ຫວຽດນາມເຂັ້ມງວດ ປະຫານຊີວິດ 18 ຄົນໃນຂໍ້ຫາຄ້າ-ຂາຍຢາເສບຕິດ
ອີງຕາມ ສຳນັກຂ່າວ Thairath ລາຍງານໃນວັນທີ 12 ພະຈິກ 2023 ວ່າ: ສານປະຊາຊົນນະຄອນໂຮ່ຈີມິນ ປະເທດ ຫວຽດນາມ ມີຄຳພິພາກສາໃຫ້ປະຫານຊີວິດ ທ້າວ ຄິມ ຊຸນຊິກ ອະດີດຕຳຫລວດຊາວ ສ. ເກົາຫລີ ອາຍຸ 63 ປີ, ທ້າວ ຄັງ ຊອນຮົກ ອາຍຸ 30 ປີ, ທ້າວ ຫລີ່ ທຽນກວນ ຊາວຈີນ ອາຍຸ 58 ປີ, ທ້າວ ເລີ ໂຫ ຫວູ່ ຫົວໜ້າແກ້ງຄ້າຢາເສບຕິດຊາວຫວຽດນາມ ອາຍຸ 36 ປີ ແລະ ພັກພວກ ອີກ 14 ຄົນ ໃນຄວາມຜິດຖານມີຢາເສບຕິດໄວ້ຄອບຄອງ ແລະ ຄ້າຢາເສບຕິດນ້ຳໜັກລວມ 216 ກິໂລກຣາມ ໃນລະຫວ່າງເດືອນ ພຶດສະພາ-ມິຖຸນາ 2020 ຜ່ານມາ, ນອກຈາກນີ້ ຍັງມີຄວາມຜິດໃນຂໍ້ຫາຄ້າມະນຸດນຳອີກ.
ຕຳຫລວດລະບຸວ່າ: ຢາເສບຕິດດັ່ງກ່າວຖືກລັກລອບນຳເຂົ້າຈາກກຳປູເຈຍ ແລະ ຖືກສົ່ງມາ ນະຄອນໂຮ່ຈີມິນ ກ່ອນຖືກຈັບໄດ້ລະຫວ່າງການກະກຽມຂົນສົ່ງໄປຍັງ ສ. ເກົາຫລີ.
ຫວຽດນາມເປັນປະເທດທີ່ມີກົດໝາຍຢາເສບຕິດທີ່ເຂັ້ມງວດ ຜູ້ທີ່ມີເຮໂລອິນຄອບຄອງຫລາຍກວ່າ 600 ກຣາມ ຫລື ມີຢາບ້າ ຫລາຍກວ່າ 2 ກິໂລເຄິ່ງ ມີໂທດເຖິງປະຫານຊີວິດ.
