ສານປະຊາຊົນສູງສຸດ ລາຍງານການແກ້ໄຂຄະດີ ກາງສະໄໝ ຕໍ່ກອງປະຊຸມສະໄໝສາມັນ ເທື່ອທີ 6

ວັນທີ 8 ພະຈິກ 2023 ທ່ານນາງ ວຽງທອງ ສີພັນດອນ ປະທານສານປະຊາຊົນສູງສຸດ ລາຍງານໃຫ້ຮູ້ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ວ່າ: ໄລຍະກາງໄສໄໝ 2 ປີເຄິ່ງ ສານປະຊາ ຊົນສູງສຸດ ໄດ້ສຸມໃສ່ປັບປຸງການດຳເນີນຄະດີຢູ່ສານແຕ່ລະຂັ້ນໃຫ້ມີຄວາມວ່ອງໄວ ແລະ ມີຄຸນນະພາບ, ໄດ້ຄົ້ນ ຄວ້າຈັດວາງກຳລັງຜູ້ພິພາກສາ ແລະ ຜູ້ຊ່ວຍຜູ້ພິພາກສາ ຢູ່ສານແຕ່ລະແຫ່ງໃຫ້ແທດເໝາະກັບຄວາມຮູ້-ຄວາມສາ ມາດ ແລະ ຊັ້ນຜູ້ພິພາກສາ ຕິດພັນກັບປະສົບການຂອງຜູ້ພິພາກສາແຕ່ລະຄົນ, ຫັນເອົາຜູ້ພິພາກສາ ລົງຊ່ວຍແກ້ໄຂ ຄະດີຕາມທິດ 3 ສ້າງຢູ່ສານບ່ອນທີ່ຜູ້ພິພາກສາບໍ່ພຽງພໍ ແລະ ມີຄະດີເກີດຂຶ້ນຫລາຍ ເຊັ່ນ ສານປະຊາຊົນແຂວງ ໄຊສົມບູນ, ບໍ່ແກ້ວ, ຄໍາມ່ວນ, ຜົ້ງສາລີ ແລະ ນະຄອນຫລວງວຽງຈັນ, ພ້ອມທັງ ແຕ່ງຕັ້ງຄະນະຮັບຜິດຊອບຊຸກຍູ້, ຕິດຕາມຂະບວນການໂຕ້ແຍ່ງ ແລະ ໂຕ້ຖຽງ ໃນການດຳເນີນຄະດີຢູ່ສານແຕ່ລະຂັ້ນ ເຮັດໃຫ້ 2 ປີເຄິ່ງຜ່ານມາ ສາ ມາດແກ້ໄຂຄະດີໄດ້ທັງໝົດ 18.944 ເລື່ອງ.

