້ຊີ້ນໍາ-ນໍາພາດຳເນີນກອງປະຊຸມໃຫຍ່ ຂັ້ນໜ່ວຍພັກ ແລະ ຮາກຖານພັກສຳເລັດຕາມແຜນການ, ຄະກຳມະການ ປກຊ-ປກສ ແຂວງ ໄດ້ຖືສຳຄັນຕໍ່ວຽກງານສຶກສາອົບຮົມການເມືອງ-ນໍາພາແນວຄິດຜ່ານມາພວກເຮົາໄດ້ເອົາໃຈໃສ່ຊີ້ນໍາ-ນໍາພາວຽກງານອົບຮົມ, ຫັດແອບ, ບຳລຸງກໍ່ສ້າງກຳລັງ ປກຊ-ປກສ ໃຫ້ມີຄວາມຮູ້, ຄວາມສາມາດພຽງພໍ, ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ. ໃນປີຜ່ານມາກຳລັງ ປກຊ-ປກສ ໄດ້ເຝິກອົບຮົມ ຍົກລະດັບຄວາມຮູ້ ຄວາມສາມາດຂອງພະນັກງານ, ນັກຮົບໃນກຳລັງປະກອບອາວຸດໃຫ້ສາມາດນໍາພາ-ບັນຊາ ແລະ ເຮັດໜ້າທີ່ການເມືອງທີ່ໄດ້ຮັບການມອບໝາຍ.

ໃນພິທີ, ທ່ານ ພົນຕີ ປອ ສະຫວ່າງໄຊ ສິນນະວົງ ຫົວໜ້າຫ້ອງການ ຄະນະກຳມະ ການ ປກຊ-ປກສ ສູນກາງ ໄດ້ຂື້ນອ່ານມະຕິຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງປະທານ, ຮອງປະທານ, ຜູ້ປະຈໍາການ ແລະ ກໍາມະການ, ຄະນະກໍາມະການ ປກຊ-ປກສ ແຂວງຫົວພັນ ອີງຕາມມະຕິຂອງກົມການເມືອງສູນກາງພັກ ສະບັບເລກທີ 031/ກມສພ, ລົງວັນທີ 3 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ, ຄະນະເລຂາທິການສູນກາງພັກ ຕົກລົງ: ແຕ່ງຕັ້ງ ທ່ານ ຄໍາແພງ ໄຊສົມແພງ ເປັນປະທານ ຄະນະກຳມະການ ປ້ອງກັນຊາດ – ປ້ອງກັນຄວາມສະຫງົບ ແຂວງຫົວພັນ, ທ່ານ ພັນເອກ ຄຳເມືອງ ໂຄດວົງຄູນ ເປັນຮອງປະທານ, ທັງເປັນຜູ້ປະຈຳການ, ທ່ານ ພັນເອກ ເພັດສອນ ອິນສຸພັນ ເປັນຮອງປະທານ ແລະ ທ່ານ ພັນເອກ ພັນສີ ຊ່ອນມີໄຊ ເປັນກໍາມະການ.

(ພາບ: ທ່ານ ຄໍາແພງ ໄຊສົມແພງ)

ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຫລາຍບັນຫາສໍາຄັນ ເພື່ອເປັນແນວທາງແລະບ່ອນອີງໃຫ້ແກ່ຄະນະກຳມະການ ປກຊ-ປກສ ແຂວງຫົວພັນ ໃນການຈັດຕັ້ງປະຕິບັດຫນ້າທີ່ວຽກງານໃນຕໍ່ໜ້າ ເພື່ອສືບຕໍ່ປົກປັກຮັກສາເຮັດໃຫ້ສະພາບພາຍໃນທົ່ວແຂວງຫົວພັນ ມີຄວາມສະຫງົບໜັກແໜ້ນ, ການພັດທະນາເສດຖະກິດ-ສັງຄົມຂອງແຂວງມີການຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງນັບມື້ດີຂຶ້ນ.