ຄະນະຮັບຜິດຊອບແກ້ໄຂສຽງເນືອງນັນ ລົງກວດກາຮ້ານອາຫານ-ຮ້ານບັນເທີງ ຢູ່ເມືອງສີໂຄດຕະບອງ ພົບຫລາຍຮ້ານລະເມີດລະບຽບການ

ທ່ານ ພັນໂທ ອິນພອນ ບຸນພະຈັນ ໃຫ້ສໍາພາດໃນວັນທີ 10 ພະຈິກ 2023 ວ່າຈຸທີ 4 ທີ່ທ່ານຮັບຜິດຊອບຢູ່ໃນຂອບເຂດ 3 ເມືອງ ຄື: ສີໂຄດຕະບອງ, ນາຊາຍທອງ ແລະ ສັງທອງ ສະເພາະໃນວັນທີ 10 ພະຈິກ 2023 ໄດ້ລົງຕິດຕາມກວດກາຢູ່ເຂດເມືອງສີໂຄດຕະບອງ ເຊິ່ງຜ່ານການຕິດຕາມຕົວຈິງໄດ້ພົບເຫັນຮ້ານອາຫານ ແລະ ຮ້ານບັນເທີງຈໍານວນຫລາຍຮ້ານ ມີການລະເມີດລະບຽບການ, ເປີດບໍລິການກາຍເວລາທີ່ີກໍານົດໄວ້ ຈຶ່ງໄດ້ເຂົ້າກວດກາສະຖານທີ່, ເຮັດບົດບັນທຶກ ແລະ ເຮັດໜັງສືເຊີນຜູ້ປະກອບການມາເຕືອນ-ສຶກສາອົບຮົມ ຢູ່ກອງບັນຊາການ ປກສ ນະຄອນຫລວງວຽງຈັນ ໃນອາທິດໜ້ານີ້. ພ້ອມນີ້ກໍມີຫລາຍຮ້ານທີ່ປະຕິບັດໄດ້ດີ ມີການປິດຮ້ານຕາມກໍານົດເວລາຂອງກົດລະບຽບ.

ກົດລະບຽບການເປີດປິດຮ້ານແມ່ນ: ການຮ້ານອາຫານກາງແຈ້ງ ໃຫ້ປິດສຽງເພງ ແລະ ປິດຮັບລູກຄ້າ ເວລາ 23:00 ໂມງ ແລະ ປິດຮ້ານເວລາ 24:00 ໂມງ. ສ່ວນຮ້ານບັນເທີງ ແມ່ນໃຫ້ປິດສຽງ-ປິດຮັບລູກຄ້າ ເວລາ 24:00 ໂມງ ແລະ ປິດຮ້ານເວລາ 1:00 ໂມງ.

ທ່ານຍັງໄດ້ກ່າວຕື່ມວ່າ: ການລົງກວດກາຄັ້ງນີ້ຄະນະຮັບຜິດຊອບແກ້ໄຂສຽງເນືອງນັນ ແມ່ນໄດ້ສະແດງຄວາມຊົມເຊີຍຜູ້ປະກອບການຮ້ານອາຫານ ແລະ ຮ້ານບັນເທີງທີ່ປະຕິບັດລະບຽບໄດ້ດີ. ພ້ອມນີ້, ກໍຂໍຮຽກຮ້ອງໃຫ້ບັນດາຮ້ານທີ່ຍັງປະຕິບັດບໍ່ໄດ້ ຈົ່ງໃຫ້ການຮ່ວມມືກັບຄະນະສະເພາະກິດພວກເຮົາ ແລະ ປະຕິບັດຕາມລະບຽບ ແຈ້ງການຢ່າງເຂັ້ມງວດ, ໂດຍສະເພາະດໍາລັດສະບັບເລກທີ 315/ລບ ລົງວັນທີ 2 ຕຸລາ 2017 ວ່າດ້ວຍການບັນເທີງ ແລະ ຂໍ້ຕົກລົງສະບັບເລກທີ 620/ຈນວ ລົງວັນທີ 29 ກັນຍາ 2020 ວ່າດ້ວຍການຄວບຄຸມສຽງເນືອງນັນ ຢູ່ນະຄອນຫລວງວຽງຈັນ ເພື່ອແນໃສ່ແກ້ຫາງສຽງຈົ່ມວ່າຂອງສັງຄົມກ່ຽວກັບສຽງເນືອງນັນຈາກບັນດາຮ້ານອາຫານ ແລະ ຮ້ານບັນເທີງ ລົບກວນປະຊາຊົນທີ່ຢູ່ອ້ອມຂ້າງນັບມື້ຫລຸດລົງ ແລະ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.

ຂໍ້ມູນ: ໜັງສືພິມວຽງຈັນໃໝ່