ແຂວງເຮີຍຫລົງຈຽງ ທາງເໜືອສຸດຂອງຈີນ ປະກາດເຕືອນໄພ ພາຍຸຫິມະ ເປັນລະດັບສີແດງ

ສຳນັກຂ່າວຊິນຮວາ ລາຍງານ ວັນທີ 6 ພະຈິກ 2023 ວ່າ: ໜ່ວຍງານ ອຸຕຸນິຍົມວິທະຍາປະຈຳແຂວງ ເຮີຍຫລົງຈຽງ ທາງພາກເໜືອຂອງຈີນ ໄດ້ປະກາດເຕືອນໄພສະພາບອາກາດຈາກພາຍຸຫິມະ ເປັນລະດັບສີແດງແລ້ວ.

ລາຍງານລະບຸວ່າ ແຕ່ວັນອາທິດ ວັນທີ 5 ພະຈິກນີ້ ເປັນຕົ້ນມາ ຫລາຍເມືອງ ພາຍໃນແຂວງເຮີຍຫລົງຈຽງ ປະສົບກັບຫິມະຕົກໜັກ ສະເລ່ຍຄວາມໜາຂອງ ຫິມະປະມານ 20-40 ມິນລີແມັດ ແລະ ໃນບາງພື້ນທີ່ອາດມີປະລິມານຫິມະໜາເຖິງ 40 ມິນລີແມັດ.

ນະຄອນ ຮາເອີຣ໌ປິງ ເມືອງເອກຂອງ ແຂວງເຮີຍຫລົງຈຽງ ໄດ້ປະກາດເຕືອນໄພເປັນລະດັບສີແດງ, ສຳນັກການສຶກສາທ້ອງຖິ່ນປະກາດໃຫ້ ໂຮງຮຽນອະນຸບານ, ປະຖົມ ແລະ ມັດທະຍົມຕົ້ນ ຢຸດການຮຽນ-ການສອນ ຊົ່ວຄາວ.