ການຕິດຕາມກວດກາ ການສໍ້ລາດບັງຫຼວງແມ່ນພາລະກິດຂອງພັກກອມມູນິດ ຫວຽດນາມ

ພັກກອມມູນິດຫວຽດນາມ ເປັນອົງການຈັດຕັ້ງທີ່ໜັກແໜ້ນ, ມີຄວາມເປັນເອກະພາບສູງ ຍາມໃດກໍຢຶດໝັ້ນ ຖືເອົາການຕິດຕາມ ກວດກາ ຕ້ານສະກັດກັ້ນການສໍ້ລາດບັງຫຼວງ ປະກົດການຫຍໍ້ທໍ້ ແມ່ນພາລະກິດອັນສໍາຄັນ ຄຽງຄູ່ກັບການປະຕິບັດຕົວຈິງ. ທັງໄດ້ຢືນຢັນວ່າ: ວຽກງານກວດກາ ມີຈຸດທີ່ຕັ້ງທີ່ສໍາຄັນຍິ່ງໃນທົ່ວລະບົບການເຄື່ອນໄຫວການນໍາພາຂອງພັກ, ການນໍາພາຂອງພັກບໍ່ພຽງແຕ່ນໍາພາການສ້າງແນວທາງ, ນະໂຍບາຍ, ມະຕິຄໍາສັ່ງເທົ່ານັ້ນ ແຕ່ຍັງກວດກາການປະຕິບັດໜ້າທີ່ຂອງພະນັກງານ-ສະມາຊິກພັກຜູ້ຂາດຄວາມຮັບຜິດຊອບຢ່າງຮອບດ້ານ-ຮອບຄອບອີກດ້ວຍ.

ເລນິນ ໄດ້ຂຽນໄວ້ວ່າ: ເມື່ອແນວທາງ, ນະໂຍບາຍໄດ້ກໍານົດອອກ, ທິດທາງໄດ້ຮັບການຮັບຮອງຢ່າງເປັນເອກະພາບ, ຄວາມຮັບຜິດຊອບໃນການປະຕິບັດໜ້າທີ່ຕ້ອງຈັດຢູ່ໃນລະດັບແຖວໜ້າ. ຫັນມະຕິຄໍາສັ່ງເປັນອັນອຽດ ແລ້ວເລືອກຄົນ ເພື່ອຈັດຕັ້ງປະຕິບັດ.

ປະທານ ໂຮ່ຈິມິນ ຢືນຢັນວ່າ: ນະໂຍບາຍຖືກຕ້ອງ ແມ່ນກົກເຄົ້າຂອງໄຊຊະນະ ເມື່ອມີນະໂຍບາຍຖືກຕ້ອງ ແມ່ນຜົນສໍາເລັດ ຫຼື ບໍ່ສໍາເລັດໃນການຈັດຕັ້ງປະຕິບັດນະໂຍບາຍນັ້ນແມ່ນຍ້ອນວິທີການຈັດຕັ້ງປະຕິບັດ ຍ້ອນພະນັກງານ ແລະ ຍ້ອນການກວດກາບໍ່ເຂັ້ມງວດ.

ຖ້າຫາກສາມວຽກດັ່ງກ່າວຖືກຖືເບົາ, ຖ້ານະໂຍບາຍຖືກຕ້ອງຊໍ່າໃດ ກໍບໍ່ມີຄວາມ ໝາຍຖ້າມີການກວດກາຢ່າງຮອບຄອບ ກໍປຽບເໝືອນມີໂຄມໄຟ. ສະພາບການເກີດຂຶ້ນຄືແນວໃດ, ຈຸດດີຈຸດອ່ອນມີແນວໃດ ສາມາດເວົ້າໄດ້ວ່າ 9/10 ຈຸດອ່ອນ ໃນວຽກງານແມ່ນຍ້ອນຂາດການກວດກາ.

