ປະດັບຫລຽນໄຊພິລະອາດຫານຊັ້ນ I ໃຫ້ການນຳແຂວງສະຫວັນນະເຂດ
ວັນທີ 28 ພະຈິກ 2023, ພິທີປະດັບຫຼຽນໄຊພິລະອາດຫານໃຫ້ແກ່ການນຳແຂວງສະຫວັນນະເຂດ ໄດ້ຈັດຂຶ້ນ ທີ່ຫ້ອງວ່າການປົກຄອງແຂວງ, ໂດຍການໃຫ້ກຽດເຂົ້າຮ່ວມເປັນປະທານປະດັບຫລຽນຂອງ ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ຮອງປະທານຜູ້ປະຈຳການຄະນະກຳມະການປ້ອງກັນຊາດ (ປກຊ)-ປ້ອງກັນຄວາມສະຫງົບ (ປກສ) ສູນກາງ, ມີທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ປະທານຄະນະກຳມະການ ປກຊ-ປກສ ແຂວງ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ (ອະດີດເຈົ້າແຂວງສະຫວັນນະເຂດ) ເຂົ້າຮ່ວມ.
ໃນພິທີໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງກຳມະການ ຄະນະກຳມະການ ປກຊ-ປກສ ແຂວງ ຊຶ່ງໄດ້ຕົກລົງແຕ່ງຕັ້ງ ພົຈ ຂັນທີ ສະໜາມອຸ່ນ ແລະ ທ່ານ ພູລຳພອນ ສີຫາວົງ ເປັນກຳມະການ, ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການມອບຫລຽນໄຊພິລະອາດຫານຊັ້ນ I ໃຫ້ແກ່ການນຳແຂວງຈຳນວນ 2 ທ່ານ ຄື: ທ່ານ ບຸນໂຈມ ອຸບົນປະເສີດ ແລະ ທ່ານ ສັນຕິພາບ ພົມວິຫານ, ຕົກລົງມອບຫຼຽນໄຊຊັ້ນ II ໃຫ້ການນຳແຂວງສະຫວັນນະເຂດຈຳນວນ 7 ທ່ານ ຄື: ທ່ານ ພູວັງ ເກດແກ້ວພົມພອນ ຮອງເລຂາພັກແຂວງ ຮອງປະທານຄະນະກຳມະການ ປກຊ-ປກສ, ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງ ປະທານສະພາສຶກສາ ປກຊ-ປກສ, ທ່ານ ແສນສັກ ສຸລິສັກ ຮອງເຈົ້າແຂວງ ຜູ້ຊີ້ນຳວຽກງານເສດຖະກິດ, ພົຈ ສົມໝາຍ ພົມມະຈັນ ຮອງປະທານຄະນະກຳມະການ ປກຊ-ປກສ ຫົວໜ້າກອງບັນຊາການ ປກສ ແຂວງ, ທ່ານ ທອງໃສ ໄຊຍະວົງຄຳດີ ເຈົ້າເມືອງອຸທຸມພອນ (ອະດີດຫົວໜ້າຫ້ອງວ່າການປົກ ຄອງແຂວງ) ແລະ ທ່ານ ຄຳຜຸຍ ສີບຸນເຮືອງ ຫົວໜ້າພະແນກແຜນການ ແລະ ການລົງທຶນແຂວງ ແລະ ຕົກລົງມອບຫຼຽນໄຊພິລະອາດຫານຊັ້ນ III ໃຫ້ແກ່ເຈົ້າເມືອງ, ເຈົ້ານະຄອນ, ພະແນກການຂຶ້ນກັບແຂວງ ແລະ ບໍລິສັດຈຳນວນ 18 ທ່ານ, ຊຶ່ງບັນດາທ່ານ ທີ່ໄດ້ຮັບການປະດັບຫຼຽນໃນຄັ້ງນີ້ລ້ວນແຕ່ເປັນຜູ້ທີ່ມີຜົນງານດີເດັ່ນປະກອບສ່ວນອັນສຳຄັນເຂົ້າໃນວຽກງານ ປກຊ-ປກສ ເພື່ອປົກປັກຮັກສາ ແລະ ພັດທະນາປະເທດຊາດ.
