ນາຍົກລັດຖະມົນຕີ ສະເໜີໃຫ້ລັດຖະບານຍີ່ປຸ່ນ ສືບຕໍ່ສົ່ງອາສາສະໝັກ ມາປະຕິບັດໜ້າທີ່ຢູ່ ສປປ ລາວ ຕາມຂະແໜງການທີ່ມີຄວາມຈຳເປັນ

ໃນເວລາທີ່ ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບ ອາສາສະໝັກຍີ່ປຸ່ນ ເຊິ່ງນຳໂດຍ ທ່ານ ເຄນອິຈິ ໂຄບະຢະຊິ (Kenichi KOBAYASHI), ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ແລະ ທ່ານ Shinichi KITAOKA ທີ່ປຶກສາພິເສດ ຂອງປະທານອົງການ JICA ປະຈຳສຳນັກງານໃຫຍ່ ທີ່ໂຕກຽວ ປະເທດຍີ່ປຸ່ນ  ເຂົ້າຢ້ຽມຂ່ຳນັບ ໃນວັນທີ 14 ພະຈິກ 2023ນີ້,

ທ່ານນາຍົກລັດຖະມົນຕີ ໄດ້ສະເໜີ ຕໍ່ທ່ານເອກອັກຄະລັດຖະທູດ ກໍຄື ລັດຖະບານຍີ່ປຸ່ນ ສືບຕໍ່ສົ່ງອາສາສະໝັກຂອງຕົນ ມາປະຕິບັດໜ້າທີ່ຢູ່ ສປປ ລາວ ຕາມຂະແໜງການທີ່ ສປປ ລາວ ມີຄວາມຈຳເປັນ ແລະ ຮຽກຮ້ອງຕ້ອງການ ໃນການພັດທະນາ ໃນປັດຈຸບັນ ກໍຄື ອະນາຄົດ ໂດຍເລືອກເຟັ້ນເອົາອາສາສະໝັກທີ່ມີບົດຮຽນ, ປະສົບການ ແລະ ມີຄວາມຮູ້ຄວາມສາມາດສະເພາະດ້ານ ເພື່ອມາ ຊ່ວຍຂະແໜງການ ແລະ ທ້ອງຖິ່ນຕ່າງໆຂອງລາວ;  ສືບຕໍ່ໃຫ້ຄວາມຮ່ວມມື ແລະ ຖ່າຍທອດຄວາມຮູ້ຄວາມສາມາດ ແລະ ເຕັກໂນໂລຊີ ໃຫ້ແກ່ວິຊາການຂອງລາວ;  ຮ່ວມເຮັດວຽກກັບອົງການປົກຄອງທ້ອງຖິ່ນທີ່ກ່ຽວຂ້ອງ ຮຽນຮູ້ວັດທະນະທຳ ແລະ ຮີດຄອງປະເພນີອັນດີງາມ ຂອງຊຸມຊົນທ້ອງຖິ່ນ ເພື່ອເປັນການປະກອບສ່ວນເຮັດໃຫ້ ສາຍພົວພັນມິດຕະພາບຂອງສອງປະເທດ ນັບມື້ນັບໄດ້ຮັບການພັດທະນາ ຢ່າງບໍ່ຢຸດຢັ້ງ  ພ້ອມທັງແຈ້ງໃຫ້ຊາບກ່ຽວກັບສະພາບພົ້ນເດັ່ນ ໃນການພັດທະນາເສດຖະກິດ-ສັງຄົມແຫ່ງຊາດ, ລວມທັງ ທິດທາງແຜນ ວຽກຈຸດສຸມໃນຕໍ່ໜ້າ ຂອງລັດຖະບານ ສປປ ລາວ.

ທາງດ້ານທ່ານເອກອັກຄະລັດຖະທູດ ປະເທດຍີ່ປຸ່ນ ປະຈຳ ສປປ ລາວ ຕາງໜ້າຄະນະທີ່ເຂົ້າຢ້ຽມຂ່ຳນັບ ໄດ້ສະແດງຄວາມຂອບໃຈ ແລະ ຕີລາຄາສູງການພົວພັນຮ່ວມມື ລະຫວ່າງ ຍີ່ປຸ່ນ ແລະ ສປປ ລາວ ໃນໄລຍະຜ່ານມາ;  ຂອບໃຈລັດຖະບານລາວ ທີ່ໄດ້ສະໜັບສະໜູນ ສ້າງເງື່ອນໄຂ ແລະ ອໍານວຍຄວາມສະດວກ ດ້ານຕ່າງໆ ໃຫ້ແກ່ອາສາສະໝັກຍີ່ປຸ່ນ ໃນການເຄື່ອນໄຫວປະຕິບັດໜ້າທີ່ຂອງຕົນເອງ ຢູ່ ສປປ ລາວ ເຮັດໃຫ້ມີຜົນ ສໍາເລັດທີ່ພົ້ນເດັ່ນຫລາຍດ້ານ; ຫວັງຢ່າງຍິ່ງວ່າ ໃນອະນາຄົດ ຈະສືບຕໍ່ໄດ້ຮັບການສະໜັບສະໜູນຈາກພາກສ່ວນທີ່ ກ່ຽວຂ້ອງຂອງ ສປປ ລາວ ເພື່ອຮ່ວມມືກັນຈັດຕັ້ງປະຕິບັດບັນດາແຜນການທີ່ໄດ້ຕົກລົງຮ່ວມກັນ ໃຫ້ມີຜົນສໍາເລັດ, ແລະ ມີປະສິດທິຜົນ, ສາມາດນໍາເອົາຜົນປະໂຫຍດມາສູ່ປະຊາຊົນຂອງສອງປະເທດ ພ້ອມທັງແຈ້ງໃຫ້ຊາບ ກ່ຽວກັບສະພາບການເຄື່ອນໄຫວວຽກງານ ຂອງອາສາສະໝັກຍີ່ປຸ່ນ ຢູ່ ສປປ ລາວ ຊຶ່ງເຫັນວ່າ ນັບແຕ່ປີ 1965 ເປັນຕົ້ນມາ, ອົງການ JICA ໄດ້ຈັດສົ່ງອາສາສະໝັກຍີ່ປຸ່ນ  1.059 ຄົນ ມາປະຕິບັດໜ້າທີ່ຢູ່ ສປປ ລາວ ເຊິ່ງມີຈຸດປະສົງ ເພື່ອແລກປ່ຽນ, ຖ່າຍທອດບົດຮຽນ ທາງດ້ານເຕັກນິກວິຊາການ ໃຫ້ພະນັກງານທີ່ກ່ຽວຂ້ອງ ຂອງ ສປປ ລາວ ໃນຂົງເຂດຕ່າງໆ ເປັນຕົ້ນ ຂະແໜງສຶກສາທິການ ແລະ ກິລາ, ຂະແໜງສາທາລະນະສຸກ, ຂະແໜງ ກະສິກຳ ແລະ ປ່າໄມ້, ການພັດທະນາຊົນນະບົດ ແລະ ອື່ນໆ.