ຜ່ານພຶດຕິກໍາຕົວຈິງ, ພັກກອມມູນິດຫວຽດນາມ ໄດ້ຢືນຢັນວ່າ: ວຽກງານກວດກາ ແມ່ນພາກສ່ວນໜຶ່ງທີ່ສໍາຄັນໃນການກໍ່ສ້າງພັກ ທັງເປັນມາດຕະການທີ່ມີຜົນປະໂຫຍດເພື່ອແກ້ໄຂພະຍາດອາດຍາສິດ. ຕ້ານການປ່ຽນທາດອໍານາດ, ສໍ້ລາດບັງຫຼວງ ຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ.

ເພື່ອຄວມຄຸມອໍານາດ, ພັກກອມມູນິດຫວຽດນາມມີມາດຕະການຢ່າງຄົບຊຸດ. ໃນນັ້ນ ກ່ອນອື່ນໝົດແມ່ນສຸມໃສ່ບາງມາດຕະການຕົ້ນຕໍຄື:

1. ກໍ່ສ້າງພັກໃຫ້ໂປ່ງໃສ, ເຂັ້ມແຂງ ແລະ ໜັກແໜ້ນຢ່າງແທ້ຈິງ, ກໍ່ສ້າງ, ສຶກສາອົບຮົມ, ຝຶກຝົນຫຼໍ່ຫຼອມຖັນແຖວພະນັກງານ-ສະມາຊິກພັກ, ພະນັກງານນໍາພາ-ຄຸ້ມຄອງຂັ້ນຕ່າງໆໃຫ້ມີຫຼັກໝັ້ນການເມືອງ, ມີຄຸນສົມບັດ ສິນທໍາປະຕິວັດ, ມີແບບແຜນການດໍາລົງຊີວິດເປັນແບບບຢ່າງ, ມີລະດັບຄວາມຮູ້, ຄວາມສາມາດ ຕອບສະໜອງກັບຄວາມຮຽກຕ້ອງການໜ້າທີ່ການເມືອງທີ່ໄດ້ຮັບການມອບໝາຍ. ຜູ້ທີ່ມີຕໍາແໜ່ງສູງຍິ່ງເປັນແບບຢ່າງ.

2. ສ້າງລັດຄຸ້ມຄອງດ້ວຍກົດໝາຍສັງຄົມນິຍົມຢ່າງມີຜົນສັກສິດ, ປັບປຸງລະບົບກົດໝາຍ, ປັບປຸງບູລະນະຂໍ້ກໍານົດຂອງພັກ, ນະໂຍບາຍ, ລະບອບ ລະບຽບການ ຮັບໃຊ້ວຽກງານກວດກາຢ່າງມີປະສິດທິຜົນຢ່າງຄົບຊຸດ, ວິທະຍາສາດ ເພື່ອເປັນບ່ອນອີງໃນການຕິດຕາມກວດກາດການແກ້ໄຂຄະດີຢ່າງກົງໄປກົງມາ, ມີສິນລະທໍາ ບໍ່ບິດເບື່ອນ.

3. ເພີ່ມທະວີການນໍາພາ-ຊີ້ນໍາ ຕໍ່ຄະນະພັກ, ການຈັດຕັ້ງພັກຂັ້ນຕ່າງໆ ຈັດຕັ້ງປະຕິບັດວຽກງານກວດກາເປັນປະຈໍາ, ປະສານສົມທົບຢ່າງແໜ້ນແຟ້ນລະຫວ່າງຄະນະກໍາມະການກວດກາ ກັບອົງການຈັດຕັ້ງທີ່ກ່ຽວຂ້ອງ, ສ້າງເງື່ອນໄຂໃຫ້ອົງການທີ່ມີສິດອໍານາດເຮັດວຽກກວດກາ ແກ້ໄຂຄະດີການລະເມີດໄດ້ຢ່າງເຕັມທີ່ ບໍ່ມີຂອບເຂດຫວງຫ້າມ ບໍ່ມີກໍລະນີຍົກເວັ້ນ ລວມທັງຄວບຄຸມລາຍຮັບຜູ້ມີຕໍາແໜ່ງ ຊັບສິນຕ່າງໆຢ່າງຖືກຕ້ອງ ຊອກໃຫ້ເຫັນລາຍຮັບທີ່ໄດ້ມາຈາກການສໍ້ລາດບັງຫຼວງ.

