ADB ຮັກສາຕົວເລກການເຕີບໃຫຍ່ ທາງເສດຖະກິດໃນອາຊີ 2017
ທະນາຄານເພື່ອການພັດທະນາອາຊີ (ADB) ລາຍງານວ່າ: ປະເທດກຳລັງພັດທະນາໃນອາຊີຍັງຮັກສາການຂະຫຍາຍຕົວທາງເສດຖະກິດໃນອັດຕາທີ່ໄວຂຶ້ນໃນປີນີ້ ແລະ ປີໜ້າ ໂດຍໄດ້ແຮງໜຸນຈາກການຄ້າໂລກ ແລະ ການຂະຫຍາຍຕົວຂອງຈີນ, ແຕ່ອາດມີຄວາມສ່ຽງຈາກການດຳເນີນນະໂຍບາຍການເງິນທີ່ເຂັ້ມງວດຂຶ້ນຂອງອາເມລິກາ.
ສຳນັກງານ ADB ຢູ່ຟີລິບປິນ ລາຍງານຄາດວ່າ: ຕົວເລກການເຕີບໃຫຍ່ໃນອາຊີຢູ່ລະດັບ 5,9% ແລະ 5,8% ໃນປີ 2017 ແລະ 2018 ຕາມລຳດັບ ເຊິ່ງເປັນຕົວເລກເກົ່າບໍ່ປ່ຽນແປງຈາກທີ່ເຄີຍຄາດຄະເນໄວ້ໃນເດືອນກໍລະກົດ, ແຕ່ຖືວ່າຫລາຍກວ່າ 5,7% ທີ່ເຄີຍຄາດການໄວ້ທັງສອງປີໃນລາຍງານທ່າອ່ຽງການພັດທະນາອາຊີໃນເດືອນເມສາ. ທ່ານ ຢາຊູຢູກິ ຊາວາດະ ຫົວໜ້າທີມເສດຖະສາດ ADB ຖະແຫລງໃນລາຍງານຫລ້າສຸດປີ 2017 ຄາດວ່າ: ເສດຖະກິດຈີນຈະຂະຫຍາຍຕົວ 6,7% ແລະ 6,4% ໃນປີນີ້ ແລະ ປີໜ້າ. ຕົວເລກການເຕີບໃຫຍ່ໂດຍລວມໃນອາຊີຢູ່ໃນໄລຍະຂາຂຶ້ນ ໂດຍແນະນຳວ່າປະເທດກຳລັງພັດທະນາໃນອາຊີຄວນຖືໂອກາດໄລຍະເສດຖະກິດທີ່ດີໃນໄລຍະອັນໃກ້ນີ້ລົງທຶນໃນໂຄງສ້າງພື້ນຖານ, ຍົກລະດັບການຜະລິດ ແລະ ຮັກສານະໂຍບາຍເສດຖະກິດທີ່ເອື້ອປະໂຫຍດຕໍ່ການເຕີບໃຫຍ່ໃນໄລຍະຍາວ. ເສດຖະກິດໃນພາກພື້ນອາຊີຕາເວັນອອກສຽງໃຕ້ຈະຂະຫຍາຍຕົວ 5% ໃນປີນີ້ ແລະ 5,1% ໃນປີໜ້າ. ADB ລາຍງານວ່າ: ອິນໂດເນເຊຍ, ມາເລເຊຍ, ໄທ ແລະ ໄຕ້ຫວັນ ຈະໄດ້ປະໂຫຍດຈາກນະໂຍບາຍເສດຖະກິດແບບຜ່ອນຄາຍ, ແຕ່ບາງປະເທດອາດມີບັນຫາຄວາມສ່ຽງເງິນເຟີ້.
