ລັດຖະມົນຕີກະຊວງປ້ອງກັນປະເທດອາຊຽນຮຽກຮ້ອງປະເທດມະຫາອໍານາດ ໃຊ້ອິດທິພົນຢັບຢັ້ງສົງຄາມຢູ່ກາຊາ
ວັນທີ 16 ພະຈິກ, ພົນໂທ ປຣາໂບໂວ ຊູບຽນໂຕ ລັດຖະມົນຕີກະຊວງປ້ອງກັນປະເທດອິນໂດເນເຊຍ ໃນຖານະປະທານກອງປະຊຸມລັດຖະມົນຕີປ້ອງກັນປະເທດອາຊຽນ (ASEAN Defence Ministers’ Meeting: ADMM) ຄັ້ງທີ 17 ເຊິ່ງຈັດຂຶ້ນຢູ່ນະຄອນຫລວງຈາກາຕາ ຖະແຫລງຮຽກຮ້ອງໃຫ້ມີການຢຸດສົງຄາມຢູ່ເຂດກາຊາ ໂດຍລະບຸວ່າ: ຫລາຍປະເທດອາຊຽນ ລວມທັງອິນໂດເນເຊຍ ແລະ ມາເລເຊຍ ຮຽກຮ້ອງໃຫ້ປະເທດທີ່ມີອໍານາດ ແລະ ອິດທິພົນທັງຫລາຍໃຊ້ອິດທິພົນຂອງພວກເຂົາເພື່ອຄຸ້ມຄອງພົນລະເຮືອນ.
ຖະແຫລງການຂອງລັດຖະມົນຕີກະຊວງປ້ອງກັນປະເທດອິນໂດເນເຊຍຍັງຮຽກຮ້ອງໃຫ້ມີການເຈລະຈາທາງສ້າງສັນໂດຍໄວສໍາລັບສະຖານະການຢູ່ເຂດກາຊາ ໂດຍກອງປະຊຸມລັດຖະມົນຕີປ້ອງກັນປະເທດອາຊຽນໄດ້ແລກປ່ຽນຄວາມຄິດເຫັນ ແລະ ສະແດງຄວາມກັງວົນຢ່າງເລິກເຊິ່ງຕໍ່ສະຖານະການຢູ່ເຂດກາຊາທີ່ກໍາລັງຮ້າຍແຮງ, ພ້ອມທັງຮຽກຮ້ອງໃຫ້ມີການຢຸດຍິງເພື່ອມະນຸດສະທໍາທັນທີ ເພື່ອຢຸດຄວາມຮຸນແຮງທີ່ເກີດຂຶ້ນ.
ທັງນີ້, ກອງປະຊຸມລັດຖະມົນຕີກະຊວງປ້ອງກັນປະເທດອາຊຽນ ຄັ້ງທີ 17 ແລະ ກອງປະຊຸມລັດຖະມົນຕີກະຊວງປ້ອງກັນປະເທດອາຊຽນກັບລັດຖະມົນຕີກະຊວງປ້ອງກັນປະເທດຄູ່ເຈລະຈາ ຄັ້ງທີ 10 (ADMM-Plus) ຈັດຂຶ້ນລະຫວ່າງວັນທີ 15-16 ພະຈິກ.
ມື້ທໍາອິດ, ກອງປະຊຸມໄດ້ສະແດງທ່າທີຮຽກຮ້ອງໃຫ້ຢຸດສົງຄາມລະຫວ່າງອິດສະລາແອນ ແລະ ຮາມັດ ແລະ ສະໜັບສະໜູນການຈັດຕັ້ງລະບຽງຊ່ວຍເຫລືອດ້ານມະນຸດສະທໍາຢູ່ກາຊາ. ນອກຈາກນີ້ ຍັງມີບັນຫາຂໍ້ຂັດແຍ່ງອານາເຂດຢູ່ທະເລຈີນໃຕ້ ເຊິ່ງກອງປະຊຸມໄດ້ຮຽກຮ້ອງໃຫ້ຈີນ ແລະ ຫລາຍປະເທດອາຊຽນທີ່ເປັນຄູ່ຂັດແຍ່ງຕອບຮັບຜົນສະຫລຸບການເຈລະຈາຂໍ້ຕົກລົງບໍ່ຮຸກຮານໃນຂັ້ນຕົ້ນ.
ສ່ວນກໍລະນີບັນຫາຄວາມຂັດແຍ່ງ ແລະ ການສູ້ຮົບຢູ່ມຽນມາ ທີ່ສະຖານະການກໍາລັງທະວີຄວາມຮຸນແຮງນັ້ນ ກອງປະຊຸມບໍ່ມີການອອກຖະແຫລງການຮຽກຮ້ອງໃດໆ ໂດຍລັດຖະມົນຕີກະຊວງປ້ອງກັນປະເທດອິນໂດເນເຊຍໄດ້ກ່າວສະແດງຄວາມເສຍໃຈຕໍ່ສະຖານະການທີ່ຮ້າຍແຮງຂຶ້ນ ແລະ ຢືນຢັນວ່າປະເທດອາຊຽນສະໜັບສະໜູນມຽນມາໃນການຫາທາງແກ້ໄຂບັນຫາຢ່າງສັນຕິ ແລະ ຍືນຍົງ.
ອ້າງອີງ:
- https://www.channelnewsasia.com/asia/asean-defence-ministers-meeting-gaza-israel-hamas-war-3925651
- https://www.channelnewsasia.com/asia/asean-defence-ministers-call-cease-gaza-israel-hamas-fighting-myanmar-violence-3921821
