ສະເໜີ ປັບປຸງຮ່າງກົດໝາຍຜູ້ພິພາກສາໃຫ້ມີເນື້ອໃນຄົບຖ້ວນສົມບູນ ແລະ ນຳໄປຈັດຕັ້ງປະຕິບັດ ຢ່າງມີປະສິດທິຜົນ

ວັນທີ 20 ພະຈິກ 2023, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ສະ ເໜີປັບປຸງຮ່າງກົດໝາຍຜູ້ພິພາກສາ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX, ເພື່ອໃຫ້ສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບຄຳເຫັນໃສ່ ຮ່າງກົດໝາຍດັ່ງກ່າວ ໃຫ້ມີເນື້ອໃນຄົບຖ້ວນສົມບູນ ແລະ ສາມາດນຳໄປຈັດຕັ້ງປະຕິບັດ ຢ່າງມີປະສິດທິຜົນ.

ທ່ານ ນາງ ວຽງທອງ ສີພັນດອນ ກ່າວວ່າ: ກົດໝາຍ ວ່າດ້ວຍຜູ້ພິພາກສາ ທີ່ນຳໃຊ້ໃນປັດຈຸບັນໄດ້ຖືກຮັບຮອງ ແລະ ປະກາດໃຊ້ໃນປີ 2017, ຈາກການຈັດຕັ້ງປະຕິບັດຕົວຈິງ ໃນໄລຍະ 6 ປີຜ່ານມາ ເຫັນວ່າຍັງມີຄວາມຫຍຸ້ງຍາກຍ້ອນມີບາງເນື້ອໃນຍັງບໍ່ຄົບຖ້ວນ, ບໍ່ຈະແຈ້ງຮັດກຸມ ແລະ ບໍ່ທັນສອດຄ່ອງກັບກົດໝາຍ ແລະ ສະພາບຄວາມເປັນຈິງ ເປັນຕົ້ນ: ມາດຕະຖານ ແລະ ເງື່ອນໄຂໃນການແຕ່ງຕັ້ງເປັນຜູ້ພິພາກສາແມ່ນສູງເກີນໄປ ແຕ່ສະພາບຄວາມເປັນຈິງຂອງຜູ້ພິພາກສາ ສ່ວນຫລາຍຍັງບໍ່ໄດ້ຕາມມາດຕະຖານ ແລະ ເງື່ອນໄຂທີ່ກໍານົດໄວ້ເຮັດໃຫ້ການສ້າງຜູ້ພິພາກສາ ມີຄວາມຊັກຊ້າ ແກ່ຍາວ ແລະ ບໍ່ທ່ວງທັນຕາມຄວາມ ຮຽກຮ້ອງຕ້ອງການຂອງວຽກງານສ້າງຜູ້ພິພາກສາ ໃນໄລຍະໃໝ່.

ການປະຕິບັດໜ້າທີ່ຂອງຜູ້ພິພາກສາຈໍານວນໜຶ່ງຍັງບໍ່ທັນມີຄຸນນະພາບ, ການເລື່ອນຊັ້ນຜູ້ພິພາກສາກໍຍັງມີອຸປະສັກກົດໜ່ວງຄວາມກ້າວໜ້າຂອງຜູ້ພິພາກສາ, ການສືບຕໍ່ປະຕິບັດໜ້າທີ່ ແລະ ນະໂຍບາຍອື່ນ ຕໍ່ຜູ້ພິພາກສາ ບໍ່ສາມາດຈັດຕັ້ງປະຕິບັດ ແລະ ການແຕ່ງຕັ້ງ ຍົກຍ້າຍ ປົດຕຳແໜ່ງ ແລະ ສັບປ່ຽນບ່ອນປະຈຳການຂອງ ຜູ້ພິພາກສາ ຍັງບໍ່ທັນໄດ້ກະຈາຍອໍານາດເທົ່າທີ່ຄວນ.
ກ່ອນທີ່ຈະແຕ່ງຕັ້ງ ຍົກຍ້າຍ ສັບປ່ຽນບ່ອນປະຈຳການ ແລະ ປົດຕຳແໜ່ງ ແມ່ນຜ່ານຄະນະປະຈຳສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ພາກສ່ວນທີ່ກ່ຽວຂ້ອງ ເຮັດໃຫ້ມີຄວາມຊັກຊ້າແກ່ຍາວ ແລະ ບໍ່ສາມາດຄຸ້ມຄອງກວດກາ ຫລື ແກ້ໄຂບັນຫາທີ່ເກີດຂຶ້ນໄດ້ຢ່າງທັນການ. ສະນັ້ນ, ເພື່ອໃຫ້ສອດຄ່ອງກັບລັດຖະທຳມະນູນ ຈຶ່ງມີຄວາມຈຳເປັນຕ້ອງປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນ ເພື່ອຕອບສະໜອງຄວາມຮຽກຮ້ອງຕ້ອງການ ໃນການສ້າງຜູ້ພິພາກສາ ໃນໄລຍະໃໝ່, ທັງເຮັດໃຫ້ການປັບປຸງກົດໝາຍສະບັບນີ້ ສາມາດຈັດຕັ້ງປະຕິບັດໄດ້ງ່າຍ ແລະ ສອດຄ່ອງກັບສະພາບຄວາມເປັນຈິງ ໃນການປະຕິບັດໜ້າທີ່ຂອງຜູ້ພິພາກສາ ໃຫ້ມີຄຸນນະພາບ, ການທຽບຊັ້ນ, ການເລື່ອນຊັ້ນຂອງຜູ້ພິພາກສາ ບໍ່ແກ່ຍາວເວລາ ທັງຮັບປະກັນຄວາມເປັນເອກະພາບ ແລະ ມີຜົນສັກສິດໃນການຈັດຕັ້ງປະຕິບັດ.

ຮ່າງກົດໝາຍ ວ່າດ້ວຍຜູ້ພິພາກສາ ສະບັບປີ 2017 ປະກອບດ້ວຍ XII ພາກ, 10 ໝວດ 56 ມາດຕາ, ຮ່າງກົດໝາຍ ວ່າດ້ວຍຜູ້ພິພາກສາ ສະບັບປັບປຸງໃໝ່ ປະກອບດ້ວຍ XII ພາກ, ຍັງຮັກສາພາກໄວ້ຄືເກົ່າ; ມີ 12 ໝວດ (ເພີ່ມ 2 ໝວດ); 68 ມາດຕາ ເພີ່ມເຂົ້າໃໝ່ 12 ມາດຕາ, ປັບປຸງ 36 ມາດຕາ ແລະ ຍັງຮັກອັນເກົ່າ 20 ມາດຕາ.