ສິງກະໂປຢືນຢັນຍັງບໍ່ພົບ ມາລາເລຍດື້ຢາທີ່ລະບາດໃນອາຊຽນ
ກະຊວງສາທາລະນະສຸກສິງກະໂປແຈ້ງວ່າ: ຍັງບໍ່ມີລາຍງານຜູ້ປ່ວຍຕິດເຊື້ອຊູເປີມາລາເລຍ ເຊິ່ງເປັນມາລາເລຍດື້ຢາທີ່ໃຊ້ປິ່ນປົວໃນປັດຈຸບັນ, ພາຍຫລັງມີລາຍງານວ່າເຊື້ອນີ້ລະບາດໃນຫລາຍປະເທດອາຊີຕາເວັນອອກສຽງໃຕ້ (ອາຊຽນ).
ໂຄສົກກະຊວງສາທາລະນະສຸກສິງກະໂປກ່າວວ່າ: ເຖິງວ່າຍັງບໍ່ມີລາຍງານຜູ້ຕິດເຊື້ອຊູເປີມາລາເລຍ, ທາງກະຊວງພວມຕິດຕາມສະຖານະການການລະບາດຂອງຊູເປີມາລາເລຍໃນອາຊຽນຢ່າງໃກ້ຊິດ ທັງກຳປູເຈຍ, ລາວ, ມຽນມາ, ໄທ ແລະ ຫວຽດນາມ. ເຊື້ອປໍລະສິດມາລາເລຍດື້ຢານີ້ພວມແຜ່ລະບາດທົ່ວພາກພື້ນຢ່າງວ່ອງໄວ, ບໍ່ສາມາດຂ້າໄດ້ດ້ວຍຢາປິ່ນປົວມາລາເລຍທີ່ໃຊ້ໃນປັດຈຸບັນ, ກວດພົບເທື່ອທຳອິດຢູ່ກຳປູເຈຍໃນປີ 2007, ວົງການນັກວິທະຍາສາດຮຽກຮ້ອງໃຫ້ເລັ່ງຮັບມືຢ່າງວ່ອງໄວກ່ອນເຊື້ອຈະແຜ່ລະບາດຂ້າມໄປຮອດອິນເດຍ ຫລື ອາຟຣິກາ.
ໂຄສົກກະຊວງສາທາລະນະສຸກສິງກະໂປແນະນຳປະຊາຊົນໃຫ້ເພີ່ມຄວາມລະມັດລະວັງເມື່ອເດີນທາງໄປປະເທດທີ່ມີມາລາເລຍລະບາດເຊັ່ນ: ໃຊ້ຢາກັນຍຸງ, ໃສ່ເສື້ອຜ້າປົກປິດ, ນອນໃນມຸ້ງ, ຂໍຄຳແນະນຳເລື່ອງຢາຕ້ານມາລາເລຍກ່ອນເດີນທາງ. ກະຊວງດັ່ງກ່າວເປີດເຜີຍອີກວ່າ: ນັບແຕ່ຕົ້ນປີຈົນຮອດວັນທີ 16 ກັນຍາ, ສິງກະໂປພົບຜູ້ປ່ວຍມາລາເລຍທຳມະດາທັງໝົດ 27 ຄົນ. ເຖິງຢ່າງໃດກໍດີ, ອົງການອະນາໄມໂລກປະກາດໃຫ້ສິງກະໂປປອດມາລາເລຍແຕ່ປີ 1982 ປະເທດທີ່ຈະໄດ້ຮັບການປະກາດຮັບຮອງແບບນີ້ຈະຕ້ອງຜ່ານການພິສູດວ່າທົ່ວປະເທດບໍ່ມີການແຜ່ລະບາດຂອງເຊື້ອປໍລະສິດມາລາເລຍໃນຄົນຢ່າງໜ້ອຍ 3 ປີຕິດຕໍ່ກັນ ແລະ ຈະຕ້ອງມີລະບົບການເຝົ້າລະວັງລະດັບປະເທດທີ່ຈະສາມາດກວດພົບ ແລະ ຮັບມືກັບການລະບາດໃນປະເທດໄດ້ຢ່າງວ່ອງໄວ.
ເວັບໄຊໜັງສືພິມສເຕຣທາມຂອງສິງກະໂປລາຍງານວ່າ: ປີ 2015 ທົ່ວໂລກມີຜູ້ປ່ວຍມາລາເລຍປະມານ 12 ລ້ານຄົນ ໃນຈຳນວນນີ້ເສຍຊີວິດ 429.000 ຄົນ, ຜູ້ເສຍຊີວິດ 6% ຢູ່ໃນອາຊຽນ.
