ປກສ ເມືອງຄຳ ຈັບກຸ່ມແກ້ງສໍ້ໂກງຊັບໄດ້ 6 ຄົນ ໃນຮູບແບບເອົາເງິນຢວນມາແລກເປັນເງິນກີບ ລວມມູນຄ່າເສຍຫາຍ 1 ຕື້ກວ່າກີບ

ເຈົ້າໜ້າທີ່ ປກສ ເມືອງຄຳ ແຂວງຊຽວຂວາງ ລາຍງານ ວັນທີ 2 ພະຈິກ 2023 ວ່າ: ວັນທີ 23 ຕຸລາ ຜ່ານມາ ມີພົນລະເມືອງດີແຈ້ງວ່າມີກຸ່ມຄົນບໍ່ດີເຄື່ອນໄຫວສໍ້ໂກງຊັບພົນລະເມືອງດ້ວຍຮູບແບບການແລກປ່ຽນເງິນຕາຜິດກົດໝາຍ ຢູ່ເທສະບານເມືອງຄຳ. ດັ່ງນັ້ນເຈົ້າໜ້າທີ່ຈຶ່ງລົງກວດກາ ສືບຫາກຸ່ມແກ້ງດັ່ງກ່າວ ແລະ ສາມາດພົບເຫັນເປົ້າໝາຍໄດ້ 6 ຄົນ ຄື: 1.ທ້າວ ເກີຊຽນຈາງ ອາຍຸ 28 ປີ ສັນຊາດຈີນ, 2.ທ້າວ ລຸຍເປີຍ ອາຍຸ 33 ປີ ຊັນຊາດຈີນ, 3.ທ້າວ ຕະລ້ອນ ອາຍຸ 35 ປີ ຊັນຊາດລາວ, 4.ທ້າວ ຕະສົນ ອາຍຸ 22 ປີ ຊັນຊາດລາວ, 5.ທ້າວຈັນສຸກ ອາຍຸ 24 ປີ ຊັນຊາດລາວ , 6.ທ້າວ ບຸນຈັນ ອາຍຸ 18 ປີ ຊັນຊາດລາວ. ທັງ4 ຄົນຊັນຊາດລາວ ເປັນຄົນເມືອງຍອດອູ ແຂວງຜົ້ງສາລີ.

ຜ່ານການສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ໄດ້ມີການເຄື່ອນໄຫວສໍ້ໂກງຊັບພົນລະເມືອງແທ້ ໂດຍອ້າງວ່າເປັນພໍ່ຄ້າຊື້ຄວາຍ, ງົວ ແລະ ເກັບຊື້ຊາ ນຳປະຊາຊົນ ເຊິ່ງນຳເອົາເງິນຢວນມາແລກປ່ຽນເປັນເງິນກີບ ນຳຜູ້ເສຍຫາຍ 4 ຄົນ, ຄົນລະໜຶ່ງແສນຢວນ ດ້ວຍອັດຕາແລກປ່ຽນ 2.900 ກີບຕໍ່1ຢວນ ເທົ່າກັບ 290.000.000 ກີບ, ພາຍຫລັງຊື້ຂາຍສິນຄ້າ ຫລື ແລກປ່ຽນເງິນແລ້ວ ກໍໄດ້ໂອນເງິນເຂົ້າບັນຊີທັງສອງຝ່າຍເປັນປົກກະຕິ ແລະ ກໍແຍກຍ້າຍ. ແຕ່ພໍຜູ້ເສຍຫາຍຈະໄປຖອນເງິນ ບັນຊີກໍຖືກປິດການນຳໃຊ້ໂດຍບໍ່ຮູ້ສາເຫດ ເຊິ່ງໄດ້ສ້າງຄວາມເສຍຫາຍຫລາຍກວ່າ 1 ຕື້ກີບ, ໂດຍມີຜູ້ເສຍຫາຍຢູ່ແຂວງຫລວງພະບາງ 2 ຄົນ ແລະ ແຂວງຊຽງຂວາງ 2 ຄົນ.

ປັດຈຸບັນ ພວກຕ້ອງຫາທັງ 6 ຄົນ ຍັງຢູ່ໃນຂັ້ນຕອນດຳເນີນການຕາມລະບຽບກົດໝາຍຕໍ່ໄປ.