ອົງການຈັດຕັ້ງສັງຄົມລາວ ຈັດງານວາງສະແດງຜົນງານ ປະຈໍາປີ 2023
ວັນທີ 25 ພະຈິກ 2023, ອົງການຈັດຕັ້ງສັງຄົມ ເປີດງານວາງສະແດງຜົນງານ ແລະ ຜະລິດຕະພັນຂອງອົງການຈັດຕັ້ງສັງຄົມ ປະຈຳປີ 2023 ຢູ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ເຊິ່ງມີຫລາຍກວ່າ 50 ອົງກອນທີ່ໄດ້ນໍາເອົາຜົນງານທີ່ພົ້ນເດັ່ນຂອງຕົນມາວາງສະແດງ ພາຍໃຕ້ຫົວຂໍ້ “ການແກ້ໄຂບັນຫາການປ່ຽນແປງດິນຟ້າອາກາດ ແລະ ການສົ່ງເສີມ ການພັດທະນາແບບຍືນຍົງໃນລາວ”, ເຂົ້າຮ່ວມເປີດງານໂດຍ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ, ທ່ານ ນາງ ຊີວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈໍາລາວ, ທ່ານ ດຣ ນາງ ຈັນສີ ພິມພະຈັນ ຫົວໜ້າຄະນະກຳມະການປະສານງານອົງການຈັດຕັ້ງສັງຄົມ.
ງານດັ່ງກ່າວ, ເພື່ອເປັນການສະແດງຜົນງານ, ສິນຄ້າ ລວມເຖິງຜະລິດຕະພັນຕ່າງໆຂອງບັນດາອົງການຈັດຕັ້ງສັງຄົມໃນລາວ ລວມເຖິງສິນຄ້າ ແລະ ຜະລິດຕະພັນຂອງຊາວບ້ານ; ນອກນີ້, ກໍເພື່ອສ້າງເວທີແລກປ່ຽນຄວາມຮູ້ໃນຫົວຂໍ້ຕ່າງໆຢ່າງສ້າງສັນ ແລະ ມີບັນຍາກາດ ຊຶ່ງແມ່ນຫົວຂໍ້ທີ່ເຊື່ອມສານຂອງງານທີ່ຖືກກັບໄລຍະສັບປະດາຂອງການຢຸດຕິການໃຊ້ຄວ່ມຮຸນແຮງຕໍ່ແມ່ຍິງ ແລະ ເດັກຍິງ ສົນທະນາແລກປ່ຽນຄວາມຮູ້ ໂດຍຈະມີຫົວຂໍ້ “ການປູກຈິດສຳນຶກ ຫົວຂໍ້ 16 ມື້ ຮ່ວມກັນ! ລົງທຶນເພື່ອປ້ອງກັນ ແລະ ແກ້ໄຂການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ (EVAW Campaign)”; ມີການໃຫ້ຄວາມຮູ້ດ້ານການພັດທະນາແບບຍືນຍົງ, ການໃຫ້ຄວາມຮູ້ດ້ານຄວາມຍຸຕິທໍາທາງດ້ານດິນຟ້າອາກາດ ແລະ ການດຳລົງຊີວິດ. ນອກນີ້, ກໍຍັງມີກິດຈະກຳຖາມ-ຕອບ, ມີການສະແດງດົນຕີ, ຂັບລໍາ, ຟ້ອນ, ຮ້ອງເພງ ລວມເຖິງການສົນທະນາ ແລະ ການສະແດງລະຄອນເວລທີ ທີ່ມີເນື້ອໃນກ່ຽວກັບບັນຫາສັງຄົມ ທີ່ເຄີຍພົບເຫັນມາ ເຊັ່ນ: ຄວາມຮຸນແຮງຕໍ່ແມ່ຍິງ ແລະ ບົດບາດຍິງ-ຊາຍ. ງານດັ່ງກ່າວ,ດຳເນີນເປັນເວລາ 2 ວັນ (25-26 ພະຈິກ 2023) ຊຶ່ງຄະນະຜູ້ຈັດງານ ກໍຄາດວ່າຈະມີຜູ້ເຂົ້າມາງານເຖິງ 1.000 ຄົນ.
