50 ປີ ການຮ່ວມມື ສປປ ລາວ ແລະ ຢູນີເຊບ ມີການພັດທະນາ ແລະ ຄວາມຄືບໜ້າຫລາຍດ້ານ
ການສະເຫລີມສະຫລອງ 50 ປີ ແຫ່ງການຮ່ວມມືລະຫວ່າງ, ສປປ ລາວ ແລະ ອົງການສະຫະປະຊາຊາດ ສຳລັບເດັກ (ຢູນີເຊບ) ປະຈຳລາວ ໄດ້ຈັດຂຶ້ນ ວັນທີ 22 ພະຈິກ 2023 ທີ່ນະຄອນຫລວງວຽງຈັນ, ໂດຍການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີທ່ານ ນາງ ເພຍ ເຣເບລໂລ ບຣິດໂຕ ຜູ້ຕາງໜ້າອົງການອຸຍນີເຊບ ປະຈຳລາວ ເຂົ້າຮ່ວມ.
ທ່ານ ນາຍົກລັດຖະມົນຕີ ກ່າວວ່າ: ອົງການຢູນີເຊບ ແມ່ນຄູ່ຮ່ວມພັດທະນາໜຶ່ງ ທີ່ສໍາຄັນ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ເລີ່ມແຕ່ປີ 1973 ຈົນເຖິງປັດຈຸບັນ. ຜົນສໍາເລັດທີ່ພົ້ນເດັ່ນອັນໜຶ່ງ ແມ່ນການຈັດກອງປະຊຸມສຸດຍອດ ວ່າດ້ວຍຊັບສິນດ້ານມະນຸດ ຄັ້ງທຳອິດ ຢູ່ ສປປ ລາວ ໃນເດືອນພຶດສະພາ ຜ່ານມາ ຊຶ່ງອົງການຢູນີເຊບ ແລະ ທະນາ ຄານໂລກ ໃຫ້ການຊ່ວຍເຫລືອທາງດ້ານວິຊາການ ແລະ ທຶນຮອນ, ກອງປະຊຸມ ໄດ້ປຶກສາຫາລືຢ່າງກົງໄປກົງມາ, ສ້າງສັນ ແລະ ໄດ້ກໍານົດມາດຕະການໃນການແກ້ໄຂ ການສູນເສຍການຮຽນຂອງນັກຮຽນ ໃນໄລຍະມີການແພ່ລະບາດຂອງພະຍາດໂຄວິດ-19 ເພື່ອຮັບປະ ກັນໃຫ້ເດັກໃນກຸ່ມອາຍຸເຂົ້າຮຽນໄດ້ກັບເຂົ້າມາຮຽນໃນໂຮງຮຽນຢ່າງເປັນປົກກະຕິ.
ການປະກອບສ່ວນຢ່າງຕັ້ງໜ້າ ແລະ ຕໍ່ເນື່ອງ ຂອງບັນດາກະຊວງ, ອົງການລັດທຽບເທົ່າກະຊວງ, ບັນດາແຂວງ, ນະຄອນຫລວງ, ບັນດາຄູ່ຮ່ວມພັດທະນາ ແລະ ການຈັດຕັ້ງທຸກພາກສ່ວນໃນສັງຄົມ ໄດ້ເຮັດໃຫ້ ສປປ ລາວ ສາມາດຍາດໄດ້ຜົນສຳເລັດ, ສືບຕໍ່ມີການພັດທະນາ ແລະ ຄວາມຄືບໜ້າຫລາຍດ້ານ ເປັນຕົ້ນ ຂົງເຂດສັງຄົມ: ຂະແໜງການສຶກສາ ໄດ້ມີບາດກ້າວຂະຫຍາຍດີສົມຄວນ, ເຊິ່ງອັດຕາເຂົ້າຮຽນສຸດທິໃນຊັ້ນປະຖົມສຶກສາ ຈາກ 40% ໃນປີ 1973 ໄດ້ເພີ່ມຂຶ້ນຫລາຍກວ່າ 95% ໃນປັດຈຸບັນ, ໂຮງຮຽນປະຖົມຂອງລັດກໍ ເພີ່ມຂຶ້ນຈາກ 3.600 ແຫ່ງເປັນ 9.000 ກວ່າແຫ່ງ, ກໍາລັງການສິດສອນໄດ້ເພີ່ມຂຶ້ນຈາກ 8.000 ຄົນ ມາເປັນ 33.799 ຄົນໃນປັດຈຸບັນ ຊຶ່ງສ່ວນຫລາຍໄດ້ຜ່ານການຝຶກອົບຮົມຢ່າງເປັນທາງການໝົດແລ້ວ.
