ເຊື່ອມຕໍ່ອິນເຕີເນັດສາທາລະນະລະວັງຖືກຄົ້ນຂໍ້ມູນ
ຜູ້ໃຊ້ iOS ດັ່ງ iPhone ແລະ iPad ຕ້ອງລະວັງກັນຫລາຍຂຶ້ນ ເມື່ອໃນການປະຊຸມ RSA Security Conference ເມື່ອບໍ່ດົນມານີ້ໄດ້ເປີດເຜີຍຊ່ອງທາງທີ່ຈະຊ່ວຍໃຫ້ບັນດານັກລັກຄົ້ນຂໍ້ມູນ ຫລື ແຮັກເກີ ເຂົ້າໂຈມຕີຜູ້ໃຊ້ອຸປະກອນ iOS ໄດ້ງ່າຍຂຶ້ນ ຜ່ານທາງ Wi-Fi hotspot.
ໂດຍຊ່ອງທາງດ້ານຄວາມປອດໄພນີ້ພົບຢູ່ເທິງ iOS 8 ໂດຍການປ່ຽນແປງໂຕ SSL certificate ເຊິ່ງເປັນເຄື່ອງໝາຍຮັບ ຮອງຄວາມປອດໄພເທິງອີເລັກໂຕຣນິກ ທີ່ເປັນມາດຕະຖານທີ່ຖືກໃຊ້ກັບແອັບພລິເຄເຊິນ ແລະ ເປັນສາເຫດເຮັດໃຫ້ເຄື່ອງຈັດລະບຽບຂໍ້ມູນໃໝ່ຢ່າງຕໍ່ເນື່ອງ ແລະ ບໍ່ສາມາດເຂົ້າໃຊ້ງານໄດ້ອີກຕໍ່ໄປ.
ສຳລັບຊ່ອງທາງດັ່ງກ່າວນີ້ບັນດານັກລັກຄົ້ນຂໍ້ມູນຈະອາໄສ Wi-Fi hotspot ທີ່ສາມາດເຂົ້າເຖິງໄດ້ທົ່ວໄປເປັນໂຕໂຈມຕີ. ສະນັ້ນ ຜູ້ທີ່ໃຊ້ iOS ທີ່ເຊື່ອມຕໍ່ Wi-Fi ສາທາລະນະ ເທົ່ານີ້ກໍມີສິດທີ່ຈະຖືກໂຈມຕີໄດ້. ສະນັ້ນ ທາງປ້ອງກັນທີ່ດີສຸດສຳລັບການເຊື່ອມຕໍ່ Wi-Fi ກໍແມ່ນໃຊ້ Wi-Fi ຢູ່ເຮືອນ, ແຕ່ຖ້າຫາກຕ້ອງໄປນອກສະຖານທີ່ກໍໃຫ້ເຊື່ອມຕໍ່ອິນເຕີເນັດ ໂດຍໃຊ້ເຄືອຂ່າຍມືຖືຈະດີກ່ວາ.
ແນວໃດກໍຕາມ, ຍັງຖືວ່າເປັນຂ່າວດີທີ່ກຸ່ມນັກວິໄຈຄວາມປອດໄພຍັງບໍ່ພົບວ່າມີອຸປະກອນ iOS ໃດໆໄດ້ຮັບຄວາມເສຍຫາຍຈາກຊ່ອງທາງນີ້, ແຕ່ຄາດວ່າໃນອະນາຄົດຈະມີແນ່ນອນ. ສ່ວນ iOS 9 ທີ່ຈະເປີດໂຕໃນໄລຍະກາງປີນີ້ໜ້າຈະປິດກັ້ນຊ່ອງທາງດັ່ງກ່າວນີ້ນຳເຊັ່ນດຽວກັນ.
