ພາກລັດມຸ່ງປັບປຸງມາດຕະຖານການສຶກສາກະຕຸ້ນເຍົາວະຊົນຮຽນຕໍ່ສູງຂຶ້ນ

ທ່ານ ຄໍາເຈນ ວົງໂພສີ ລັດຖະມົນຕີວ່າການກະຊວງແຜນການ ແລະ ການລົງທຶນ ລາຍງານຕໍ່ກອງປະຊຸມສາມັນ ຄັ້ງທີ 6 ຂອງສະພາແຫ່ງຊາດຊຸດທີ IX ໃນວັນທີ 31 ຕຸລາ ຜ່ານມານີ້ວ່າ: ເປົ້າໝາຍຮີບດ່ວນຄືການມີນັກຮຽນ 2.500 ຄົນ,ຮຽນຕໍ່ມະຫາວິທະຍາໄລ ຫລື ສະຖາບັນການສຶກສາລະດັບສູງອື່ນໆ ໃນສາຂາວິທະຍາສາດທໍາມະຊາດ, ເຕັກໂນໂລຊີ, ວິສະວະກໍາສາດ ແລະ ຄະນິດສາດ. ສ່ວນອີກໜຶ່ງເປົ້າໝາຍຄືການເພີ່ມອັດຕາເຂົ້າຮຽນອະນຸບານຂອງເດັກອາຍຸ 5 ປີ ໃຫ້ເຖິງລະດັບ 82%.

ສປປ ລາວ ຈະພະຍາຍາມເພີ່ມອັດຕາການລົງທະບຽນຮຽນຊັ້ນປະຖົມສຶກສາປີທີ 1 ໃຫ້ເຖິງລະດັບ 98% ແລະ ຊັ້ນປະຖົມສຶກສາປີທີ 5 ໃຫ້ເຖິງລະດັບ 97% ພາຍໃນປີ 2024, ຂະນະດຽວກັນຈໍານວນນັກຮຽນຊັ້ນປະຖົມສຶກສາປີທີ 1 ທີ່ເລີກຮຽນກາງສະໄໝບໍ່ຄວນເກີນ 4,4% ຂອງເດັກນ້ອຍທັງໝົດໃນໄລຍະອາຍຸນີ້ ແລະ ຈໍານວນນັກຮຽນປະຖົມທີ່ເລີກຮຽນກາງສະໄໝບໍ່ຄວນເກີນ 4,2%, ທັງນີ້
ລາວກໍາລັງຜະເຊີນສະພາບນັກຮຽນເລີກຮຽນກາງສະໄໝເພີ່ມຂຶ້ນ ລວມທັງຈໍານວນນັກຮຽນທີ່ສະໝັກເຂົ້າໂຮງຮຽນ ແລະ ມະຫາວິທະຍາໄລຫລຸດລົງໃນປີ 2023.