ມາເລເຊຍ ປະເຊີນກັບການຂາດແຄນແນວພັນເຂົ້າ ສົ່ງຜົນໃຫ້ລາຄາເຂົ້າສູງຂຶ້ນ

ຂ່າວຕ່າງປະເທດລາຍງານ ວັນທີ 12 ພະຈິກ 2023, ສະພາບອາກາດທີ່ແປປວນອັນເປັນຜົນມາຈາກການປ່ຽນແປງສະພາບອາກາດ ເຮັດໃຫ້ຊາວກະສິກອນຜູ້ປູກເຂົ້າສ່ວນຫຼາຍໃນມາເລເຊຍຕ້ອງກຽມຄວາມພ້ອມ ເຖິງແມ່ນວ່າພວກເຂົາປ່ຽນໄປໃຊ້ກຳນົດການເກັບກ່ຽວເຂົ້າ 5 ຄັ້ງໃນທຸກໆ 2 ປີກໍຕາມ.

ນອກຈາກສະພາບອາກາດ, ບັນຫາອີກຢ່າງໜຶ່ງທີ່ຊາວນາປະເຊີນຄືການຂາດແຄນແນວພັນເຂົ້າ ສົ່ງຜົນໃຫ້ລາຄາເຂົ້າສູງຂຶ້ນ ຊຶ່ງຊາວກະສິກອນມາເລເຊຍອະທິບາຍວ່າ: ນີ້ເປັນສະຖານະການວິກິດ ແລະ ກັງວົນວ່າມັນຈະສົ່ງຜົນກະທົບຕໍ່ພວກເຂົາ ລວມເຖິງການຈັດຫາເຂົ້າພາຍໃນປະເທດດ້ວຍ. ທ້າວ ວັນ ມະຫາຣຸດດິນ ສຸໄລມານ ຊາວນາໃນລັດເກດະ ກ່າວວ່າ: ຊາວກະສິກອນພະຍາຍາມຊອກຫາແນວພັນເຂົ້າທີ່ໄດ້ຮັບການຮັບຮອງຈາກຜູ້ຈັດສົ່ງ ເຮັດໃຫ້ພວກເຂົາຕ້ອງລໍຖ້າລະດູການປູກ ຊຶ່ງຄວນຈະເລີ່ມຕັ້ງແຕ່ໄລຍະທ້າຍເດືອນກັນຍາທີ່ຜ່ານມາ ຊຶ່ງຊາວກະສິກອນສ່ວນຫຼາຍຈາກອົງການພື້ນທີ່ການກະເສດ (PPKS) ຕ້ອງການຈັດຫາແນວພັນເຂົ້າຈາກຜູ້ຈັດສົ່ງ ແຕ່ພວກເຮົາໄດ້ຮັບແຈ້ງວ່າບໍ່ມີແນວພັນເຂົ້າທີ່ໄດ້ຮັບການຮັບຮອງເລີຍ ໂດຍຜູ້ຈັດສົ່ງບາງທ່ານພະຍາຍາມຄວບຄຸມລາຄາແນວພັນເຂົ້າ ໂດຍກັກຕຸນສ່ວນທີ່ຄວນຂາຍໃຫ້ແກ່ຊາວກະສິກອນ ອີກທັງຊາວກະສິກອນບາງຄົນຍັງຊື້ແນວພັນເຂົ້າທີ່ຜ່ານການຮັບຮອງໃນລາຄາສູງກວ່າລາຄາເພດານທີ່ລັດຖະບານກຳນົດ ຫຼື ໄດ້ຮັບແນວພັນເຂົ້າໃນປະລິມານຈຳກັດ.

ອີກຢ່າງໜຶ່ງ, ຊາວກະສິກອນໃນພື້ນທີ່ອື່ນໆເຊັ່ນ: ລັດປີນັງ ແລະ ລັດປະລິສ ຕ່າງກໍປະເຊີນກັບບັນຫາດຽວກັນ ຂະນະທີ່ທ່ານ ຟາມີ ໄຊນອນ ປະທານຄະນະກຳມະການເຕັກໂນໂລຊີການກະເສດ ຄວາມໝັ້ນຄົງດ້ານອາຫານ ແລະ ການພັດທະນາສະຫະກອນຂອງລັດປີນັງ ກ່າວວ່າ: ມີການດຳເນີນມາດຕະການຕ່າງໆແລ້ວເຊັ່ນການກຳກັບເບິ່ງແຍງ ແລະ ການຄວບຄຸມການຜະລິດເຂົ້າກັບແນວພັນເຂົ້າທີ່ເຂັ້ມງວດຍິ່ງຂຶ້ນ ຊຶ່ງມັນເປັນສິ່ງສຳຄັນໃນການກວດສອບ ການຈັດຫາແນວພັນເຂົ້າໃນໂຮງງານຜະລິດຢ່າງຕໍ່ເນື່ອງ ແລະ ເພື່ອໃຫ້ແນ່ໃຈວ່າມີການສະໜອງພຽງພໍ.