ສະເພາະ ໃນປີ 2023, ສານປະຊາຊົນ ໄດ້ເຄື່ອນໄຫວປະຕິບັດວຽກງານສຳເລັດໃນຫລາຍດ້ານ ເປັນຕົ້ນ ໄດ້ປະກາດສ້າງຕັ້ງສານປະຊາຊົນເຂດ 4 ແຂວງຫລວງພະບາງ ແລະ ກະກຽມຄວາມພ້ອມສ້າງຕັ້ງສານເຂດ II ແຂວງເຊກອງ ແລະ ເຂດ II ແຂວງອັດຕະປື, ພ້ອມທັງ ສຸມໃສ່ການດຳເນີນຄະດີຢູ່ສານແຕ່ລະຂັ້ນໃຫ້ມີຄວາມວ່ອງ ໄວ, ໄດ້ນໍາເອົາໂຈດ-ຈໍາເລີຍເຂົ້າຮ່ວມໃນການດຳເນີນຄະດີຢູ່ສານ ເພື່ອໂຕ້ແຍ່ງ, ໂຕ້ຖຽງກ່ຽວກັບຄະດີ ໃຫ້ລະອຽດ, ຈະແຈ້ງ ແລະ ສິ້ນສຸດຂະບວນການໂຕ້ແຍ່ງກ່ອນສານຈະຕັດສິນຄະດີ, ໄດ້ແຕ່ງຕັ້ງຄະນະຮັບຜິດຊອບແບ່ງເປັນຈຸ ລົງຊຸກຍູ້, ຕິດຕາມການໂຕ້ແຍ່ງ-ໂຕ້ຖຽງຢູ່ສານຂັ້ນຕົ້ນ, ອອກຄຳແນະນຳກ່ຽວກັບການດຳເນີນຄະດີກ່ຽວກັບຢາເສບ ຕິດ, ການສະເໜີອອກຊີ້ຂາດຢັ້ງຢືນໂທດປະຫານຊິວິດ, ຜ່ານການປະຕິບັດຕົວຈິງ ສາມາດແກ້ໄຂຄະດີວ່ອງໄວ ແລະ ມີຄຸນນະພາບ ສະແດງອອກ ສານຂັ້ນຕົ້ນ ສາມາດຕັດສິນຄະດີໄດ້ ທັງໝົດ 9.103 ເລື່ອງ, ຖືກຂໍອຸທອນ 1.269 ເລື່ອງ. ໃນນັ້ນ, ຄະດີອາຍາ ແກ້ໄຂໄດ້ 4.802 ເລື່ອງ, ຄະດີແພ່ງ ແກ້ໄຂໄດ້ 851 ເລື່ອງ, ຄະດີການຄ້າ ແກ້ໄຂໄດ້ 96 ເລື່ອງ, ຄະດີຄອບຄົວ ແກ້ໄຂໄດ້ 280 ເລື່ອງ, ຄະດີເດັກ ແກ້ໄຂໄດ້ 189 ເລື່ອງ, ຄະດີແຮງງານ ແກ້ໄຂໄດ້ 26 ເລື່ອງ, ຄະດີປົກຄອງ ພວມຄົ້ນຄວ້າ 4 ເລື່ອງ. ສຳລັບສານທະຫານພາກ ແກ້ໄຂຄະດີໄດ້ 59 ເລື່ອງ; ສານຂັ້ນອຸທອນ ສາມາດພິພາກສາທັງໝົດ 1.269 ເລື່ອງ, ຖືກຂໍລົບລ້າງ 515 ເລື່ອງ ໃນນັ້ນ, ຄະດີອາຍາ ແກ້ໄຂໄດ້ 248 ເລື່ອງ, ຄະດີແພ່ງ ແກ້ໄຂໄດ້ 311 ເລື່ອງ, ຄະດີການຄ້າ ແກ້ໄຂໄດ້ 114 ເລື່ອງ, ຄະດີຄອບຄົວ ແກ້ໄຂໄດ້ 39 ເລື່ອງ, ຄະດີເດັກມີ 1 ເລື່ອງ ບໍ່ທັນໄດ້ແກ້ໄຂ, ຄະດີແຮງງານ ແກ້ໄຂໄດ້ 9 ເລື່ອງ; ສານທະຫານຂັ້ນສູງ ແກ້ໄຂໄດ້ 6 ເລື່ອງ. ສ່ວນ ສານຂັ້ນລົບລ້າງ ຄະດີອາຍາ ແກ້ໄຂໄດ້ 91 ເລື່ອງ, ຄະດີແພ່ງ ແກ້ໄຂໄດ້ 205 ເລື່ອງ, ຄະດີການຄ້າ ແກ້ໄຂໄດ້ 27 ເລື່ອງ, ຄະດີຄອບຄົວ ແກ້ໄຂໄດ້ 27 ເລື່ອງ, ຄະດີເດັກ ແກ້ໄຂໄດ້ 3 ເລື່ອງ, ຄະດີແຮງງານ ແກ້ໄຂໄດ້ 5 ເລື່ອງ, ໄດ້ຮັບຄຳສະເໜີຮື້ຟື້ນ 85 ເລື່ອງ, ແກ້ໄຂໄດ້ 56 ເລື່ອງ ແລະ ອອກຄຳຊີ້ຂາດໂທດປະຫານຊີວິດ 51 ສະບັບ ພ້ອມທັງ ປະຕິບັດວາລະແຫ່ງຊາດ ໂດຍການລົງຊຸກຍູ້ສານທ້ອງຖິ່ນ 24 ຄັ້ງ.

ສຳລັບ ທິດທາງການເຄື່ອນໄຫວໃນທ້າຍສະໄໝ (2023-2025) ສານປະຊາຊົນສູງສຸດ ຈະສືບຕໍ່ປັບປຸງ ແລະ ພັດທະນາກົນໄກການດຳເນີນຄະດີ, ສ້າງແຜນການດຳເນີນຄະດີແຕ່ເບື້ອງຕົ້ນ, ຍົກສູງການໂຕ້ແຍ່ງ-ໂຕ້ຖຽງໃນ ທີ່ປະຊຸມສານ, ເອົາບຸກຄົນທີສາມເຂົ້າຮ່ວມໃນການດຳເນີນຄະດີ ຢ່າງຄົບຖ້ວນ; ຄົ້ນຄວ້າຂະຫຍາຍກອບການຕັດ ສິນຄະດີໂດຍຜູ້ພິພາກສາຜູ້ດຽວ, ຈັດຕັ້ງຄະນະສານເຄື່ອນທີ່ໃຫ້ຫລາຍຂຶ້ນ. ພ້ອມທັງ ປັບປຸງກົດໝາຍໃຫ້ໄດ້ 2 ສະບັບ, ສ້າງ ແລະ ປັບປຸງນິຕິກຳໃຕ້ກົດໝາຍ ໃຫ້ສຳເລັດຕາມແຜນການ;ສືບຕໍ່ສ້າງຄວາມເຂັ້ມແຂງໃຫ້ສະຖາບັນ ຄົ້ນຄວ້າ ແລະ ຝຶກອົບຮົມ ໃນການຈັດຕັ້ງຝຶກອົບຮົມ ເພື່ອຍົກລະດັບຄວາມຮູ້, ຄວາມສາມາດ ແລະ ຄຸນສົມບັດ ສິນທຳປະຕິວັດ ຂອງພະນັກງານ-ຜູ້ພິພາກສາຂອງສານ ແລະ ຈະສືບຕໍ່ຄົ້ນຄວ້າສ້າງຕັ້ງສານປະຊາຊົນເຂດ ໃຫ້ໄດ້ 2 ເຂດ, ໜ່ວຍງານສານເຂດປະຈໍາເມືອງ ໃຫ້ໄດ້ 2 ເມືອງ, ພ້ອມທັງສ້າງຄວາມເຂັ້ມແຂງໃຫ້ຄະນະສານປົກຄອງ ແລະ ສ້າງເງື່ອນໄຂ ສ້າງຕັ້ງສານເດັກ ຢູ່ນະຄອນຫລວງວຽງຈັນ.