ຈະລາຈອນ ປກສ ເມືອງນາໝໍ້ ສຶກສາອົບຮົມຜູ້ທີ່ດັດແປງສະພາບເຕັກນິກລົດ 10 ຄົນ ພ້ອມກັກລົດ 16 ຄັນ

ວັນທີ 9 ພະຈິກ 2023, ເຈົ້າໜ້າທີ່ກອງຈະລາຈອນ ປກສ ເມືອງນາໝໍ້ ແຂວງອຸດົມໄຊ ໄດ້ສຶກສາອົບຮົມກ່າວເຕືອນກຸ່ມໄວລຸ້ນດັດແປງສະພາບເຕັກນິກລົດ 10 ຄົນ, ພ້ອມກັກພາຫະນະດັດແປງສະພາບ 16 ຄັນ ທີ່ລະເມີດມາ ສຶກສາອົບຮົມກ່າວເຕືອນ ແລະ ວາງມາດຕະການຕໍ່ພາກສ່ວນດັ່ງກ່າວ ໃຫ້ປ່ຽນແປງສະພາບເຕັກນິກລົດ ໃຫ້ເປັນສະພາບປົກກະຕິ.

ພັຕ ສີວອນ ຈັນພາວົງ ຫົວໜ້າພະແນກຕໍາຫລວດ ປກສ ເມືອງນາໝໍ້ ໃຫ້ຮູ້ວ່າ: ໄລຍະຜ່ານມາເຈົ້າໜ້າທີ່ວິຊາສະເພາະໄດ້ສຸ່ມໃສ ເຄື່ອນໄຫວລົງໂຄສະນາເຜີຍແຜນິຕິກໍາກ່ຽວກັບຂໍ້ກໍານົດກົດລະບຽບການສັນຈອນໃນບັນດາໂຮງຮຽນ ແລະ ບ້ານຕ່າງໆ ຢ່າງເປັນປົກກະຕິ, ແຕ່ຍັງມີກຸ່ມຄົນຈໍານວນໜຶ່ງຍັງສືບຕໍ່ເຄື່ອນໄຫວລະເມີດຕໍ່ລະບຽບ ທີ່ໄດ້ກໍານົດພາເກີດມີບັນຫາຫຍໍ້ທໍ້ດ້ວຍຫລາຍກໍລະນີເຊັ່ນ: ມີການດັດແປງສະພາບເຕັກນິກລົດ ພາໃຫ້ເກີດມີຄວາມສ່ຽງຕໍ່ການເກີດອຸບັດຕິເຫດ, ໃສ່ຢາງລໍ້ນ້ອຍເກີນຂະໜາດ, ດັດແປງທໍ້ໃສ່ສຽງດັງກວນເມືອງ, ສ້າງຄວາມລໍາຄານໃຫ້ແກ່ສັງຄົມ ແລະ ອື່ນທີ່ບໍ່ປອດໄພ.