ຄະນະນຳນະຄອນຫລວງ ວາງກະຕ່າດອກໄມ້ຮູບຫລໍ່ປະທານ ໄກສອນ ພົມວິຫານ ເພື່ອລະນຶກເຖິງຄວາມກະຕັນຍູຮູ້ບຸນຄຸນ

ໃນໂອກາດ ວັນຊາດທີ 2 ທັນວາ ຄົບຮອບ 48 ປີ ແລະ ວັນຄ້າຍວັນເກີດຂອງປະທານໄກສອນພົມວິຫານ ຄົບຮອບ 103 ປີ, ໃນວັນທີ 1 ທັນວາ 2023ນີ້, ທ່ານ ອານຸພາບ ຕຸນາລົມ ເລຂາທິການສູນກາງພັກ, ເລຂາຄະນະພັກ, ປະທານສະພາປະຊາຊົນນະຄອນຫລວງວຽງຈັນ ພ້ອມດ້ວຍຄະນະເຂົ້າວາງກະຕ່າດອກໄມ້ຕໍ່ໜ້າຮູບຫລໍ່ ປະທານໄກສອນ ພົມວິຫານ ຢູ່ສຳນັກງານປົກຄອງ ນວ.

ນີ້ເພື່ອລະນຶກຂ່ຳນັບຮັບຕ້ອນ ແລະ ສະເຫລີມສະຫລອງ 2 ວັນປະຫວັດສາດດັ່ງກ່າວ ທັງສະແດງຄວາມເຄົາລົບຮັກ, ກະຕັນຍູຮູ້ບຸນຄຸນ ແລະ ລະນຶກເຖິງປະທານໄກສອນ ພົມວິຫານ ຜູ້ນໍາທີ່ດີເດັ່ນ ແລະ ເຄົາລົບຮັກຂອງພັກ-ລັດ ແລະ ປວງຊົນລາວທັງຊາດ ຕະຫລອດໄລຍະເຄິ່ງສະຕະວັດ ທີ່ປະທານໄກສອນ ພົມວິຫານ ໄດ້ອຸທິດສະຕິບັນຍາເຫື່ອແຮງເຂົ້າໃນພາລະກິດຕໍ່ສູ້ປົດປ່ອຍຊາດກໍຄື ພາລະກິດປົກປັກຮັກສາ ແລະ ສ້າງສາປະເທດຊາດ, ນໍາພາການປະຕິວັດຂອງປະຊາຊົນລາວເຮົາກ້າວຂຶ້ນຈາກໄຊຊະນະນີ້ສູ່ໄຊຊະນະໃໝ່ທີ່ຍິ່ງໃຫຍ່ ຈົນສາມາດປົດປ່ອຍປະເທດຊາດ ແລະ ສະຖາປານາ ສປປ ລາວຕໍ່ໂລກຢ່າງສະຫງ່າຜ່າເຜີຍ.