ແລກປ່ຽນຄຳຄິດເຫັນກ່ຽວກັບການເຄື່ອນໄຫວຈັດຕັ້ງປະຕິບັດວຽກງານຕິດຕາມ, ກວດກາພັກ ເພື່ອຫາລືວິທີແກ້ໄຂປັບປຸງໃຫ້ດີຂຶ້ນ

ວັນທີ 16  ພະຈິກ 2023, ທ່ານ ຄຳພັນ ພົມມະທັດ ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ  ໄດ້ເຄື່ອນໄຫວພົບປະ ໂອ້ລົມ ແລະ ແລກປ່ຽນຄຳຄິດຄໍາເຫັນ ກ່ຽວກັບການເຄື່ອນໄຫວຈັດຕັ້ງປະຕິບັດວຽກງານຕິດຕາມ, ກວດກາພັກ ຮ່ວມກັບ  ກົມກວດກາພັກ ຄະນະກວດກາສູນກາງພັກ,  ທ່ານໄດ້ເນັ້ນໃຫ້ພະນັກງານພາຍໃນກົມກວດກາພັກ ພ້ອມກັນຈັດຕັ້ງປະຕິບັດບັນດາມະຕິຕ່າງໆ ໃນຖານະເປັນເສນາທິການແກ່ຄະນະພັກ, ມີຄວາມຮັບຜິດຊອບເປັນເຈົ້າການໃນການຈັດຕັ້ງປະຕິບັດໃຫ້ລະອຽດຈະແຈ້ງ, ເຖິງຖອງ ແລະ ເປັນທຳ, ຖືເອົາການກວດກາພັກປົກກະຕິ, ເປັນບັນຫາທີ່ສຳຄັນ ແລະ ເປັນພື້ນຖານ. ພ້ອມທັງໃຫ້ຄວາມສຳຄັນໃນການຈັດຕັ້ງປະຕິບັດຕົວຈິງ ຕາມພາລະບົດບາດດ້ວຍຄວາມຮັບຜິດຊອບສູງ ຕໍ່ການຈັດຕັ້ງປະຕິບັດໜ້າທີ່ການເມືອງ ຢ່າງເຂັ້ມງວດ, ຮູ້ວິໄຈ, ຈຳແນກ, ໄຈ້ແຍກ ບັນຫາທີ່ຍັງເຮັດບໍ່ທັນໄດ້ ຫຼື ພາລະບົດບາດໄດ້ກຳນົດໄວ້ ຢ່າງມີປະສິດທິຜົນສູງ.

ນີ້ແມ່ນປະຕິບັດຕາມແຜນການຂອງຄະນະກວດກາສູນກາງພັກ ກ່ຽວກັບການລົງຕິດຕາກວດກາ ແລະ ຊຸກຍູ້ການເຄື່ອນໄຫວຈັດຕັ້ງປະຕິບັດວຽກງານຕິດຕາມ, ກວດກາພັກ ແລະ ເພື່ອສົນທະນາແລກ ປ່ຽນຄຳຄິດ, ຄຳເຫັນ, ສ້າງຄວາມຮັບຮູ້, ເຂົ້າໃຈໃນຂົງເຂດວຽກງານກວດກາພັກ ທັງຊອກເຫັນຈຸດສຳ ຄັນໃນບັນຫາທີ່ຄົງຄ້າງ, ຮູ້ສະພາບລວມ, ຈຸດອ່ອນຂໍ້ຄົງຄ້າງ ແລະ ປຶກສາຫາລືວິທີແກ້ໄຂ ເພື່ອປັບປຸງໃຫ້ດີຂຶ້ນ ສ້າງທັກສະແບບແຜນວິທີເຮັດວຽກ, ແບບແຜນນຳພາ-ຈັດຕັ້ງປະຕິບັດວຽກງານວິຊາສະເພາະ, ກຳນົດແຜນການ, ແຜນງານ ໃຫ້ມີການປ່ຽນແປງຢ່າງຕັ້ງໜ້າ, ເປັນການເພີ່ມຄວາມຮູ້,  ຄວາມສາ ມາດ ຂອງພະນັກງານ ໃນການຈັດຕັ້ງປະຕິບັດວຽກງານຕົວຈິງໃຫ້ມີຄຸນນະພາບ ແລະ ປະສິດທິຜົນສູງກວ່າເກົ່າ.