4. ປ່ຽນແປງໃໝ່ການຄົ້ນຄວ້າທິດສະດີ, ອອກມະຕິ, ຄໍາສັ່ງໃຫ້ແທດເໝາະກັບສະພາບຄວາມເປັນຈິງຂອງສັງຄົມໃນແຕ່ລະໄລຍະ, ເພີ່ມທະວີການໂຄສະນາວຽກງານຕິດຕາມກວດກາ, ລະບຽບວິໄນຂອງພັກໃຫ້ເລິກເຊິ່ງເຖິງຖອງ, ຍົກສູງບົດບາດຂອງສື່ມວນຊົນເຂົ້າຮ່ວມຢ່າງຕັ້ງໜ້າ ໂຄສະນາໃຫ້ທົ່ວສັງຄົມຮັບຮູ້ເຂົ້າໃຈຈຸດທີ່ຕັ້ງ, ຄວາມໝາຍ,ບົດບາດ, ຜົນປະໂຫຍດຂອງວຽກງານກວດກາ, ອອກຂ່າວຢ່າງເປີດເຜີຍກວ້າງຂວາງບັນດາຄະດີການລະເມີດຮູບແບບການແກ້ໄຂຄະດີ ເພື່ອສຶກສາອົບຮົມບໍ່ໃຫ້ເກີດການກະທໍາສໍ້ລາດບັງຫຼວງ.

5. ສ້າງພະນັກງານຢູ່ໃນຖັນແຖວກວດກາທີ່ມີຫຼັກໝັ້ນໜັກແໜ້ນ, ມີຄຸນສົມບັດສິນທໍາປະຕິວັດ ສັດຊື່ບໍລິສຸດໂປ່ງໃສ, ມີຄວາມຮູ້ ດ້ານກົດໝາຍ ຄວາມສາມາດພຽງພໍ ເລິກເຊິ່ງ ເປັນແບບຢ່າງໃນການປະຕິບັດໜ້າທີ່ຕາມການມອບໝາຍ (ຖືອັນນີ້ເປັນກົກເຄົ້າຂອງວຽກງານກວດກາ)

ສະຫາຍ ຫງວຽນ ຝູ ຈ້ອງ ເລຂາທິການໃຫຍ່ພັກກອມມູນິດຫວຽດນາມໄດ້ເວົ້າວ່າ:ພະນັກງານກວດກາຕ້ອງມີກໍາລັງແຮງ ທັງກາຍ ແລະ ໃຈ, ທັງປ້ອງກັນ, ສະກັດກັ້ນ, ຊື່ກົງຍິ່ງກວ່າໃຜ ບໍ່ສະນັ້ນ, ຈະບໍ່ສາມາດເວົ້າໃຜໄດ້ ບໍ່ສາມາດຕິດຕາມກວດກາໃຜໄດ້ ໃຊ້ລະບຽບວິໄນຕໍ່ໃຜໄດ້.

ສະຫຼຸບໄດ້ວ່າ: ພະນັກງານ-ສະມາຊິກພັກ ບໍ່ວ່າຈະຢູ່ໃນຖານະຕໍາແໜ່ງໃດ ການຈັດຕັ້ງໃດ ຕ້ອງປະຕິບັດໜ້າທີ່ຕາມພາລະບົດບາດ, ສິດອໍານາດ, ຕາມມະຕິ, ຄໍາສັ່ງ, ຂໍ້ກໍານົດຂອງພັກ ກໍຄື ກົດໝາຍທີ່ວາງອອກ, ຝຶກຝົນຫຼໍ່ຫຼອມຕົນເອງໃຫ້ເປັນແບບຢ່າງນໍາໜ້າມີຄວາມຕື່ນຕົວ ຈົ່ງຮັກພັກດີຕໍ່ພັກຢ່າງສະເໝີຕົ້ນສະເໝີປາຍ.

ຮຽບຮຽງ: ວັນໄຊ ຕະວິນຍານ