ເລັ່ງຄົ້ນຄວ້າ ກົດໝາຍວ່າດ້ວຍອາກອນມູນຄ່າ (ອມພ) ເພື່ອໃຫ້ທັນນໍາສະເໜີໃນກອງປະຊຸມສາມັນ ຂອງສະພາແຫ່ງຊາດຊຸດທີ 7 ສະໄໝທີ IX ທີ່ຈະມາເຖິງນີ້
ວັນທີ 1 ທັນວາ 2023, ກົມສ່ວຍສາອາກອນ ກະຊວງ ການເງິນ ຮ່ວມກັບຊ່ຽວຊານທະນາຄານໂລກ ຈັດກອງປະຊຸມຄົ້ນຄວ້າ ກົດໝາຍວ່າດ້ວຍອາກອນມູນຄ່າ (ອມພ), ເປັນປະທານຂອງທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ.
ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ໄດ້ມີຄຳເຫັນວ່າ: ກອງປະຊຸມ ຄົ້ນຄວ້າດ້ານວິຊາການຄັ້ງນີ້ເປັນຜົນດີຫຼາຍສໍາລັບການປັບປຸງກົດໝາຍວ່າດ້ວຍ ອມພ, ເພາະຈະມີການນໍາເອົາມາດຕະຖານ ແລະ ບົດຮຽນທີ່ດີຂອງສາກົນ ແລະ ປະເທດໃກ້ຄຽງ, ເພື່ອນໍາມາພ້ອມກັນຄົ້ນຄວ້າປັບປຸງຢ່າງຮອບດ້ານໃຫ້ໄດ້ ລະບົບນິຕິກຳທີ່ຄົບຊຸດທັງກົດໝາຍ ອມພ ແລະ ນິຕິກຳໃຕ້ກົດໝາຍທີ່ຈະຕ້ອງໄດ້ມີການຄົ້ນຄວ້າໄປຄຽງຄູ່ກັນ, ເພື່ອອຳນວຍໃນການຈະນໍາໄປປະຕິບັດໃຫ້ໄດ້ຢ່າງມີປະສິດທິຜົນທີ່ດີ ແລະ ແກ້ໄຂບັນຫາຄ້າງຄາຕ່າງໆໄດ້, ເນື່ອງຈາກ ອມພ ແມ່ນມີສ່ວນສຳຄັນໃນການເພີ່ມລາຍຮັບໃຫ້ລັດຖະບານ, ເພື່ອແກ້ໄຂບັນຫາຄວາມຫຍຸ້ງຍາກດ້ານເສດຖະກິດ ແລະ ການເງິນຕາມວາລະແຫ່ງຊາດ.
ຈຸດປະສົງ ແລະ ເປົ້າໜາການປັບປຸງ ອມພ ເພື່ອປ່ຽນແທນການຍົກເວັ້ນ ອມພ, ເນື່ອງຈາກການຍົກເວັ້ນ ອມພ ໄດ້ກຳນົດໃນກົດໝາຍວ່າດ້ວຍສົ່ງເສີມການລົງທຶນ, ກົດໝາຍສ່ວຍສາອາກອນ, ສັນຍາສຳປະທານໄດ້ສ້າງຄວາມເສຍຫາຍຢ່າງຫຼວງຫຼາຍ, ຈຶ່ງມີຄວາມຈໍາເປັນຕ້ອງຄົ້ນຄວ້າປັບປຸງບາງກົດໝາຍໂດຍບໍ່ໃຫ້ກຳນົດການຍົກເວັ້ນ ອມພ ໃນບັນ ດາກົດໝາຍ ແລະ ນິຕິກໍາດັ່ງກ່າວ
ພ້ອມນັ້ນ, ໃນກອງປະຊຸມຄະນະຮັບຜິດຊອບຄົ້ນຄວ້າ ແລະ ປັບປຸງກົດໝາຍວ່າດ້ວຍ ອມພ ແລະ ຊ່ຽວຊານ ທະນາຄານໂລກ, ໄດ້ມີການນໍາສະເໜີໃຫ້ຮູ້ເຖິງການຈັດຕັ້ງປະຕິບັດການເກັບ ອມພ ໃນໄລຍະຜ່ານມາ; ສາເຫດທີ່ສປປ ລາວ ຈັດເກັບຍັງບໍ່ໄດ້ດີ ແລະ ບັນຫາຄ້າງຄາ; ແຜນງານປັບປຸງກົນໄກ ອມພ ທີ່ຈະເລີ່ມປະຕິບັດ 2024 ແລະ 2025, ຂັ້ນຕອນດຳເນີນການປັບປຸງກົດໝາຍ ແລະ ບັນຫາອື່ນໆທີ່ຕິດພັນ,ພ້ອມທັງມີການແລກປ່ຽນຄຳຄິດເຫັນຂອງຜູ້ເຂົ້າຮ່ວມ ກອງປະຊຸມ, ເພື່ອເຮັດໃຫ້ການປັບປຸງກົດໝາຍດັ່ງກ່າວໄດ້ຮັບຜົນສຳເລັດຕາມລະດັບຄາດໝາຍ, ປັດຈຸບັນກະຊວງການເງິນໄດ້ສະເໜີເປັນແຜນເລັ່ງດ່ວນໃນການປັບປຸງກົດໝາຍວ່າດ້ວຍ ອມພ ເພື່ອໃຫ້ທັນນໍາສະເໜີເຂົ້າໃນກອງປະຊຸມ ສາມັນ ຂອງສະພາແຫ່ງຊາດຊຸດທີ 7 ສະໄໝທີ IX ໃນເດືອນມິຖຸນາ 2024 ທີ່ຈະມາເຖິງນີ້.
