ລັດຖະມົນຕີຈີນ, ອາຣັບ ແລະ ມຸດສະລິມ ຮຽກຮ້ອງໃຫ້ຢຸດສົງຄາມຢູ່ເຂດກາຊາທັນທີ
ວັນທີ 20 ພະຈິກ, ທ່ານ ຫວັງອີ້ ລັດຖະມົນຕີວ່າການກະຊວງການຕ່າງປະເທດຈີນ ເປັນເຈົ້າພາບຈັດກອງປະຊຸມລະດັບລັດຖະມົນຕີຕ່າງປະເທດວາລະພິເສດ ຮ່ວມກັບບັນດາລັດຖະມົນຕີຕ່າງປະເທດຈາກປະເທດອາຣັບ ແລະ ມຸດສະລິມ ໂດຍທັງໝົດຮຽກຮ້ອງໃຫ້ຢຸດເຊົາສົງຄາມ ແລະ ຄວາມຮຸນແຮງຢູ່ເຂດກາຊາທັນທີ, ພ້ອມທັງສະໜັບສະໜູນໃຫ້ສາມາດສົ່ງມອບການຊ່ວຍເຫລືອດ້ານມະນຸດສະທໍາໃຫ້ຊາວປາແລັສຕິນທີ່ໄດ້ຮັບຜົນກະທົບຈາກສົງຄາມໃນຄັ້ງນີ້.
ກອງປະຊຸມຍັງເພີ່ມແຮງກົດດັນໃຫ້ປະເທດຕາເວັນຕົກປະຕິເສດເຫດຜົນຂອງອິດສະລາແອນທີ່ລະບຸວ່າ: ການຕອບໂຕ້ກັບໃນເວລານີ້ເປັນໄປເພື່ອປ້ອງກັນຕົນເອງ ແລະ ສ້າງຄວາມຍຸຕິທໍາໃຫ້ແກ່ການເຂົ້າໄປເຮັດສົງຄາມຢູ່ເຂດກາຊາຂອງຊາວປາແລັສຕິນ ຈົນເຮັດໃຫ້ເກີດຄວາມສູນເສຍ ແລະ ວິກິດດ້ານມະນຸດສະທໍາຄັ້ງໃຫຍ່.
ເຈົ້າຊາຍ ໄຟຊາລ ບິນ ຟາຮານ ອັລ ຊາອຸດ ລັດຖະມົນຕີຕ່າງປະເທດຊາອຸດິອາຣະບີ ກ່າວວ່າ: ພວກເຮົາມາລວມຕົວກັນຢູ່ບ່ອນນີ້ເພື່ອສົ່ງສັນຍານຈະແຈ້ງວ່າ: “ພວກເຮົາຕ້ອງຢຸດການຕໍ່ສູ້, ຢຸດການເຂັ່ນຂ້າໂດຍທັນທີ ແລະ ພວກເຮົາຕ້ອງສົ່ງມອບການຊ່ວຍເຫລືອດ້ານມະນຸດສະທໍາໄປໃຫ້ເຂດກາຊາໂດຍທັນທີເຊັ່ນດຽວກັນ”.
ຂະນະທີ່ທ່ານ ຫວັງອີ້ ລັດຖະມົນຕີຕ່າງປະເທດຈີນ ລະບຸວ່າ: “ຈີນເປັນໝູ່ ເປັນພີ່ນ້ອງທີ່ດີກັບບັນດາປະເທດໃນໂລກອາຣັບ ແລະ ມຸດສະລິມ”. ພ້ອມທັງເນັ້ນວ່າ: “ຈີນຈະສະໜັບສະໜູນຢ່າງແຂງແຮງຕໍ່ຈຸດຢືນທີ່ສ້າງຄວາມຍຸຕິທໍາໃຫ້ຊາວປາແລັສຕິນ ເພື່ອສົ່ງຄືນສິດ ແລະ ຜົນປະໂຫຍດແຫ່ງຊາດອັນຍຸຕິທໍາຂອງພວກເຂົາ”.
ໂດຍຈີນໄດ້ຢຸດການປະນາມການໃຊ້ຄວາມຮຸນແຮງຂອງກຸ່ມຮາມັດນັບແຕ່ຕົ້ນຂອງສົງຄາມ, ແຕ່ສະແຫວງຫາແນວທາງຫລຸດຄວາມຂັດແຍ່ງລະຫວ່າງອິດສະລາແອນ-ປາແລັສຕິນ ໂດຍການສະໜັບສະໜູນແນວທາງສອງລັດ (Two-State Solution).
ອ້າງອີງ:
- www.reuters.com/world/middle-east/beijing-arab-muslim-ministers-urge-end-gaza-war-2023-11-20/
- www.middleeastmonitor.com/20231120-china-arab-and-muslim-ministerial-delegation-urges-end-to-gaza-war/