ນອກຈາກນັ້ນ ສປປ ລາວ ຍັງໄດ້ສຸມໃສ່ການຍົກສູງຄຸນນະພາບການສຶກສາ ໂດຍຜ່ານການສ້າງຄູ-ອາຈານ, ປັບປຸງຫລັກສູດ ແລະ ການເຊື່ອມໂຍງເຕັກໂນໂລຊີການສຶກສາໃໝ່ໆ, ຄວາມສະເໝີພາບລະຫວ່າງຍິງ-ຊາຍ ໄດ້ຖືກຍົກລະດັບໃຫ້ເທົ່າທຽມສາກົນ, ປັດຈຸບັນ ອັດຕາເຂົ້າຮຽນສຸດທິຂອງເດັກຍິງ-ຊາຍ ເທົ່າກັບ 95% ໃນລະດັບປະຖົມ; ສຳລັບ ຂະແໜງສາທາລະນະສຸກ ກໍໄດ້ມີຄວາມຄືບໜ້າຫລາຍດ້ານ ເປັນຕົ້ນ ຈາກທີ່ມີໂຮງໝໍ ພຽງ 16 ແຫ່ງ, ໂຮງໝໍນ້ອຍ 6 ແຫ່ງ ແລະ ຈຸດຈຳໜ່າຍຢາ 148 ແຫ່ງ ໃນປີ 1973. ໃນປັດຈຸບັນ, ມີໂຮງໝໍແຂວງ 18 ແຫ່ງ ແລະ ໂຮງໝໍນ້ອຍ 1.075 ແຫ່ງ ພ້ອມດ້ວຍໂຮງໝໍຊຸມຊົນ ແລະ ສູນກາງ.
ໂອກາດນີ້, ທ່ານ ນາງ ເພຍ ເຣເບລໂລ ບຣິດໂຕ ກ່າວວ່າ: ຕະຫລອດໄລຍະ 5 ທົດສະວັດຜ່ານມາ, ພວກເຮົາໄດ້ສ້າງຄວາມຄືບໜ້າຢ່າງໂດດເດັ່ນ ໃນການປັບປຸງຊີວິດການເປັນຢູ່ຂອງເດັກນ້ອຍ ແລະ ໄວໜຸ່ມລາວ, ເຖິງວ່າຍັງມີສິ່ງທ້າທາຍເຫລືອຢູ່, ຄວາມພະຍາຍາມຮ່ວມຂອງອຸຍນິເຊບນັ້ນ ກໍໄດ້ນຳໄປສູ່ຄວາມກ້າວໜ້າອັນສຳຄັນ ໃນວຽກງານການປົກປ້ອງ ແລະ ສົ່ງເສີມສິດທິເດັກ ບໍ່ວ່າຈະເປັນສິດທິຕໍ່ສຸຂະພາບທີ່ດີ, ການເຂົ້າເຖິງການສຶກສາ, ຄວາມສຸກ, ສິດໃນການໄດ້ຮັບການປົກປ້ອງ, ໂພຊະນາການທີ່ດີ, ສິດໃນການເຂົ້າເຖິງນ້ຳສະອາດ, ສຸຂາພິບານ ແລະ ສິດທິໃນການມີສ່ວນຮ່ວມ. ການສະ ເຫລີມສະຫລອງຄັ້ງນີ້ ບໍ່ພຽງແຕ່ເປັນການສະເຫລີມສະຫລອງຜົນສຳເລັດໃນອະດີດເທົ່ານັ້ນ ແຕ່ຍັງເປັນການຢັ້ງຢືນຄືນເຖິງຄຳໝັ້ນສັນຍາ ຂອງພວກເຮົາທີ່ມີຕໍ່ລູກຫລານຂອງ ສປປ ລາວ ທຸກຄົນ.
