ລົງນາມສ້າງກົນໄກປະສານງານ ລະຫວ່າງສະພາແຫ່ງຊາດ ແລະ ກະຊວງສາທາລະນະສຸກ

ວັນທີ 29 ພະຈິກ 2023, ພິທີລົງນາມຂໍ້ຕົກລົງຮ່ວມວ່າດ້ວຍການປະສານງານລະຫວ່າງກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ກະຊວງສາທາລະນະສຸກ ໂດຍການ ຮ່ວມລົງນາມຄັ້ງນີ້ມີ ທ່ານ ຄຳໃບ ດຳລັດ ຄະນະປະຈຳສະພາແຫ່ງຊາດ ຮອງປະທານສະພາແຫ່ງຊາດ, ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ

ເພື່ອເປັນການຂັບເຄື່ອນ ແລະ ອຳນວຍຄວາມສະດວກໃຫ້ແກ່ບັນດາວຽກງານດ້ານຕ່າງໆທີ່ເປັນບຸລິມະສິດຂອງລັດຖະບານ. ເວົ້າລວມ, ເວົ້າສະເພາະວຽກງານຂອງຂະແໜງສາທາລະນະສຸກ ຊຶ່ງໄດ້ກຳນົດຫຼັກການ, ລະບຽບການ, ເນື້ອໃນ, ຮູບແບບ, ວິທີການ, ຂັ້ນຕອນປະສານງານລະຫວ່າງ ກຳມາທິການວັດທະນະທຳ-ສັງຄົມ ສະພາແຫ່ງຊາດກັບກະຊວງສາທາລະນະສຸກ ໃນການເປັນໃຈກາງປະສານງານເພື່ອອຳນວຍຄວາມສະດວກ ໃຫ້ແກ່ການເຄື່ອນໄຫວວຽກງານຂອງສະພາແຫ່ງຊາດ ແລະ ລັດຖະບານຕາມພາລະບົດບາດ, ໜ້າທີ່ ແລະ ຂອບເຂດສິດຂອງຕົນ ແນໃສ່ຮັບປະກັນການເປັນເສນາທິການທີ່ດີໃຫ້ແກ່ຄະນະປະຈຳສະພາແຫ່ງຊາດ ແລະ ຄະນະລັດຖະບານ ໃນການປະຕິບັດໜ້າທີ່ໃຫ້ມີປະສິດທິພາບ, ວ່ອງໄວ ແລະ ທັນເວລາ.