ລາວ-ເກົາຫລີ ຮ່ວມມືຈັດສົ່ງຜູ້ອອກແຮງງານລາວໄປເຮັດວຽກຕາມລະດູການຢູ່ ເມືອງ ໂກຮຶງ ສ.ເກົາຫລີ

ການເຊັນບົດບັນທຶກຄວາມເຂົ້າໃຈວ່າດ້ວຍການຈັດສົ່ງຜູ້ອອກແຮງງານລາວໄປເຮັດວຽກຕາມລະດູການ ຢູ່ ສ.ເກົາຫລີ ລະຫວ່າງ ກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມ ແລະ ເມືອງ ໂກຮຶງ, ແຂວງ ເຈີນລານຳ, ສ.ເກົາຫລີ ດຳເນີນໄປໃນວັນທີ 23 ພະຈິກ 2023, ຕາງໜ້າເຊັນໂດຍ ທ່ານ ສຸລິຍາ ຄຳວົງສາ ຮອງຫົວໜ້າກົມການຈັດຫາງານ ກະຊວງ ຮສສ (ຮສສ)ແລະ ທ່ານ Yangkyu SUN , ຮອງເຈົ້າເມືອງ ໂກຮຶງ.

ທ່ານ ສຸລິຍາ ຄຳວົງສາ ລາຍງານໃຫ້ຮູ້ວ່າ: ການຮ່ວມມືກັນ ລະຫວ່າງ ກົມການຈັດຫາງານ ແລະ ເມືອງ ໂກຮຶງ ໃນການຈັດສົ່ງແຮງງານລາວໄປເຮັດວຽກຕາມລະດູການທີ່ ເມືອງ ໂກຮຶງ ໃນຄັ້ງນີ້, ຈະເປັນບາດກ້າວສໍາຄັນ ແລະ ສ້າງຜົນປະໂຫຍດໃຫ້ແກ່ສອງຝ່າຍ. ສໍາລັບ ແຮງງານຂອງ ສປປ ລາວ ກໍຈະໄດ້ຮັບການພັດທະນາສີມືແຮງງານ ແລະ ມີລາຍຮັບໃຫ້ແກ່ຕົນແຮງງານເອງ ແລະ ຄອບຄົວ ພ້ອມທັງຈະຊ່ວຍຊຸກຍູ້ການຂະຫຍາຍຕົວຂອງເສດຖະກິດ ຂອງ ສປປ ລາວ ພ້ອມທັງເຮັດໃຫ້ຊາວກະສິກອນ, ເຈົ້າຂອງຟາມ ພາຍໃນເມືອງ ກໍຈະມີແຮງງານເຂົ້າຮັບໃຊ້ການຜະລິດກະສິກໍາໃຫ້ຫລາຍຂຶ້ນ. ສະນັ້ນ, ກົມການຈັດຫາງານ ຈຶ່ງໄດ້ປະສານງານກັບຜູ້ຮັບຜິດຊອບ ວຽກງານການຈັດສົ່ງແຮງງານຕາມລະດູການ ຂອງເມືອງ ດັ່ງກ່າວໂດຍຜ່ານລະບົບເອເລັກໂຕນິກ ຊຶ່ງທັງສອງຝ່າຍໄດ້ແລກປ່ຽນຄໍາຄິດຄໍາເຫັນ ຕໍ່ຮ່າງບົດບັນທຶກການຮ່ວມມື ແລະ ສາມາດເປັນເອກະພາບຕໍ່ເນື້ອໃນຂອງຮ່າງບົດບັນທຶກການຮ່ວມມື ຮ່ວມກັນ.