ກອງປະຊຸມສຸດຍອດ ກ່ຽວກັບບັນຫາ ປາແລັດສະຕິນ-ອິດສະຣາແອນ

ວິທະຍຸສາກົນ ແຫ່ງສປ ຈີນ ລາຍງານວ່າ: ວັນທີ 21 ພະຈິກ 2023, ທ່ານ ສີ ຈິ້ນຜິງ, ປະທານ ປະເທດຈີນ ໄດ້ເຂົ້າຮ່ວມ ກອງປະຊຸມ ສຸດຍອດ ຜ່ານທາງ ວິດີໂອ ພິເສດ ກ່ຽວກັບ ບັນຫາ ປາແລັດສະຕິນ-ອິດສະຣາແອນ ຂອງຜູ້ນຳປະເທດ ບຣາຊິນ,ຣັດເຊຍ,ອິນເດຍ, ສປ ຈີນ ແລະ ອາຟຣິກາໃຕ້ ຫລື BRICS ພາຍໃຕ້ ຫົວຂໍ້ “ຊຸກຍູ້ ການຢຸດຍິງ ແລະ ຢຸດສົງຄາມ ບັນລຸ ສັນຕິພາບ ແລະ ຄວາມໝັ້ນຄົງ ແບບຖາວອນ”.

ທ່ານ ສີ ຈິ້ນຜິງ ຊີ້ໃຫ້ເຫັນວ່າ: ກອງປະຊຸມ ສຸດຍອດ ຄັ້ງນີ້ ແມ່ນກອງປະຊຸມ ພົບປະ ຂອງຜູ້ນຳ ປະເທດ ອົງການ ບຣິກສ ຄັ້ງທຳອິດ ຫລັງຈາກ ການເພີ່ມ ຈຳນວນ ປະເທດ ສະມາຊິກແລ້ວ. ພາຍໃຕ້ ສະພາບການ ໃນປັດຈຸບັນ, ບັນດາ ປະເທດ ສະມາຊິກ ບຣິກສ ສົ່ງສຽງ ແຫ່ງຄວາມເປັນທຳ ແລະ ສຽງແຫ່ງ ສັນຕິພາບ ກ່ຽວກັບ ບັນຫາ ປາແລັດສະຕິນ-ອິດສະຣາແອນ ແມ່ນມີຄວາມຈຳເປັນ ແລະ ທັນເຫດການທີ່ສຸດ. ການປະທະກັນ ທີ່ເກີດຂຶ້ນ ຢູ່ເຂດກາຊາ ໄດ້ສືບຕໍ່ມາ ເປັນເວລາ 1 ເດືອນປາຍແລ້ວ, ສົ່ງຜົນເຮັດໃຫ້ ປະຊາຊົນ ເສຍຊີວິດ ແລະ ບາດເຈັບ ເປັນຈຳນວນ ຫລວງຫລາຍ ແລະ ເຮັດໃຫ້ເກີດ ໄພຮ້າຍ ດ້ານມະນຸດສະທຳ ຕື່ມອີກ, ພ້ອມທັງ ມີທ່າອ່ຽງ ຈະຂະຫຍາຍ ອອກຕື່ມ, ສປ ຈີນ ສະແດງ ຄວາມເປັນຫ່ວງ ຢ່າງເລິກເຊິ່ງ. ວຽກງານ ຮີບດ່ວນ ໃນປັດຈຸບັນ ລວມມີ:

1. ບັນດາຝ່າຍ ທີ່ກ່ຽວຂ້ອງກັບ ການປະທະກັນ ຕ້ອງຢຸດຍິງ ແລະ ຢຸດສົງຄາມ ໃນທັນທີ;

2. ຕ້ອງຮັບປະກັນ ໃຫ້ຊ່ອງທາງ ຊ່ວຍເຫລືອ ດ້ານມະນຸດ ສະທຳ ມີຄວາມປອດໄພ ແລະ ສະດວກສະບາຍ;

3. ປະຊາຄົມໂລກ ຕ້ອງວາງ ມາດຕະການ ທີ່ຕິດແທດ ຕົວຈິງ ເພື່ອປ້ອງກັນ ບໍ່ໃຫ້ການປະທະກັນ ຂະຫຍາຍ ອອກຕື່ມ ຈົນກະທົບເຖິງ ສະຖຽນ ລະພາບ ຢູ່ເຂດ ຕາເວັນອອກກາງ.

ນັບແຕ່ເກີດ ການປະທະກັນ ລະຫວ່າງ ປາແລັດສະຕິນ-ອິດສະຣາແອນ ຮອບນີ້ ເປັນຕົ້ນມາ, ສປ ຈີນ ໄດ້ສົ່ງເສີມ ສັນຕິພາບ ແລະ ຊຸກຍູ້ ໃຫ້ຈັດການ ເຈລະຈາ ຢ່າງຕັ້ງໜ້າ, ຊຸກຍູ້ ການຢຸດຍິງ ແລະ ຢຸດສົງຄາມ, ສະໜອງ ການຊ່ວຍເຫລືອ ສຸກເສີນ ດ້ານມະນຸດ ສະທຳ ໃຫ້ແກ່ ເຂດກາຊາ, ພ້ອມທັງ ສືບຕໍ່ ສະໜອງ ເຄື່ອງຊ່ວຍເຫລືອ ແລະ ຄວາມຊ່ວຍເຫລືອອື່ນໆ ຕາມຄວາມຕ້ອງການ ຂອງປະຊາຊົນ ຢູ່ເຂດກາຊາ. ສປ ຈີນ ຮຽກຮ້ອງ ໃຫ້ຈັດກອງປະຊຸມ ສັນຕິພາບ ສາກົນ ທີ່ມີຄວາມສັກສິດ ຫລາຍກວ່າເກົ່າ ໂດຍໄວ ເທົ່າທີ່ ຈະໄວໄດ້, ເຕົ້າໂຮມ ຄວາມຮັບຮູ້ ທີ່ເປັນ ເອກະພາບກັນ ໃນສາກົນ ກ່ຽວກັບ ການສົ່ງເສີມ ສັນຕິພາບ, ຊຸກຍູ້ບັນຫາ ປາແລັດສະຕິນ ໃຫ້ໄດ້ຮັບ ການແກ້ໄຂ ຢ່າງຮອບດ້ານ, ຍຸຕິທຳ ແລະ ຖາວອນ ໂດຍໄວ.