ອິດສະລາແອນ-ຮາມັດແລກປ່ຽນຕົວປະກັນ-ນັກໂທດເພີ່ມຕື່ມ ທ່າມກາງສຽງຮຽກຮ້ອງໃຫ້ຂະຫຍາຍໄລຍະເວລາຢຸດຍິງອອກໄປອີກ
ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນ ແລະ ກຸ່ມຮາມັດຈະມີການແລກປ່ຽນຕົວປະກັນ ແລະ ປ່ອຍຕົວນັກໂທດເພີ່ມອີກໃນວັນທີ 29 ພະຈິກ ເຊິ່ງເປັນວັນສຸດທ້າຍຂອງການຢຸດຍິງຊົ່ວຄາວ ຫລັງຈາກມີການຂະຫຍາຍເວລາຢຸດຍິງມາແລ້ວ 1 ຄັ້ງເມື່ອສອງວັນກ່ອນ ທ່າມກາງສຽງຮຽກຮ້ອງຈາກປະຊາຄົມໂລກໃຫ້ຕໍ່ຂະຫຍາຍເວລາຢຸດຍິງຊົ່ວຄາວນີ້ອອກໄປອີກ ຜ່ານການຊ່ວຍເຫລືອຂອງທາງການກາຕາ ເຊິ່ງເປັນຄົນກາງສໍາຄັນໃນການເຈລະຈາລະຫວ່າງທັງສອງຝ່າຍ.
ທາງການອິດສະລາແອນລະບຸວ່າ: ການຢຸດຍິງຊົ່ວຄາວນີ້ອາດຂະຫຍາຍເວລາອອກໄປອີກໄລຍະໜຶ່ງ ຖ້າກຸ່ມຮາມັດຍັງປ່ອຍຕົວປະກັນທີ່ຄວບຄຸມໄວ້ຢ່າງໜ້ອຍ 10 ຄົນຕໍ່ວັນ, ແຕ່ເນື່ອງຈາກຕົວປະກັນເດັກນ້ອຍ ແລະ ຜູ້ຍິງເລີ່ມມີຈໍານວນໜ້ອຍລົງ ອາດມີຄວາມພະຍາຍາມໃນການເຈລະຈາຂໍປ່ອຍຕົວປະກັນຜູ້ຊາຍຊາວອິດສະລາແອນເພີ່ມອີກເປັນຄັ້ງທໍາອິດ.
ຂະນະທີ່ກຸ່ມຮາມັດຫາກໍປ່ອຍຕົວປະກັນກຸ່ມຫລ້າສຸດອີກ 12 ຄົນໃນວັນທີ 28 ພະຈິກ ເຮັດໃຫ້ຈໍານວນລວມຂອງຕົວປະກັນທີ່ໄດ້ຮັບການປ່ອຍຕົວນັບແຕ່ວັນທີ 24 ພະຈິກຜ່ານມາ ເຊິ່ງເປັນມື້ທໍາອິດທີ່ມີການຢຸດຍິງຊົ່ວຄາວ 81 ຄົນແລ້ວ ໂດຍສ່ວນຫລາຍເປັນຜູ້ຍິງ ແລະ ເດັກນ້ອຍ ລວມທັງຄົນຕ່າງປະເທດ. ຂະນະທີ່ຈໍານວນຊາວປາແລັສຕິນທີ່ໄດ້ຮັບການປ່ອຍຕົວຈາກທາງການອິດສະລາແອນມີ 180 ຄົນແລ້ວ.
ອ້າງອີງ:
- https://www.reuters.com/world/middle-east/israel-hamas-due-release-more-people-amid-efforts-extend-truce-2023-11-28/
- https://www.aljazeera.com/news/liveblog/2023/11/29/israel-hamas-war-live-more-palestinian-prisoners-israeli-captives-freed
- https://www.straitstimes.com/world/middle-east/12-more-gaza-hostages-released-as-mediators-seek-lasting-truce
