ເກນຢາປະກາດມື້ພັກພິເສດ 13 ພະຈິກນີ້ ກຽມປູກຕົ້ນໄມ້ທົ່ວປະເທດ ຕັ້ງເປົ້າ 1,5 ໝື່ນລ້ານຕົນພາຍໃນປີ 2032
ທາງການເກນຢາປະກາດໃຫ້ວັນທີ 13 ພະຈິກນີ້ ເປັນມື້ພັກພິເສດທີ່ເປີດໂອກາດໃຫ້ປະຊາຊົນຊ່ວຍກັນປູກຕົ້ນໄມ້ທົ່ວປະເທດ ເພື່ອຮັບມືວິກິດການປ່ຽນແປງສະພາບອາກາດໂລກ ເຊິ່ງສະທ້ອນໃຫ້ເຫັນເຖິງຄວາມພະຍາຍາມສ່ວນໜຶ່ງຂອງລັດຖະບານເກນຢາທີ່ຕ້ອງການຈະປູກຕົ້ນໄມ້ໃຫ້ໄດ້ 1,5 ໝື່ນລ້ານຕົ້ນພາຍໃນປີ 2032.
ທ່ານ ຄິທູຣີ ຄິນດິກິ ລັດຖະມົນຕີກະຊວງປ້ອງກັນປະເທດຂອງເກນຢາ ລະບຸວ່າ: “ລັດຖະບານເກນຢາໄດ້ປະກາດມື້ພັກພິເສດຂຶ້ນໃນວັນທີ 13 ພະຈິກນີ້ ເພື່ອໃຫ້ປະຊາຊົນຊາວເກນຢາໄດ້ສະແດງອອກເຖິງຄວາມຮັກຊາດດ້ວຍການຮ່ວມກັນປູກຕົ້ນໄມ້ ເພື່ອຊ່ວຍກັນປົກປ້ອງປະເທດຈາກຜົນກະທົບທີ່ຮ້າຍແຮງຂອງການປ່ຽນແປງສະພາບອາກາດ”.
ປັດຈຸບັນ ເກນຢາມີເນື້ອທີ່ປ່າປະມານ 7% ໂດຍລັດຖະບານເກນຢາໄດ້ຈັດສັນງົບປະມານ 80 ລ້ານກວ່າໂດລາສະຫະລັດ ເພື່ອເພີ່ມເນື້ອທີ່ປ່າໄມ້ໃຫ້ເພີ່ມຂຶ້ນຫລາຍກວ່າ 10% ຂອງເນື້ອທີ່ທັງໝົດ ເຊິ່ງບັນຫາການຕັດໄມ້ທໍາລາຍປ່າເປັນໜຶ່ງໃນສາເຫດສໍາຄັນທີ່ເຮັດໃຫ້ປະລິມານຕົ້ນໄມ້ຢູ່ເກນຢາຫລຸດຈໍານວນລົງ ແລະ ສົ່ງຜົນຕໍ່ປະລິມານການດູດຊັບແກັສກາກບອນໃນຊັ້ນບັນຍາກາດ.
ປັດຈຸບັນ ເກນຢາ ແລະ ອີກຫລາຍປະເທດໃນອາຟຣິກາກໍາລັງຜະເຊີນບັນຫາການປ່ຽນແປງສະພາບອາກາດໂລກ ແລະ ວິກິດໂລກຮ້ອນ ທີ່ສົ່ງຜົນເຮັດໃຫ້ເກີດວິກິດໄພແຫ້ງແລ້ງຮຸນແຮງ, ປະລິມານນໍ້າຝົນຕໍ່າກວ່າເກນເຖິງ 5 ປີຕິດຕໍ່ກັນ ລັດຖະບານເກນຢາຈຶ່ງສະໜັບສະໜູນການປູກຕົ້ນໄມ້ຢ່າງຈິງຈັງ ໂດຍມຸ້ງຫວັງວ່າ: ໂຄງການປູກຕົ້ນໄມ້ທົ່ວປະເທດນີ້ຈະມີສ່ວນຊ່ວຍເຮັດໃຫ້ສະຖານະການດ້ານສິ່ງແວດລ້ອມໂລກດີຂຶ້ນກວ່າເກົ່າ.
ທ່ານ ວິລລຽມ ຣູໂຕ ປະທານາທິບໍດີເກນຢາ ໄດ້ໃຫ້ຄວາມສໍາຄັນຕໍ່ການຟື້ນຟູສິ່ງແວດລ້ອມ ແລະ ລະບົບນິເວດນັບແຕ່ກ່ອນເຂົ້າຮັບຕໍາແໜ່ງຜູ້ນໍາປະເທດໃນເດືອນກັນຍາ 2022.
ອ້າງອີງ:
- www.theguardian.com/world/2023/nov/07/kenya-makes-13-november-nationwide-tree-planting-day-a-public-holiday
- www.independent.co.uk/climate-change/news/climate-crisis-trees-kenya-planting-holiday-b2442983.html
- https://abcnews.go.com/International/wireStory/kenya-declares-surprise-public-holiday-national-campaign-plant-104683306
