ໂຄງການ “ສົ່ງເສີມການພັດທະນາ ແລະ ການສ້າງຄວາມເຂັ້ມແຂງລັດ ທີ່ປົກຄອງດ້ວຍກົດໝາຍ ໃນຂະແໜງຍຸຕິທໍາ ຂອງ ສປປ ລາວ”

ວັນທີ 15 ກັນຍາ 2023 ອົງການໄອຍະການ ປະຊາຊົນສູງສຸດ(ອອປສ) ຮ່ວມກັບຫ້ອງການໄຈກາ ປະຈຳ ສປປ ລາວ ຈັດກອງປະຊຸມຄັ້ງປະຖົມມະເລີກ ຄະນະຊີ້ນຳໂຄງການສົ່ງເສີມການພັດທະນາ ແລະ ສ້າງຄວາມເຂັ້ມແຂງລັດ ທີ່ປົກຄອງດ້ວຍກົດໝາຍ ໃນຂົງເຂດຍຸຕິທຳ ໄລຍະທີ II ທີ່ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ຄໍາເພັດ ສົມວໍລະຈິດ ຮອງຫົວໜ້າ ອອປສ, ຄະນະຊີ້ນໍາໂຄງການ, ມີບັນດາຜູ້ຕາງໜ້າຈາກ ສະຖານທູດຍີ່ປຸ່ນ ແລະ ຜູ້ຕາງໜ້າຫ້ອງການໄຈກາ ປະຈຳ ສປປ ລາວ ພ້ອມດ້ວຍຄະນະປະສານງານໂຄງການ ຈາກ ອອປສ, ສານປະຊາຊົນສູງສຸດ, ກະຊວງຍຸຕິທຳ ແລະ ມະຫາວິທະຍາໄລແຫ່ງຊາດ ເຂົ້າຮ່ວມ.

ໂຄງການ “ສົ່ງເສີມການພັດທະນາ ແລະ ການສ້າງຄວາມເຂັ້ມແຂງລັດ ທີ່ປົກຄອງດ້ວຍກົດໝາຍ ໃນຂະແໜງຍຸຕິທໍາ ຂອງ ສປປ ລາວ” ແມ່ນໂຄງການ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງປະເທດ ຢີ່ປຸ່ນ ໂດຍມີຈຸດປະສົງຊ່ວຍລັດຖະບານລາວ ໃນການສົ່ງເສີມການພັດທະນາ ແລະ ການສ້າງຄວາມເຂັ້ມແຂງ ການປົກຄອງດ້ວຍກົດໝາຍ ໃນຂະແໜງການຍຸຕິທໍາ ຂອງ ສປປ ລາວ ໂດຍໄດ້ສຸມໃສ່ການພັດທະນາ, ການສົ່ງເສີມ ແລະ ການສ້າງ ຄວາມເຂັ້ມແຂງການປົກຄອງດ້ວຍກົດໝາຍ ໃນຂະແໜງການຍຸຕິທໍາ; ເຜີຍແຜ່, ນໍາໃຊ້ປະມວນກົດໝາຍແພ່ງ ເຂົ້າໃນຊີວິດສັງຄົມ; ສ້າງ ແລະ ປັບປຸງກົດໝາຍ, ນິຕິກໍາຈໍານວນໜຶ່ງ ເພື່ອປະຕິບັດປະມວນກົດໝາຍແພ່ງ; ສ້າງປຶ້ມຄູ່ມື, ຕໍາລາສິດສອນກົດໝາຍ ພ້ອມທັງເຜີຍແຜ່ໃນສະຖາບັນການສຶກສາ, ອົງການ ແລະ ທົ່ວສັງຄົມ ໃຫ້ມີຄວາມຮັບຮູ້ຢ່າງກວ້າງຂວາງ ແລະ ນໍາໃຊ້ຢ່າງມີປະສິດທິຜົນ.

ກອງປະຊຸມໃນຄັ້ງນີ້, ຜູ້ເຂົ້າຮ່ວມໄດ້ປືກສາຫາລື ແລະ ຮັບຮອງເອົາໂຄງປະກອບການຈັດຕັ້ງ ຂອງກຸ່ມ ແລະ ຄະນະຮັບຜິດຊອບໂຄງການ, ແຜນການປະຈຳປີ ແລະ ແຜນການ 5 ປີ ຂອງໂຄງການ 2023-2028 ແລະ ບັນຫາອື່ນໆຈຳນວນໜຶ່ງ ເພື່ອສ້າງຄວາມເຂັ້ມແຂງ ແລະ ຍົກສູງຄວາມອາດສາມາດ ຂອງພະນັກງານໃນຂົງເຂດກົດໝາຍ ແລະ ຍຸຕິທຳ, ຊຸກຍູ້ການສ້າງລັດ ທີ່ປົກຄອງດ້ວຍກົດໝາຍ ແລະ ການເຂົ້າເຖິງຄວາມຍຸຕິທຳ ເຊິ່ງເປັນວຽກທີ່ເລັ່ງດ່ວນທີ່ຈະຕ້ອງໄດ້ພ້ອມກັນ ຈັດຕັ້ງປະຕິບັດໃຫ້ເກີດດອກອອກຜົນ ແລະ ມີປະສິດທິພາບ ເພື່ອເປັນພື້ນຖານໃຫ້ການຈັດຕັ້ງປະຕິບັດໂຄງການດັ່ງກ່າວ ໃນໄລຍະສອງຢ່າງມີຜົນສຳເລັດ, ປະກອບສ່ວນສຳຄັນ ເຂົ້າໃນການພັດທະນາລະບົບຍຸຕິທຳ, ຂະແໜງການກົດໝາຍ, ວຽກງານໄອຍະການປະຊາຊົນ ແລະ ວຽກງານຕຸລາການປະຊາຊົນ ມີຄວາມເຕີບໃຫຍ່ເຂັ້ມແຂງ ແລະ ການສ້າງລັດທີ່ປົກຄອງດ້ວຍກົດໝາຍ ຢູ່ ສປປ ລາວ ນັບມື້ນັບມີຜົນສັກສິດ.