ໂອເປັກພລັສ ຫລຸດການຜະລິດ-ສົ່ງອອກນໍ້າມັນອີກ ສ່ວນປະເທດບາຣຊິວກຽມເຂົ້າເປັນສະມາຊິກໃໝ່
ສະມາຊິກໃໝ່ຂອງໂອເປັກພລັສ ນໍາໂດຍຊາອຸດິອາຣະບີ ແລະ ຣັດເຊຍ ກຽມຫລຸດການຜະລິດ ແລະ ການສົ່ງອອກນໍ້າມັນອີກ, ສ່ວນບາຣຊິວກຽມເຂົ້າເປັນສະມາຊິກໃໝ່.
ວັນທີ 1 ທັນວາ, ສໍານັກຂ່າວຕ່າງປະເທດລາຍງານວ່າ: ໂອເປັກພລັສ ເຊິ່ງເປັນການລວມກັນລະຫວ່າງກຸ່ມປະເທດນອກອົງການກຸ່ມປະເທດຜູ້ສົ່ງນໍ້າມັນອອກ (ໂອເປັກ) ຈໍານວນ 10 ປະເທດ ກັບສະມາຊິກໂອເປັກດັ້ງເດີມ 13 ປະເທດ ມີມະຕິຮ່ວມກັນໃນກອງປະຊຸມຢູ່ນະຄອນຫລວງວຽນນາວ່າ: ສະມາຊິກບາງປະເທດຈະຂະຫຍາຍໄລຍະເວລາຫລຸດການຜະລິດໂດຍສະໝັກໃຈອອກໄປຈົນຮອດເດືອນມີນາ 2024.
ຕະຫລອດໄລຍະເວລາດັ່ງກ່າວ, ຊາອຸດິອາຣະບີຈະຫລຸດເພດານການຜະລິດວັນລະ 1 ລ້ານບາເຣລ ເຫລືອວັນລະ 9 ລ້ານບາເຣນ ແລະ ຣັດເຊຍຈະຫລຸດການສົ່ງອອກນໍ້າມັນອີກ ຈາກວັນລະ 300.000 ບາເຣລ ເພີ່ມເປັນວັນລະ 500.000 ບາເຣລ.
ຂະນະທີ່ອີຣັກ, ສະຫະລັດອາຣັບເອມິເຣດ (UAE), ກູເວດ, ກາຊັກສະຖານ, ແອລຈີເຣຍ ແລະ ໂອມານ ປະກາດການປັບຫລຸດເພດານການຜະລິດເຊັ່ນກັນ.
ທັງນີ້, ມີລາຍງານວ່າ: ກອງປະຊຸມໂອເປັກພລັສຄັ້ງນີ້ເລື່ອນມາຈາກວັນທີ 26 ພະຈິກຜ່ານມາ ເນື່ອງຈາກຊາອຸດິອາຣະບີຕ້ອງການໃຫ້ສະມາຊິກຈາກອາຟຣິກາ ຮ່ວມຕໍ່ເວລາຫລຸດການຜະລິດອີກ, ແຕ່ຫລາຍປະເທດ ລວມທັງໄນຈີເຣຍ ແລະ ແອງໂກລາ ລັງເລທີ່ຈະຮ່ວມມື ເນື່ອງຈາກຕ້ອງການລາຍໄດ້ເພີ່ມຂຶ້ນເພື່ອຂັບເຄື່ອນເສດຖະກິດຂອງປະເທດ ຫລັງເຂົ້າຮ່ວມແລ້ວໃນຮອບເດືອນມິຖຸນາຜ່ານມາ.
ນອກຈາກນີ້, ໂອເປັກພລັສມີມະຕິເຊີນບາຣຊິວໃຫ້ເຂົ້າຮ່ວມເປັນສະມາຊິກໃໝ່ ໂດຍຈະມີຜົນນັບແຕ່ວັນທີ 1 ມັງກອນ 2024. ກະຊວງພະລັງງານຂອງບາຣຊິວອອກຖະແຫລງການສະແດງຄວາມຍິນດີ, ແຕ່ລະບຸວ່າ: ຂໍສຶກສາເນື້ອໃນຂອງຂໍ້ຕົກລົງອີກໄລຍະໜຶ່ງ.
ປັດຈຸບັນ, ບາຣຊິວຢູ່ໃນກຸ່ມຜູ້ຜະລິດນໍ້າມັນລາຍໃຫຍ່ທີ່ສຸດ 10 ອັນດັບທໍາອິດຂອງໂລກ ແລະ ເປັນຜູ້ຜະລິດນໍ້າມັນລາຍໃຫຍ່ທີ່ສຸດຂອງອາເມລິກາລາຕິນ ນັບແຕ່ປີ 2019 ຈາກສະຖິຕິການຜະລິດສູງເຖິງວັນລະ 3,7 ລ້ານບາເຣລ ໃນເດືອນກັນຍາຜ່ານມາ ເພີ່ມຂຶ້ນເກືອບ 17% ເມື່ອທຽບໃສ່ໄລຍະເວລາດຽວກັນຂອງປີຜ່ານມາ.
