ຈີນເລັ່ງພັດທະນາເຕັກໂນໂລຊີ 6G ເພື່ອການເຊື່ອມຕໍ່ລະດັບໂລກ

ລັດຖະບານຈີນປະກາດມາດຕະການເລັ່ງການພັດທະນາ ແລະ ການສ້າງນະວັດຕະກໍາທາງເຕັກໂນໂລຊີ 6G.

ວັນທີ 6 ທັນວາ, ສໍານັກຂ່າວຊິນຮົວລາຍງານວ່າ: ທ່ານ ຈາງວິ໋ນ ໝິງ ຮອງລັດຖະມົນຕີກະຊວງອຸດສາຫະກໍາ ແລະ ເຕັກໂນໂລຊີຂໍ້ມູນຂ່າວສານຂອງຈີນ ກ່າວວ່າ: ມີການເຮັດວຽກຮ່ວມກັບໜ່ວຍງານທີ່ກ່ຽວຂ້ອງຫລາຍແຫ່ງ ເພື່ອກໍານົດຈຸດປະສົງການພັດທະນາ, ເດີນໜ້າການວິໄຈ ແລະ ພັດທະນາທາງເຕັກໂນໂລຊີ ແລະ ສ້າງການຮ່ວມມືລະດັບໂລກ.

ຂະນະດຽວກັນ, ມີການອໍານວຍຄວາມສະດວກຕໍ່ການຈັດຕັ້ງກຸ່ມການສົ່ງເສີມໄອເອັມທີ-2030 (6G) ແລະ ຈັດສັນຄື້ນຄວາມຖີ່ 6 ກິກະເຮີດ ສໍາລັບລະບົບ 5G ແລະ 6G ເຊິ່ງເປັນສ່ວນໜຶ່ງຂອງການສະໜັບສະໜູນທາງນະໂຍບາຍ.

ນອກຈາກນັ້ນ, ຈະມີການສົ່ງເສີມຮາກຖານການນໍາໃຊ້ 6G ແລະ ສະໜັບສະໜູນການເຮັດວຽກຮ່ວມກັນລະຫວ່າງພາກສ່ວນຕ່າງໆ ເພື່ອປູກຝັງລະບົບນິເວດ 6G ທີ່ແຂງແຮງ ພ້ອມຂັບເຄື່ອນການກໍານົດມາດຕະຖານ 6G ລະດັບໂລກ.