ເຈົ້າໜ້າທີ່ຕຳຫລວດ ດີເອສໄອ ໄທ ຈັບເຈົ້າຂອງເວັບພະນັນລາຍໃຫຍ່ UFA ຄາສະໜາມບິນສຸວັນນະພູມ

ສຳນັກຂ່າວສົດໄທ ລາຍງານ ໃນວັນທີ 7 ພະຈິກ 2023ນີ້ວ່າ: ເຈົ້າໜ້າທີ່ຕຳຫລວດດີເອສໄອ ຂອງໄທ ໄດ້ຖະແຫລງ ຜົນການຈັບກຸມ ທ້າວ ພາກພູມ ຫລື ດີດີ້ ຜູ້ບໍລິຫານລະດັບສູງຂອງເຄືອຂ່າຍເວັບພະນັນຢູຟ່າ (UFA)  ເຊິ່ງເປັນເວັບພະນັນອອນລາຍເຄືອຂ່າຍໃຫຍ່ອັນດັບ 1 ໃນ 3 ຂອງເຄືອຂ່າຍເວັບພະນັນໃນໄທ ໄດ້ທີ່ສະໜາມບິນສຸວັນນະພູມ ຂະນະທີ່ຜູ້ກ່ຽວເດີນທາງກັບຈາກຮົງກົງ.

ຈາກການຈັບກຸມໄດ້ພົບຫລັກຖານເຊື່ອມໂຍງວ່າມີບັນຊີມ້າຫລາຍກວ່າ 80 ບັນຊີ ທີ່ ທ້າວ ພາກພູມ ບໍລິຫານ, ໂດຍບັນຊີມ້າ 50 ບັນຊີ ເປັນຂອງແຮງງານຕ່າງດ້າວທີ່ເປີດ ແລະ ຂາຍບັນຊີໃຫ້ເຮັດເວັບພະນັນ  ແລະ ພົບອີກ 30 ບັນຊີ ເປັນຂອງຄົນໄທໂດຍແຕ່ລະບັນຊີມີເງິນໝູນວຽນເປັນຕື້ບາດ.

ເຈົ້າໜ້າທີ່ ດີເອສໄອ ເຂົ້າຈັບກຸມ ທ້າວພາກພູມ ໄດ້ທີ່ສະໜາມບິນສຸວັນນະພູມ ຂະນະທີ່ກັບຈາກຮົງກົງ, ເບື້ອງຕົ້ນຜູ້ຕ້ອງຫາໃຫ້ການປະຕິເສດ, ແຕ່ຈຳນົນດ້ວຍຫລັກຖານເສັ້ນທາງການເງິນ ແລະ ຫລັກຖານທາງເອເລັກໂຕຣນິກ, ເບື້ອງຕົ້ນໄດ້ນຳຕົວຜູ້ຕ້ອງຫາໄປຝາກຂັງຕໍ່ສານອາຍາ ແລະ ຄັດຄ້ານການປະກັນຕົວ ເຊິ່ງສານບໍ່ອະນຸຍາດໃຫ້ປ່ອຍຕົວຊົ່ວຄາວ, ພ້ອມອາຍັດ ບັນຊີໄວ້ 83 ບັນຊີ ແລະ ຊັບສິນຈຳນວນໜຶ່ງ.