ປະດັບຫຼຽນໄຊພັດທະນາຊັ້ນII ໃຫ້ແກ່ ຮອງປະທານສະມາຄົມມິດຕະພາບ ຣັດຊຍ-ລາວ

ວັນທີ 25 ພະຈິກນີ້, ທີ່ໂຮງແຮມລາວພລາຊາ, ຄະນະພົວພັນຕ່າງປະເທດສູນກາງພັກ (ຄຕພ) ຕາງໜ້າລັດຖະບານ ແຫ່ງ ສປປ ລາວ ໄດ້ຈັດພິທີປະດັບຫຼຽນໄຊພັດທະນາຊັ້ນ II ໃຫ້ແກ່ຮອງປະທານສະມາຄົມມິດຕະພາບ ຣັດເຊຍ-ລາວ. ໃຫ້ກຽດປະດັບຫຼຽນໂດຍ ທ່ານ ທອງສະຫວັນ ພົມວິຫານ, ກໍາມະການສູນກາງພັກ,ຫົວໜ້າ ຄຕພ ປະດັບໃຫ້ທ່ານ ປານຟີລົບ ອີກໍ ດາວືໂດວິກຈ, ຮອງປະທານສະມາຄົມມິດຕະພາບ ຣັດເຊຍ-ລາວ ເພື່ອສະແດງຄວາມຮູ້ບຸນຄຸນ ແລະ ຕອບແທນຜົນງານການປະກອບສ່ວນສະຕິປັນຍາ, ທຶນຮອນເຂົ້າໃນການປະກອບສ່ວນສ້າງສາພັດທະນາ ສປປ ລາວ, ທັງປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສ.ຣັດເຊຍ.

ວັນທີ 24 ພະຈິກ 2023 ໄດ້ຈັດກອງປະຊຸມພົບປະລະຫວ່າງ ສະມາຄົມ ມິດຕະພາບ ລາວ-ຣັດເຊຍ ແລະ ສະມາຄົມມິດຕະພາບ ຣັດເຊຍ-ລາວ. ຝ່າຍລາວ ນໍາໂດຍ ທ່ານບໍ່ແສງຄຳ ວົງດາລາ, ອະດີດກຳມະການສູນກາງພັກ, ອະດີດລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານສະມາຄົມມິດຕະພາບ ລາວ-ຣັດເຊຍ ແລະ ຝ່າຍຣັດເຊຍ ນຳໂດຍ ທ່ານ ໂຊໂກລິນ ວະລາດີມີຣ ເລໂອນິດາວິຈ, ປະທານສະມາຄົມມິດຕະພາບ ຣັດເຊຍ-ລາວ. ໃນກອງປະຊຸມ ສອງຝ່າຍໄດ້ ຕີລາຄາສູງຕໍ່ການພົວພັນຮ່ວມມືໃນໄລຍະຜ່ານມາ,ຊຶ່ງໄດ້ຮັບການເສີມຂະຫຍາຍໃນແຕ່ລະໄລຍະ, ມີການແລກປ່ຽນການຢ້ຽມຢາມ, ຈັດກິດຈະກໍາ ໃນໂອກາດວັນສໍາຄັນ ຂອງສອງປະເທດ ແລະ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມ ອັນພົ້ນເດັ່ນ ຂອງແຕ່ລະປະເທດໃຫ້ກັນຊາບ. ນອກນັ້ນ, ສອງສະມາຄົມມິດຕະພາບ ຍັງປະຕິບັດພາລະບົດບາດເປັນໃຈກາງປະສານງານ, ຊຸກຍູ້ການພົວພັນລະຫວ່າງປະຊາຊົນ ໃຫ້ມີການໄປມາຫາສູ່ ແລະ ຮ່ວມມືກັນ ລະຫວ່າງປະຊາຊົນຂອງສອງປະເທດ. ສອງຝ່າຍເຫັນດີປະສານງານ ແລະ ຮ່ວມມືກັນ ເພື່ອສືບຕໍ່ປະຕິບັດພາລະບົດບາດ ແລະ ໜ້າທີ່ ເປັນຂົວຕໍ່ຊຸກຍູ້ການພົວພັນດ້ານຕ່າງໆ ຂອງສອງປະເທດ ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ຂອງສອງປະເທດ ແລະ ປະຊາຊົນສອງຊາດລາວ ແລະ ຣັດເຊຍ ໃຫ້ມີບາດກ້າວໃໝ່.